Maŋtsɛyeli Jajelɔi Bɔ Amaniɛ
Enyiɛ Ehenilee ni Biblia Etsɔse lɛ lɛ Sɛɛ
ISRAEL maŋtsɛ David sɔle eha Yehowa kɛha yelikɛbuamɔ, beni ekɛɛ: “Shi mi lɛ, emuuyeli mli maba mijeŋ yɛ; heremɔ mi, ni ona mi mɔbɔ.” (Lala 26:11) Nyɔŋmɔ duro lɛ yɛ emuuyeli mli ni ehiɛ lɛ hewɔ. Yehowa jɔɔ Yesu hu ejaakɛ efee eŋwɛi Tsɛ lɛ suɔmɔnaa nii, ni E-jɔɔ obalaŋta ko ji jɛ Colombia ni nyiɛ ehenilee ni Biblia etsɔse lɛ lɛ sɛɛ ni etswa efai shi akɛ ebaafee Nyɔŋmɔ suɔmɔnaa nii lɛ. Obalanyo lɛ gba akɛ:
“Beni mikɛ Yehowa Odasefoi bɔi Biblia lɛ kasemɔ lɛ, no mli lɛ miikase nii yɛ Katolik skul ko. Shi, mihenilee hao mi waa be ko ni mitee sɔlemɔ ni ji Mass lɛ, no hewɔ lɛ mitee skul nɔkwɛlɔ lɛ (ni eji osɔfo) kɛ gbɛtsɔɔmɔ he ŋaawolɔ, kɛ kuu ni miyɔɔ mli lɛ nɔkwɛlɔ lɛ ŋɔɔ ni miyabi lɛ gbɛ ni eha makpa Mass sɔlemɔ lɛ baa. Eyɛ mli akɛ eŋmɛ mi gbɛ akɛ mikpa moŋ, shi mɛi komɛi ka akɛ amɛaanyɛ minɔ ni maya. Nɔnyɛɛ lɛ mli bawa waa beni abaptisi mi akɛ Yehowa Odasefoi ateŋ mɔ ko lɛ sɛɛ nɔŋŋ. Mitsɛ wo mihe gbeyei akɛ kɛ ashwie mi kɛjɛ skul lɛ, lɛ hu ebaashwie mi kɛjɛ shia. Ejwɛŋmɔ ni efee ji akɛ ebaaha maya univɛsiti koni male nitsumɔ pɔtɛɛ ko tsumɔ wɔsɛɛ.
“Skul nɔkwɛlɔ lɛ bɔɔ kɔkɔ be fɛɛ be yɛ mɛi ni sumɔɔɔ ni amɛyeɔ Katolik mlai kɛ amɛnifeemɔi anɔ lɛ ahe. Beni be bashɛ kɛha afi lɛ klɛŋklɛŋ Mass sɔlemɔ lɛ feemɔ lɛ, miyatee mihe kɛyashi agbe naa. Kɛkɛ ni mikɛ Skul kɛ Yehowa Odasefoi wolo bibioo lɛ ekome ha tsɔɔlɔ (ni eji osɔfo) lɛ, ni mikɛɛ lɛ akɛ, akɛ Yehowa Odasefoi ateŋ mɔ ko lɛ, minyɛŋ maya Mass sɔlemɔ lɛ eko. Ni ekɛɛ: ‘No lɛ, ebaahi jogbaŋŋ akɛ obɔi skul kroko taomɔ.’ Mile akɛ kɛji ashwie mi yɛ skul lɛ, belɛ eeetsa nɔ efee mishwiemɔ kɛmiijɛ mitsɛ shia lɛ hu. Shi yɛ fɛɛ sɛɛ lɛ, misɔle miha Yehowa ni mitee nɔ miye miskulbii lɛ odase jogbaŋŋ kɛmɔ shi.
