Maŋtsɛyeli Jajelɔi Bɔ Amaniɛ

Biblia Mli Anɔkwale Fee Weku ko Ekome

YƐ JE lɛŋ hei pii ŋmɛnɛ lɛ, etamɔ nɔ ni weku kɔkrɔɔ shihilɛ be lɛ bɛ dɔŋŋ. Shi kɛlɛ, Biblia lɛ jieɔ nɔ ni he hiaa kɛha weku ekomefeemɔ lɛ kpo. Susumɔ Yesu wiemɔi nɛɛ ahe okwɛ: “No hewɔ lɛ mɔ fɛɛ mɔ ni nuɔ miwiemɔi nɛɛ ni eyeɔ nɔ lɛ, maŋɔ lɛ mato ŋaalelɔ ni ma etsu yɛ tɛsaa nɔ lɛ he.” (Mateo 7:24) Wekui akpei abɔ ni yɔɔ Yehowa Odasefoi ateŋ lɛ enyɛ efee ekome kɛtsɔ nɛkɛ wiemɔi nɛɛ kɛ nitsumɔ kɛ agbɛnɛ kɛtsɔ Biblia lɛ hu kɛ nitsumɔ nɔ, ákɛ shishitoo nɔ kɛha weku ni efee ekome lɛ tswaa kɛ shimaa. Mɛi krokomɛi hu miishɛ nɛkɛ ekomefeemɔ nɛɛ he, taakɛ niiashikpamɔ ni nyiɛ sɛɛ lɛ tsɔɔ lɛ.

Beni Daniel yɔɔ asraafoi anitsumɔ lɛ mli yɛ France lɛ, asraafonyo osɔfo ko wo Daniel ŋaa ni ebɔ mɔdɛŋ ehe Biblia, ni efee nakai, ni ebɔi kanemɔ daa. Yɛ naagbee lɛ, ajie lɛ kɛjɛ jɛmɛ kɛtee Tahiti. Daniel nanemɛi asraafoi lɛ ekomɛi yaa Adventist sɔlemɔ lɛ, ni mɛi krokomɛi hu, Mormonbii ji amɛ. Bei pii lɛ, amɛsanegbaa tsaa nɔ kɛyaa Nyɔŋmɔ jamɔ he saji anɔ. Gbi ko lɛ asraafonyo nukpa ko kɛ Daniel tsɔɔ eŋa, ni ji Yehowa Odasefoi ateŋ mɔ ko lɛ. Ekɛ eshwane be lɛ fɛɛ ha saji babaoo ni Daniel biɔ lɛ ahetoo, ni eto gbɛjianɔ eha lɛ koni ekɛ Yehowa Odasefoi asafoi ni yɔɔ Tahiti lɛ ekome abɔ. Etsɛɛɛ ni eje daa Biblia mli nikasemɔ shishi.

Daniel fɔlɔi ni yɔɔ France lɛ etuu amɛhe amɛha Katolik jamɔ waa diɛŋtsɛ. Etsɛ woɔ skul gbekɛbii aŋaa, ni lɛ nɔŋŋ hu ekwɛɔ Nyɔŋmɔ jamɔ he nitsɔɔmɔ nɔ yɛ Katolik skul ko. Akɛni eetao ni eha efɔlɔi ale mumɔŋ sɛɛyomɔi ni ekaseɔ lɛ ekomɛi hewɔ lɛ, Daniel bɔi Biblia mli susumɔi lɛ ekomɛi kɛ woji ni eŋmalaa emajeɔ amɛ lɛ amli woo fiofio.

Kɛjɛ shishijee lɛ, Daniel mami na he miishɛɛ waa, shi ehiɛ fee lɛ yaa akɛ eeena gbɛi Yehowa lɛ yɛ ebinuu lɛ woji lɛ ekome mli. Gbii fioo komɛi asɛɛ lɛ, enu redio nɔ nifeemɔ ko ni miiwie Yehowa Odasefoi ahe akɛ “kuu ko ni he yɔɔ oshara.” Kɛkɛ ni eŋma Daniel wolo, ni ekɛɛ lɛ akɛ ekɛ Odasefoi afo tako mli kwraa amrɔ nɔŋŋ. Shi, Daniel kã he etee ehiɛ yɛ e-Biblia kasemɔ lɛ mli, ni etsɛɛɛ ni eto gbɛjianɔ akɛ ebaashi asraafoi anitsumɔ lɛ ni eku esɛɛ kɛya France.

Beni eyashɛ shia nɔŋŋ lɛ, Daniel ye gbɛkɛnaashi be fɛɛ daa gbi—bei komɛi po lɛ, kɛyashiɔ be ni jenamɔ yi ewa—ni ekɛ emami naa Biblia mli sanegbaa kakadaŋŋ. Yɛ naagbee lɛ, emami kpɛlɛ akɛ ebaafata Daniel he kɛya Maŋtsɛyeli Asa lɛ nɔ. Beni etee klɛŋklɛŋ kwraa lɛ, ena he miishɛɛ aahu akɛ akɛ lɛ bɔi lɛ diɛŋtsɛ e-Biblia mli nikasemɔ feemɔ. Etee ehiɛ oyayaayai, ni etsɛɛɛ ni abaptisi lɛ.

Daniel tsɛ ji mɔ ko ni bɛ shɛii, shi etuu ehe eha enitsumɔ kɛ ejamɔ mli nifeemɔi waa. Shi, be ko lɛ, ekɛ tsɔne wo eŋa kɛ Daniel kɛtee kpokpaa wulu nɔ kpee ko shishi. July 14 ji nakai gbi lɛ, ni efee ejwɛŋmɔ akɛ ebaakwɛ Bastille Day asraafoi anifeemɔi ni abafee yɛ maŋtiase lɛ mli lɛ. Beni emɛɔ amɛ lɛ, ekpɛ eyiŋ akɛ ebaakwɛ kpee asa lɛ mli akɛ mɛni yaa nɔ yɛ jɛmɛ. Gbɛjianɔtoo kpakpa kɛ toiŋjɔlɛ ni ena yɛ Yehowa webii ateŋ lɛ fee lɛ fɛo waa, ni beni enyiɛɔ kpee lɛ shishi nitsumɔ hei sɔrɔtoi lɛ ni ekwɛɔ jɛmɛ lɛ, belɛ mɔ fɛɛ mɔ miitsɛ lɛ “nyɛminuu.” Ehiɛ kpa Bastille Day asraafoi anifeemɔ lɛ nɔ kwraa ni ehi shi aahu kɛyashi agbe kpee lɛ naa. Ebi ni akɛ lɛ akase Biblia lɛ, ni etee hiɛ oyayaayai yɛ anɔkwale lɛ kasemɔ mli. Shi, babaoo ni ekaseɔ nii lɛ, babaoo hu ni ehaaa ena enitsumɔ lɛ he miishɛɛ ji no, no hewɔ lɛ, ni eye afii 58 lɛ, eshi enitsumɔ lɛ. Amrɔ nɛɛ weku lɛ mli bii etɛ lɛ fɛɛ ejɔɔ amɛhe nɔ ni abaptisi amɛ ni amɛfee ekome kɛmiisɔmɔ Yehowa kutuu.

Biblia mli anɔkwale lɛ ji nɔ ni fee Daniel weku lɛ ekome. Ebaanyɛ efee wekui krokomɛi hu ekome kɛ amɛkase ni amɛjɛ amɛtsui muu fɛɛ mli amɛkɛtsu nii.