Maŋtsɛyeli Jajelɔi Bɔ Amaniɛ

Mɛnɛɛmɛi hu kɛ amɛhe fɔɔ Yehowa nɔ

OBALAŊTAI komɛi miibibii amɛhe sane yɛ maŋ ko ni átsi Yehowa Odasefoi atsɔsemɔ nitsumɔ lɛ naa yɛ jɛmɛ lɛ no akɛ: “Mɛni ji yiŋtoo ni yɔɔ shihilɛ mli? Nɛgbɛ mɔ ko baana anɔkwale lɛ yɛ? Mɛni hewɔ efɔŋfeemɔ efa babaoo nɛkɛ?” Amɛnaaa hetoo ni haa mɔ tsui nyɔɔ emli kɛjɛɛɛ sɔlemɔ lɛ loo amɛfɔlɔi aŋɔɔ. Daatɔɔ kɛ tsofai fɔji kɛ nitsumɔ haaa amɛna jwɛŋmɔŋ toiŋjɔlɛ. Obalaŋtai nɛɛ ateŋ mɔ kome nu he akɛ enaanyo ko kɛ Yehowa Odasefoi miikase Biblia lɛ, ni eto eyiŋ akɛ ebaaya eyafataa amɛhe ni “ekɛhere” enaanyo yɛ “yiwala” kɛtsɔ gbɛjianɔtoo nɛɛ fatɔɔi ni eeetao ni etsi ta lɛ nɔ. Nɔ ni tamɔɔɔ nakai moŋ ená​—sanebimɔi ni egbɛ enaa aahu lɛ ahetoo ni ená. No hewɔ lɛ ekɛ Yehowa Odasefoi je Biblia lɛ kasemɔ shishi. Yɛ be ni sa mli lɛ Biblia mli anɔkwale lɛ tsake obalanyo lɛ ni ekpa zigaret shɛremɔ, ekpa daatɔɔ, ni eje shishi ena lɛ diɛŋtsɛ eweku lɛ he miishɛɛ babaoo.

Efɔlɔi nyɛ enɔ koni eshi amɛshia lɛ eya ejaakɛ amɛsumɔɔɔ nɔ ni ekaseɔ lɛ. Kɛkɛ ni nɔ ko ba ni ha amɛsusu akɛ enyɛŋ eba lɛ nakai kɔkɔɔkɔ. Ená tsu hee, nii ni eheɔ afii babaoo dani mɔ ko nine shɛɔ eko nɔ lɛ. Yɛ be mli ni ewieɔ enɛ he lɛ, obalanyo lɛ kɛɛ: “Anɔkwale ni eji akɛ mibale Nyɔŋmɔ yiŋtoo, ni mikɛ Biblia mi ŋaawoo lɛ tsu nii yɛ mishihilɛ mli Iɛ ha miŋmɛ pɛpɛɛpɛ yɛ mijwɛŋmɔ mli koni matao miweku lɛ miishɛɛnamɔ ekoŋŋ. Miŋa kɛ mi kpaa gbee ni wɔkɛ hekɛnɔfɔɔ miikwɛ wɔsɛɛ be gbɛ.”

Oblanyo nɛɛ le nɔ ni Abɛi 3:​5, 6 tsɔɔ lɛ jogbaŋŋ: “Okɛ ohiɛ afɔ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ; kaimɔ lɛ yɛ ogbɛi fɛɛ mli, ni lɛ eeejaje otempɔŋi lɛ.”

Odasefonyo ko hu kɛ yoo onukpa ko kpe yɛ maŋ ko ni atsi Yehowa Odasefoi anitsumɔ lɛnaa yɛ mli Iɛ mli. Yoo nɛɛ kɛɛ Odasefonyo lɛ akɛ jeŋ shihilɛ eje etsine. Ewu egbo, ebii ebuuu lɛ ni efóɔ yɛ shihilɛ mli ni eyɔɔ lɛ hewɔ. Shi ebo Maŋtsɛyeli lɛ he sanekpakpa lɛ ni shɛjeɔ mɔ mii lɛ toi ni ejie miishɛɛ babao kpo yɛ he. Eesumɔ ni Odasefonyo lɛ kɛ ebiyoo ni ekɛɛ eji kuɛŋtilɔ, ni efɔɔ daatɔɔ, eshɛreɔ Zigaret ni ewieɔ yakayaka wiemɔi lɛ awie.

Nyɛmiyoo nɛɛ kɛ gbekɛyoo lɛ wie, ni gbekɛyoo nɛɛ bo Maŋtsɛyeli le he sane lɛ toi ni eyoo sɛɛnamɔ kpele ni yɔɔ anɔkwale lɛ he lɛ. Ekpɛlɛ ákɛ akɛ lɛ akase Biblia lɛ, ni Ŋmalɛ lɛ mli hewalɛ lɛ tsake eshihilɛ gbɛ lɛ ni eto eyiŋ akɛ ebaajɔɔ ehe nɔ eha Yehowa, efee nakai ni abaptisi lɛ. Efee enɛ po kɛtsɔ enyɛ ni miito gbɛjianɔ koni abaptisi lɛ lɛ hiɛ. Etsɛɛɛ kwraa ni biyoo nɛɛ kɛ mɛi sɔrɔtoi etɛ bɔi nikasemɔ.

Ani obaanyɛ osusu miishɛɛ babaoo ni nyɛ kɛ biyoo nɛɛ fɛɛ ena ŋmɛnɛ lɛ he? Amɛyɛ nɔ ni amɛbaanyɛ amɛdamɔ nɔ amɛna miishɛɛ diɛŋtsɛ ejaakɛ amɛkɛ amɛhe efɔ Yehowa Nyɔŋmɔ kɛ gbɛjianɔ ni eto kɛha naanɔ wala ni suɔmɔ yɔɔ mli lɛ nɔ.​—Lala 56:​12.