“Tamɔ Jata ni Hũuɔ”
ANI oheɔ oyeɔ akɛ Satan yɛ? Mɛi pii heee yeee ŋmɛnɛ. Etamɔ nɔ ni amɛbuɔ hemɔkɛyeli ni tamɔ nɛkɛ akɛ “jeŋ nilee fiii sɛɛ.” Mra mli yɛ 1911 tɔŋŋ po lɛ, Encyclopedia Britannica lɛ wie akɛ: “Jeŋ nilee egbala nibii ni yaa nɔ yɛ adebɔɔ mli yɛ ŋwɛiniiaŋ kɛ gbɔmɔ mligbɛ shihilɛ mli lɛ mli babaoo mli jogbaŋŋ aahu akɛ gbɛ ko kwraa bɛ kɛha Satan hesusumɔ.” Nyɔŋmɔ jamɔ mli nilelɔi susuɔ akɛ Satan ji okadi ko kɛkɛ, blema adesã ko. The World Book Encyclopecdia lɛ wie akɛ: “Ŋmɛnɛŋmɛnɛ beaŋ Nyɔŋmɔ jamɔ mli nilelɔi pii susuɔ Abonsam he akɛ eji hewalɛ ni efɔŋ yɔɔ lɛ he okadi kɛkɛ, akɛ eji adesa bɔɔ su lɛ mli sui ni ehiii fe fɛɛ.”
Shi, mɛni ji anɔkwa saji lɛ diɛŋtsɛ? Kɛji oheɔ Biblia lɛ oyeɔ lɛ, no lɛ esa akɛ ohe oye akɛ Satan yɛ diɛŋtsɛ. Jeee akɛ Yesu he eye akɛ eyɛ kɛkɛ, shi moŋ etsɛ lɛ “je nɛŋ lumɔ” hu. (Yohane 14:30) Bɔfo Paulo tsɛ Satan “je nɛŋ nyɔŋmɔ lɛ.” (2 Korintobii 4:4) Ni bɔfo Yohane ni egbɔ lɛ hu wie akɛ: “Jeŋ muu lɛ fɛɛ ka mɔ fɔŋ lɛ mli.”—1 Yohane 5:19.
Kɛ okɛ Yohane kpaaa gbee lɛ, susumɔ nyɛsɛɛ be fioo ni eho nɛɛ he okwɛ. Susumɔ gbɔmɔgbee kui kɛ niseniianifeemɔ ni nɔyelii kɛtsuɔ nii lɛ he okwɛ. Kaimɔ tai kɛ gbɔmɛi akui komɛi ahiɛkpatamɔ ni ba yɛ wɔyinɔ nɛɛ mli lɛ. Ni awuiyelii ni aŋmalaa he saji awoɔ wɔ adafitswaa woji amli—gbɔmɛi babaoo gbee, kaabonaatoo, gbɔmɛi ni agbeɔ amɛ daa gbi, gbekɛbii ni akɛnaa bɔlɛ yɛ gbɛ fɔŋ nɔ, kɛ wɔɔtsi fioo nɛɛ ta lɛ hu? Ani mɔ kroko baanyɛ afee je nɛŋ nyɔŋmɔ lɛ, kɛ jeee Satan?
Kristofonyo Bɔfo Petro bɔ kɔkɔ akɛ: “Nyɛhiɛ akaa shi, nyɛsaraa, ejaakɛ nyɛhenyɛlɔ Abonsam lɛ nyiɛ tamɔ jata ni hũuɔ eetao mɔ ni eeemi.” (1 Petro 5:8) Kɛ aŋmɛɛ jata he yɛ nyɛ akutso lɛ mli lɛ, ani obaadamɔ shi osusu he kɛji eyɛ shihilɛ mli loo ebɛ? Aloo obaajo foi ni oyatao teemɔ he?
Na ole akɛ Satan yɛ shihilɛ mli. Enaaa mɔ mɔbɔ ni eyeɔ awui waa, ni ehe wa kwraa fe wɔ. No hewɔ lɛ joo foi kɛya Mɔ ni he wa fe lɛ lɛ ŋɔɔ kɛha hebuu. “Mɔɔ ni wa ji Yehowa gbɛi lɛ; no mli jalɔ shaa foi kɛyaa, ni ehiɔ shi shweshweeshwe.” (Abɛi 18:10) Yaaba abo yɛ Yehowa Nyɔŋmɔ ŋɔɔ, koni ona ole akɛ etsɛŋ ni adesai baaye amɛhe kɛjɛ mɔ fɔŋ lɛ, ni ji Satan hewalɛ shishi. Mɛɛ miishɛɛ heyeli eeeji nɛkɛ!—Kpojiemɔ 20:1-3.