Kɔkɔbɔɔ Ni Abooo Toi Lɛ

MAY 18, 1980 ni St. Helens Gɔŋ ni yɔɔ U.S. Amerika lɛ fite dioo ni efee aahu afii 123 lɛ. Gɔŋ Iɛ fɛ́ ni eloo sui ni shɛɔ ninetalɔi 1,800 kɛjɛ eyiteŋ, efite shikpɔji fɛfɛji ni ebɔle ehe kɛkpe ni shɛɔ shitoi 230 koji ejwɛ, ni egbe gbɔmɛi fe 60.

Gɔŋ nɛɛ fɛmɔ baaa ni kɔkɔbɔɔ bɛ mli. Aaafee nyɔji enyɔ dani enɛ aaaba lɛ, no mli lɛ, shikpɔŋhosomɔ ko eba yɛ heni gɔŋ nɛɛ yɔɔ lɛ, ni hosomɔi nɛɛ tee nɔ etsara nɔ oyayaayai kɛba. Yɛ March 27 mli ni gɔŋ nɛɛ fɛ lamlu eshwie kɛ lamɔ ni fɛ kɛtee ŋwɛi aaafee shitoi ejwɛ. Eyɛ mli akɛ gɔŋ nɛɛ bafee nɔ ni efee dioo yɛ April mli moŋ, shi ana ni nɔ ko miifa kpo yɛ gɔŋ lɛ afa gbɛ ni kwɛɔ kooyigbɛ lɛ ni eeda eeefee ninetalɔi enumɔ daa gbi.

Kɛha jeŋ nilelɔi lɛ, nɛkɛ okadii nɛɛ tsɔɔ akɛ gɔŋ nɛɛ miihe afɛ́. Abɔ gbɔmɛi ni yɔɔ Gɔŋ nɛɛ he lɛ kɔkɔ akɛ amɛtsi amɛhe kɛjɛ he. Shi mɛi pii booo kɔkɔbɔɔ nɛɛ atoi.

Harry Truman, ni eji gbɔiatoo he ko nɔtsɛ yɛ Spiriit Lake yɛ gɔŋ lɛ shishi lɛ kpoo akɛ eeeshi jɛmɛ. Ehi jɛmɛ efii 50 ni eheee eyeee ekɛ gɔŋ ni esumɔɔ jogbaŋŋ nɛɛ baatsake toiŋjɔlɛ shihilɛ ni ebɔle ehe kɛkpe lɛ. Mɛi komɛi hu tara tsɔnei amli amɛkɛteke gbɛi ni etsi koni ekabɛŋkɛ gɔŋ lɛ ni amɛtee amɛyamamɔ bui yɛ gɔŋ lɛ he ni amɛkwɛ nɔ ni baaba yɛ gɔŋ lɛ he koi ni jɛmɛ efee dioo ni lakaa mɔ lɛ amli.

Beni fɛmɔ kpeteŋkpele nɛɛ ba lɛ, efɛ lamlu kɛ kɔɔyɔɔ ni ebɔɔ yɔɔ mli ni edɔ klakla kɛjɛ gɔŋ lɛ yiteŋ, yɛ shitoi 400 ŋmɛlɛtswaa kome naa Eshwie! Efite tsei komɛi ni tamɔ blonya tsei akpekpei abɔ, ni ekpata gbɔmɛi ni booo kɔkɔbɔɔ lɛ toi lɛ fɛɛ ahiɛ. Mɛi komɛi gboi ni kamera ni amɛkɛshaa mfonirii kpɛtɛkpɛtɛɛ amɛhiɛ. Ŋmɔtɔ ni miitswa kɔtɔkɔtɔ ni enɔkwɔlɛ shɛɔ ninetalɔi nyɔŋmai ejwɛ fu Harry Truman kɛ egbɔiatoo he lɛ.

Ŋmɔtɔ ni hoɔ nɛɛ miiho kɛmiijɛ gɔŋ lɛ yiteŋ yɛ shitoi 50, ŋmɛlɛtswaa kome naa. Beni hɛlikopta kudɔlɔ ko bɔ gbɔmɛi ni nyiɛ nɛkɛ ŋmɔtɔ nɛɛ gbɛ lɛ nɔ lɛ kɔkɔ akɛ amɛtsi amɛhe, ejaakɛ eshara miiba lɛ, mɛi komɛi kpoo akɛ amɛaabo wiemɔi lɛ atoi. Ekɛɛ akɛ: “Minyɛɛɛ mahe enɛ maye. Mikɛɛ amɛ nɔ ni baa ni amɛŋmɔ ni amɛfɔ mi nine.” Etsɛɛɛ ni amɛ ŋmɔlɔ lɛ tsɔ bolɔmɔ kɛ yeyeeye feemɔ.

Nɛkɛ kpoomɔ ni ekpoɔ akɛ aaabo kɔkɔbɔɔ diɛŋtsɛ toi nɛɛ jeee nɔ ko ni ekaaa, titiri lɛ kɛ ekɔɔ nɔ ko ni gbɔmɛi enako da lɛ he. Mɛi susuɔ akɛ nɔ ko nɔ ko baŋ, ejaakɛ shihilɛ ni amɛhi mli lɛ etee nɔ nakai nɔŋŋ kɛjɛ amɛblematsɛmɛi ayinɔ. Nɛkɛ su nɛɛ kɛ oshara diɛŋtsɛ baaba, kɛji eha mɔ ko ku ehiɛ eshwie blema kɔkɔbɔɔ ko ni kɔɔ oshara kpeteŋkpele ni baa ni da fe St. Helens Gɔŋ fɛmɔ lɛ nɔ lɛ. Mɛni ji nakai oshara kpeteŋkpele lɛ? Ni mɛni ji su ni ohiɛ yɛ nakai kɔkɔbɔɔ lɛ he? Ani Obaafɔ onine akɛ oheee oyeee, aloo oosumɔ ni obo toi ni oyi ana wala? Kwɛmɔ nɔ ni aŋma ni nyiɛ sɛɛ nɛɛ lɛ mli.