Ani Obuɔ Biblia lɛ akɛ Ejara Wa Waa?

NƆ NI fe afii 200 ni eho nɛ, ni afɔ Mary Jones yɛ Llanfihangel, Walse bii akrowa ko ni yɔɔ he ko banee ni kɛ Atlantic ŋshɔ lɛ naa jɛkɛɛɛ. Efɔlɔi ji ohiafoi mamalolɔi komɛi—ohia ni amɛyeɔ lɛ haŋ amɛnyɛ amɛhe Biblia. Shi amɛtɛo suɔmɔ kɛha Nyɔŋmɔ amɛwo amɛ biyoo lɛ mli kɛtsɔ Biblia mli saji ni amɛgbaa lɛ kɛ ŋmalɛi ni amɛkaiɔ ni amɛtiɔ mli lɛ nɔ. Mary fɔɔ enaanyo ko Biblia ni yɔɔ Walse wiemɔ mli lɛ kanemɔ, ni eje shishi akɛ ekɛ shika fioo ni enaa lɛ aaato, kɛ faishitswaa akɛ ebaahe lɛ diɛŋtsɛ enɔ̃.

Afi 1800 mli, beni Mary eye afii 16 lɛ, enu akɛ aahɔɔ Walse Bibliai fioo yɛ maŋ bibioo ni ji Bala ni ekɛ amɛ teŋ jɛkɛmɔ feɔ shitoi 25 loo kilomitai 40 lɛ mli. Enijiaŋ ejeee wui, shi ekpɛ eyiŋ akɛ ebaanyiɛ kɛya jɛmɛ. Efee nakai, kɛtsɔ gɔji anɔ ni ewooo tokota. Shi, beni eshɛɔ jɛmɛ lɛ, áhɔ̃ɔ fɛɛ. Mary na le hu akɛ shika ni ebua naa lɛ faaa kwraa.

Mary nilee kɛ suɔmɔ ni eyɔɔ kɛha Biblia lɛ na osɔfo ni yɔɔ maŋ lɛ mli lɛ nɔ hewalɛ waa. Beni ena eyaafo ni tsɔɔ emɔdɛŋbɔɔ ni efee efolo lɛ, ekɛ lɛ diɛŋtsɛ enɔ ni eyɔɔ lɛ ha lɛ yɛ mlihilɛ naa, ni ekɛɛ lɛ akɛ: “Kanemɔ jogbaŋŋ, okɛ hiɛdɔɔ akase, okɛ wiemɔi krɔŋkrɔŋi ni yɔɔ mli lɛ ato ojwɛŋmɔ mli tamɔ jwetri ko, ni oba ojeŋ yɛ emli tsɔɔmɔi lɛ anaa.”

Agba nɛkɛ sane nɛɛ atsɔɔ yɛ sɛɛ mli yɛ kpee ni Committee of the Religious Tract Society of London fee lɛ shishi. Jɛmɛ amɛkpɛ amɛyiŋ akɛ abaafee Biblia shishitsɔɔmɔi ni jeee ni akɛha Walse bii pɛ, shi ni akɛha jeŋ muu lɛ fɛɛ. Shishijee fioo nɛɛ amli ajɛ ana Biblia asafoi sɔrɔtoi ni jaa Nyɔŋmɔ Wiemɔ lɛ. Yɛ no sɛɛ lɛ, Bibliai ni atsɔɔ shishi kɛtee maŋsɛɛ wiemɔi amli lɛ babaoo je kpo oyayaayai.

Ŋmɛnɛ, Watch Tower Bible and Tract Society, ni akɛwo mla shishi yɛ 1884 lɛ, kalaa Bibliai kɛ Biblia kasemɔ woji yɛ wiemɔi fe 200 mli. Eja ŋmɛnɛŋmɛnɛ beaŋ wiemɔ mli New World Translation of the Holy Scriptures lɛ ekomekomei akpekpei 72 yɛ jeŋ fɛɛ. New World Translation Biblia lɛ ni atsɔɔ shishi kɛjɛ shishijee Hebri kɛ Hela wiemɔi amli lɛ fɛɛ yɛ loo efã ko yɛ, yɛ wiemɔi 18 mli, ni amrɔ nɛɛ aatsɔɔ shishi kɛmiiya wiemɔi krokomɛi 12 mli.

Akɛni etamɔ nɔ ni mɔ fɛɛ mɔ nine baanyɛ ashɛ Biblia lɛ nɔ hewɔ lɛ, te osusuɔ he ohaa tɛŋŋ? Ani obuɔ Biblia lɛ akɛ ejara wa waa? Ani oyɛ eko ni obuɔ lɛ waa ni okaneɔ?

[He ni Mfoniri ni yɔɔ baafa 3 lɛ Jɛ]

Ejɛ The Story of Mary Jones and Her Bible wolo lɛ mli