Ani Owo Koo Mli La Dã?

Oo DABI ji bɔ ni oookɛɛ. Shi mɛɛ fioo! Ekolɛ ofee eko dã. Bo kaselɔ Yakobo wiemɔi nɛɛ toi: “Lilɛi hu, henɔ bibioo ni, ni eshwaa nii wuji. Naa, la bibioo hu, nyɛkwɛa koo bɔ sɔŋŋ ni eshaa!”​—Yakobo 3: 5.

Lilɛi lɛ ji henɔ ko ni he hiaa waa kɛha wiemɔ, shi kwɛ bɔ ni akɛtsu nii yɛ gbɛ fɔŋ nɔ aha! Gbɔmɛi kɛ lilɛi lɛ maleɔ ni amɛkɛyeɔ osheku. No nɔŋŋ hu amɛkɛ wieɔ waa amɛshiɔ mɛi krokomɛi, ni amɛkɛfiteɔ amɛ gbɛi kpakpa, ni amɛkɛshishiuɔ amɛ. Mɛi ni woɔ maŋ hirihiri lɛ kɛ lilɛi lɛ tsuɔ nii ni amɛkɛteeɔ maŋ hiɛ atuatsemɔ shi. Adolf Hitler kɛ elilɛi tsu nii ni ekɛbua maŋ muu fɛɛ naa kɛha ta​—‘koo la’ lɛlɛŋ!

Mɛi ni hiɛ kanyamɔi kpakpai lɛ po baanyɛ awo ’koo lai’ bibii. Ani owie nɔ ko dã, ni no sɛɛ nɔŋŋ lɛ ona kulɛ onyɛ otsake nɔ ni owie lɛ? Kɛ nakai ni lɛ, onuɔ nɔ ni Yakobo wie lɛ shishi, akɛ: ‘Lilɛi lɛ, gbɔmɔ ko gbɔmɔ ko nyɛɛɛ ehe ajɔɔ’​—Yakobo 3:8.

Shi kɛlɛ, wɔbaanyɛ wɔbɔ mɔdɛŋ ni wɔkɛ wɔlilɛi lɛ atsu nii yɛ gbɛ kpakpa nɔ. Wɔbaanyɛ wɔkɛ faishitswaa akɛɛ, taakɛ lalatsɛ lɛ kɛɛ lɛ, akɛ: “Male minane naa kwɛmɔ, ni mikɛ mililɛi akafee esha.” (Lala 39:⁠2) Yɛ nɔ najiaŋ ni wɔɔwie waa wɔshi mɛi krokomɛi lɛ, wɔbaanyɛ wɔbɔ mɔdɛŋ ni wɔtswa amɛ wɔma shi. Ni wɔɔye osheku moŋ lɛ, wɔbaanyɛ wɔwie mɛi ahe kpakpa. Ni wɔɔshishiuɔ ni wɔlaka mɛi lɛ, wɔbaanyɛ wɔwie anɔkwale ni wɔtsɔɔ mɛi anii. Kɛ tsui kpakpa kanyaa wɔ lɛ, no lɛ lilɛi lɛ baanyɛ awie nibii kpakpai ni tsaa mɔ. Yesu kɛ elilɛi tsu nii yɛ naakpɛɛ gbɛ nɔ ni ekɛtsɔɔ adesai yiwalaheremɔ he nii.

Lɛlɛŋ “gbele kɛ wala yɛ lilɛi dɛŋ.” (Abɛi 18: 21) Ani olilɛi gbeɔ mɔ aloo ehaa mɔ wala? Ani ewoɔ ‘koo mli la’ aloo egbeɔ la lɛ moŋ? Lalatsɛ lɛ sɔle eha Nyɔŋmɔ akɛ: “Mililɛi lɛ aaala owiemɔ lɛ he lala, ejaakɛ okitai lɛ fɛɛ lɛ jalɛ ni.” (Lala 119:172) Kɛ wɔna lalatsɛ lɛ su nɛɛ eko lɛ, wɔ hu wɔkɛ wɔlilɛi lɛ baatsu nii yɛ gbɛ kpakpa nɔ.

[He ni Mfoniri ni yɔɔ baafa 32 lɛ Jɛ]

U.S. Forest Service photo