‘Bɔ ni Atsɔ Afee Mi lɛ yɛ Naakpɛɛ’

“NƐGBƐ mijɛ kɛba?” Enɛ ji sanebimɔ ko ni gbekɛbii babaoo biɔ yɛ be kome loo be kroko mli. Kɛ gbekɛbii lɛ dara saŋŋ lɛ, bei pii lɛ, saji ni amɛbiɔ lɛ haa mɔ naa kpɛɔ ehe waa, akɛ: “Nɛgbɛ wala jɛ kɛba?” Akɛ afii akpei abɔ esusu nɛkɛ sanebimɔ nɛɛ he, ni amrɔ nɛɛ, jeŋ nilelɔi pii susuɔ sutsakemɔ he akɛ wala shishijee he teemