“Obalahiaŋ Ŋa Lɛ”

“GBALAFITEMƆ miihe atsɔ tamɔ daa gbi nifeemɔ ko.” Nakai nilelɔi pii kɛɔ, taakɛ Los Angeles Times lɛ tsɔɔ lɛ. Ani wiemɔ ni tamɔ nɛkɛ feɔ bo naakpɛɛ? Ni kɛlɛ, jwɛŋmɔŋ hela he datrɛfonyo Frank Pittman buɔ akɔntaa akɛ wumɛi amlijaa oha mli 50 kɛ agbɛnɛ ŋamɛi amlijaa 30 kɛmiishɛ 40 yeee anɔkwa. Kɛ eji anɔkwale lɛ, no lɛ mɛi fɛɛ ni boteɔ gbalashihilɛ mli lɛ amlijaa enyɔ mli ekome fiteɔ gbala!

Ani no tsɔɔ akɛ tɔmɔ ko bɛ jeŋba shara he? Dabi kwraa! Bɔ ni anɔkwa ni ayeee egbɛ eshwa lɛ etsɔɔɔ akɛ eja​—tamɔ bɔ ni gbɛjegbɛ nɔ awuiyeli haaa ojo ni aaatswa mɔ ko lɛ afee nɔ ni ja lɛ. Jeŋba shara yeɔ awui. Akɛ nɔkwɛmɔ nɔ lɛ, ŋmɛnɛ, adesai miiye tsɛŋemɔ helai ni yɔɔ gbeyei waa, ni anaa kɛtsɔɔ bɔlɛnamɔ nɔ, ni kulɛ abaanyɛ atsi enɛɛmɛi fɛɛ naa kɛji gbɔmɛi yɛ jeŋba kpakpa. Eji adesai ajeŋba fiteee yɛ bɔlɛnamɔ mli tamɔ nɛkɛ kulɛ, AIDS hela ni gbeɔ mɛi babaoo ŋmɛnɛ nɛɛ nyɛŋ ahe shi tamɔ nɛkɛ.

Kɛfata he lɛ, mɛi ni yɔɔ nii babaoo ni “amɛhiŋmɛi egbele” waa hu lɛ po nuɔ dɔlɛ babaoo he kɛji amɛhefatalɔi yeee anɔkwa. Anɔkwa ni ayeee shikome pɛ lɛ po baanyɛ ekɛ pilamɔ ni akɛ wala be fa baatsa aba.

Shi kɛlɛ, oti ni he hiaa fe fɛɛ ji akɛ, gbalashihilɛ mli kitakamɔi ni akɛaashwɛ lɛ tsɔɔ bulɛ kwraa ni abɛ kɛha Nyɔŋmɔ, ejaakɛ lɛ ji gbalashihilɛ lɛ Shishitolɔ. Biblia lɛ kɛɔ akɛ: “Awo gbala hiɛ nyam yɛ nyɛ fɛɛ nyɛteŋ.” Abɔɔ wɔ kɔkɔ hu akɛ: “Ajwamaŋbɔlɔi kɛ gbalamlikulɔi lɛ, Nyɔŋmɔ baakojo amɛ.”​—Hebribii 13:⁠4.

No hewɔ lɛ, mɛi ni le nii lɛ boɔ mumɔ naa wiemɔi nɛɛ atoi: “Ná obalahiaŋ ŋa lɛ he miishɛɛ.” (Abɛi 5:18) Amɛkɛ amɛgbalashihilɛ mli hefatalɔi lɛ pɛ naa tsui ni nyɔɔ mɔ mli kɛ miishɛɛ. Ni yɛ nakai feemɔ mli lɛ, amɛbuɔ amɛgbɔmɔtsoŋ kɛ henumɔŋ hewalɛnamɔ he, ni nɔ ni he hiaa fe fɛɛ lɛ, amɛkɛ woo haa gbalashihilɛ Shishitolɔ kpele lɛ, Yehowa Nyɔŋmɔ.