Maŋtsɛyeli Jajelɔi Bɔ Amaniɛ

“Kaimɔ Tɛ Kɛha Ekomefeemɔ Mumɔ Lɛ”

AYILƆƆ tɛ agbo ko ma shi yɛ he ko ni bɛŋkɛ Spain maŋ lɛ wuoyigbɛ naagbee he lɛ, ni atsɛɔ lɛ Rock of Gibraltar. Afii ohai abɔ sɔŋŋ nɛ ni nɛkɛ tɛ nɛɛ ema shi akɛ maŋkwramɔŋ béi kɛ majimaji ateŋ gbeekpamɔ ni bɛ lɛ he odaseyeli ni efee dioo. Nɔ ni tamɔɔɔ enɛ lɛ, nyɛsɛɛ nɛɛ, Rock of Gibraltar nɛɛ batsɔ nɔdaamɔ nɔ kɛha gbeekpamɔ kɛ ekomefeemɔ ni afɔɔɔ namɔ yɛ je lɛŋ ŋmɛnɛ lɛ kpojiemɔ.

La Línea maŋ lɛ yɛ aaafee kilomitai etɛ kɛjɛ Rock nɛɛ he, yɛ Spain. Yehowa Odasefoi a-Maŋtsɛyeli Asa ko ni ama yɛ jɛmɛ lɛ ha nitsulɔi ohai abɔ ni kɛ amɛhe eha lɛ anaa bakpe shi yɛ jɛmɛ, ni amɛmiishwe ni amɛkɛ amɛbe kɛ hewalɛ afata he ni akɛtsu nii lɛ. Beni amɛtsuɔ nii koni akɛna jamɔ he ni sa kɛha Bɔlɔ lɛ, Yehowa Nyɔŋmɔ lɛ, eha Rock of Gibraltar tɛ ni yɔɔ fɛo nɛɛ bafee nɔ ni he ehiaaa kwraa kɛji akɛto nitsumɔ ni ka shi ni atsuɔ lɛ he.

Maŋtsɛyeli jajelɔi ni yɔɔ nakai je lɛ fã lɛ kɛ amaniɛbɔɔ ni nyiɛ sɛɛ nɛɛ maje akɛ:

“Nitsulɔi ni yɔɔ ekaa ohai nɛɛhu tsu nii aahu nyɔɔŋ kɛ shwane fɛɛ, kɛjɛ Sohaa shwane, yɛ September 24, 1993. Beni atswaa ŋmɛji kpawo yɛ Hɔgbaa gbɛkɛ lɛ, no mli lɛ akɛ adafitswaa tao hee ni tswaa tsu lɛ he adafi akɛ Yehowa Odasefoi a-Maŋtsɛyeli Asa lɛ ema shi, ni akɛ tsu hee ni yɔɔ fɛo nɛɛ miitsu nii kɛmiiha klɛŋklɛŋ kpee ni afee yɛ mli lɛ.

“Odasefoi pii ni jɛ Gibraltar ni bɛŋkɛ jɛmɛ lɛ fo husu lɛ kɛba koni amɛbaye amɛbua amɛnyɛmimɛi Spaniabii lɛ. Nitsulɔi ni kɛ amɛhe eha lɛ ateŋ mɔ kome, ni ji Gibraltar maŋ lɛ mlinyo ko wie akɛ: ‘Maŋkwramɔŋ mligbalamɔi haaa wɔ majimaji ateŋ nyɛmifeemɔ mumɔ lɛ he ajɔ.’ Ekɛfata he akɛ: ‘Afii saŋŋ ni eho nɛ lɛ, nyɛmimɛi ni jɛ La Línea lɛ ba ni amɛbaye amɛbua wɔ ni wɔkɛma wɔ Maŋtsɛyeli Asa lɛ yɛ Gibraltar, no hewɔ lɛ amrɔ nɛɛ eŋɔɔ wɔnaa waa akɛ wɔ hu wɔɔjie ejurɔfeemɔ kpo kɛto amɛ najiaŋ.’

“La Línea maŋ lɛ kpɛ eyiŋ akɛ ekɛ shikpɔŋ ni he hiaa lɛ baake koni ekɛtsí Yehowa Odasefoi asafoi enyɔ lɛ, kɛ yelikɛbualɔi ni le ŋaa nitsumɔi, ni jɛ Andalusian kpokpaa nɔ, ni jɛ amɛsuɔmɔ mli amɛkɛ amɛmɔdɛŋbɔɔ wo mli lɛ ayisɛɛ. Gbi ko ni La Línea maŋtiase nɔkwɛlɔ lɛ bashɛra shi yɛ he ni amaa tsu lɛ yɛ lɛ, etsɔɔ mli akɛ: ‘Nɔ ni afɔɔ feemɔ ji akɛ, Spaniabii maji anɔkwɛlɔi lɛ kɛ shikpɔji haa kɛhaa Katolik sɔlemɔtsui pɛ amaamɔ. Mɛni hewɔ esaaa akɛ afeɔ nakai nɔŋŋ ahaa jamɔ kui krokomɛi lɛ hu? Mihiɛ esɔ bɔ ni nitsulɔi lɛ kɛ amɛhe eha kwraa kɛha nitsumɔ lɛ waa diɛŋtsɛ, ni minuɔ he akɛ amɛsa wɔsɛɛfimɔ. Mumɔ ni tamɔ nɛkɛ he miihia wɔ waa yɛ ŋmɛnɛ jeŋ ni mli egbala nɛɛ mli.’

“Etsɛ Maŋtsɛyeli Asa lɛ akɛ ‘kaimɔ tɛ kɛha ekomefeemɔ mumɔ lɛ.’ Lɛlɛŋ, jeee ŋaalee ni akɛma tsu lɛ aloo tsu lɛ dalɛ ji nɔ ni haa anaa he miishɛɛ waa nakai lɛ. Shi moŋ, nɔ ni mɛi na he miishɛɛ waa yɛ nakai akutso lɛ mli ji anɔkwale ni eji akɛ mɛi ni kɛ amɛhe eha sɔŋŋ ji mɛi ni ma tsu lɛ, ni akɛ ŋmɛlɛtswai 48 pɛ ma agbe naa!”

Aana faŋŋ akɛ Yehowa Odasefoi ni yɔɔ La Línea kɛ kpokpai ni bɛŋkɛ jɛmɛ lɛ anɔ lɛ miiye wiemɔi ni yɔɔ Galatabii 6:10 lɛ anɔkwale. Bɔfo Paulo wo enanemɛi heyelilɔi lɛ ŋaa yɛ jɛmɛ akɛ: “Belɛ akɛ nɔ ni wɔyɔɔ deka hewɔ lɛ, nyɛhaa wɔfea mɛi fɛɛ ejurɔ, shi titri lɛ mɛi ni ji hemɔkɛyeli lɛ webii lɛ.”