Fɔmɔ Gbii Ayeli Eshi Gbelei yɛ Esɛɛ

MƐI pii buɔ fɔmɔ gbii ayeli ŋmɛnɛ akɛ kusum nifeemɔ ko ni nɔ fɔŋ ko bɛ he. Shi Biblia lɛ ewieee kusum nifeemɔ nɛɛ he kɛ nɔkpɛlɛmɔ. Ejaakɛ nɔ kome ji akɛ, nɔ ko bɛ Ŋmalɛi lɛ amli ni tsɔɔ akɛ Nyɔŋmɔ tsuji anɔkwafoi lɛ ateŋ mɛi komɛi ye fɔmɔ gbii.

Fɔmɔ-gbii enyɔ pɛ ni Biblia lɛ tsiɔ ta lɛ ji nɔyelɔi ni ji Nyɔŋmɔ henyɛlɔi lɛ anɔ̃. Nɔ ni fata gbijurɔyelii lɛ eko fɛɛ eko he ba ji gbɔmɔgbee, koni gbɔi lɛ anya mɔ ni esaaa maŋtsɛ lɛ hiɛ lɛ gbele he. Yɛ klɛŋklɛŋ nɔ lɛ mli lɛ, Farao, Mizraim maŋtsɛ lɛ gbe ebolooshalɔi anukpa. (1 Mose 40:2, 3, 20, 22) Mizraim nɔyelɔ lɛ fee nakai yɛ okpɔlɔŋmɛɛ shishi ejaakɛ emli efu etsulɔ. Yɛ nɔ ni ji enyɔ lɛ mli lɛ, Herode, Galilea nɔyelɔ ni bɛ jeŋba lɛ fo Yohane Baptisilɔ lɛ yitso koni ekɛsa gbekɛ yoo ni ejoo yɛ okpɔlɔŋmɛɛ lɛ shishi lɛ esa ehiɛ lɛ hiɛ. Mɛɛ nyaŋemɔ nifeemɔi nɛ!—Mateo 14:6-11.

Kɛlɛ, ani jeee fɔmɔ gbii ayelii sɔrɔtoi enyɔ ni ekaaa nɛɛ pɛ Biblia lɛ gbalaa jwɛŋmɔ kɛyaa nɔ? Jeee nakai tsɔ. Blema Yudanyo yinɔsane-ŋmalɔ Josephus jieɔ lɛ kpo akɛ nɛkɛ nibii ni ba nɛɛ jeee nii ni ekaaa loo eyɔɔ sɔrɔto. Eŋmala gbɔmɛi ni agbeɔ amɛ yɛ fɔmɔ gbii ayeli shishi akɛjieɔ hiɛtserɛ lɛ ahe saji eshwie shi.

Akɛ nɔkwɛmɔ nɔ lɛ, ekomɛi ba yɛ Yerusalem hiɛkpatamɔ yɛ afi 70 Ŋ.B., beni Yudafoi 1,000,000 gboi ni amɔmɔ 97,000 ni je mli lɛ akɛ gboklɛfoi lɛ sɛɛ. Beni Roma tatsɛ nukpa Tito kɛ amɛ yaa Roma lɛ, ekɛ enomii Yudafoi lɛ tee Kaisarea lɛji adaamɔ he ni bɛŋkɛ jɛmɛ lɛ.

Josephus ŋma akɛ: “Beni Tito yɔɔ Kaisarea lɛ, eye enyɛmi nuu Domitian fɔmɔ gbi kpeteŋkpele ko kɛ nyam babaoo, ni egbe gboklɛfoi fe 2,500 yɛ shwɛmɔ mli kɛ kooloi kɛ la ni tsoɔ grigri. Yɛ enɛ sɛɛ lɛ, efa kɛtee Berytus [Beirut], Roma shihemɔ he ko ni yɔɔ Foenike, ni eyaye etsɛ fɔmɔ gbi yɛ jɛmɛ ni egbe gboklɛfoi babaoo lolo yɛ nibii ni efee ekɛtsɔɔ lɛ mli.”—The Jewish War, VII, 37, ni Paul L. Maier tsɔɔ shishi yɛ wolo, Josephus: The Essential Writings lɛ mli.

Ebɛ naakpɛɛ akɛ The Imperial Bible-Dictionary lɛ aaawie akɛ: “Sɛɛ mli Yudafoi lɛ kwɛ fɔmɔ gbii ayelii lɛ akɛ wɔŋjamɔ fã, ejaakɛ nibii ni amɛna ni kɔɔ nɛkɛ gbii nɛɛ ayeli he lɛ maa jwɛŋmɔ ni amɛhiɛ lɛ nɔ mi babaoo.”

Klɛŋklɛŋ afii oha lɛ mli Kristofoi anɔkwafoi lɛ nuŋ he akɛ amɛkɛ amɛhe aaabɔ kusum nifeemɔ ko ni awieee he ekpakpa ko kwraa yɛ Biblia lɛ mli ni Romabii lɛ yeɔ he gbijurɔ kɛ yiwalɛ nɛkɛ lɛ he. Ŋmɛnɛ, anɔkwa Kristofoi yɔseɔ akɛ Biblia mli saji ni kɔɔ fɔmɔ gbii ayeli he lɛ fata nibii ni aŋma afɔ shi aha wɔ tsɔsemɔ kɛ nitsɔɔmɔ lɛ he. (Romabii 15:4) Amɛkpoɔ fɔmɔ gbii ayeli ejaakɛ gbijurɔyelii ni tamɔ nɛkɛ haa mɔ lɛ bafeɔ mɔ ni he hiaa tsɔ yɛ gbɛ ni esaaa nɔ. Nɔ ni sa kadimɔ jogbaŋŋ lɛ, Yehowa tsuji kɛ nilee susuɔ bɔ ni atsu fɔmɔ gbii ayeli he nii aha yɛ gbɛ ni ejaaa nɔ yɛ Biblia lɛ mli lɛ he.

[Mfoniri ni yɔɔ baafa 25]

Shwɛmɔ he ko yɛ Kaisarea