“Gbɛhamɔ be bashɛ. Kɛkɛ ni, ní agbele gbɛ ni wɔtee skul lɛ, be bashɛ ekoŋŋ kɛha Mass feemɔ. Skul nɔkwɛlɔ lɛ kɛ osɔfoi krokomɛi lɛ damɔ sɔlemɔ tsu lɛ hiɛ, ni amɛfee klalo akɛ amɛaabo esha jajemɔi atoi. Gbeyei miihe aye minɔ kwraa. Mibote tsu lɛ mli ni miyata shi, shi mihenilee hao mi waa. Beni lala lɛ je shishi lɛ, misusu akɛ, ‘Mɛni mifeɔ yɛ biɛ? Yehowa ji mi-Nyɔŋmɔ. Minyɛŋ mafee gbeyeilɔ ni makwa lɛ. Minyɛŋ maha enine anyɛ shi. Ekwaŋ mi kɔkɔɔkɔ.’ Misɔle kɛha ekaa namɔ. Kɛkɛ ni minyiɛ kɛje kpo kɛjɛ sɔlemɔ tsu lɛ mli ni miyadamɔ mɛi ni yaajaje eshai lɛ aliamɔ lɛ mli. Beni miyashɛ skul nɔkwɛlɔ lɛ ŋɔɔ lɛ, mikɛɛ lɛ akɛ: ‘Tsɔɔlɔ, mibajajeee esha ko mitsɔɔɔ bo.’ Ni ekɛɛ: ‘Misusu nakai.’ Mikɛɛ lɛ akɛ miisumɔ ni mana amanehulu fɛɛ ni baajɛ mli aba, shi mihenilee eŋmɛɛɛ mi gbɛ ni maya Mass sɔlemɔ lɛ eko. Minyɛŋ mafee nɔ ko ni teɔ shi ewoɔ nɔ ni mikase kɛjɛ Biblia lɛ mli lɛ.
“Ni ekwɛ mi gãa, ni eŋmɔ, ni ekɛɛ: ‘Mibuɔ bo waa. Nyɛ Odasefoi lɛ fɛɛ sa bulɛ waa diɛŋtsɛ. Yɛ nyɛ gbɛfaŋ lɛ, Nyɔŋmɔ baa klɛŋklɛŋ, ni nyɛfee klalo akɛ nyɛbaabo emlai atoi ni nɔ ni baaba kɔɔɔ he eko. Nyɛyaa nɔ nakai. Nyɛmiibɔ mɔdɛŋ waa. Mina ni Katolikbii fɛɛ tamɔ nyɛ, ni amɛjieɔ ekaa kɛ suɔmɔ ni tamɔ nɛkɛ kpo amɛhaa Nyɔŋmɔ. Kɛjɛ ŋmɛnɛ sɛɛ kɛyaa lɛ, oyɛ hegbɛ akɛ ojieɔ ohe kɛjɛ wɔ jamɔ mli nifeemɔi fɛɛ amli.’ Kwɛ bɔ ni mina miishɛɛ miha! Yehowa ejɔɔ mifaishitswaa akɛ mabo mihenilee ni Biblia etsɔse lɛ lɛ toi lɛ nɔ.
“Enɔ jetsɛremɔ lɛ, skul nɔkwɛlɔ lɛ kɛɛ nikaselɔi lɛ akɛ: ‘Jamɔi krokomɛi lɛ nyiɛ wɔhiɛ kwraa. Mɛni hewɔ wɔtamɔɔɔ amɛ, kɛ ekaa, kɛ suɔmɔ ni mli kwɔ kɛha Nyɔŋmɔ kɛ suɔmɔ ni wɔyɔɔ akɛ wɔɔsɔmɔ lɛ kɛteke mɔ fɛɛ mɔ lɛ? Enɛ ji nɔ ko ni esa akɛ ehi nyɛtsuii amli.’
“Yɛ naagbee lɛ, ajie skul nɔkwɛlɔ lɛ kɛtee Rome, ni nɔkwɛlɔ hee ni ba lɛ ku ehiɛ efɔ mihe ni mikɛwooo jamɔ mli nifeemɔi amli lɛ nɔ. Mitsɛ fã yɛ shia lɛ kɛyahi he kroko, ni eha mina hegbɛ mikɛtiu oti ni ma mihiɛ, ni ji be-fɛɛ sɔɔmɔ lɛ sɛɛ beni migbe skul naa lɛ.”
Yehowa jɔɔ nɛkɛ obalanyo ni nyiɛ ehenilee ni Biblia etsɔse lɛ lɛ sɛɛ nɛɛ. Ni nakai nɔŋŋ ebaajɔɔ mɛi fɛɛ ni taoɔ akɛ amɛfee esuɔmɔnaa nii lɛ.—Abɛi 3:5, 6.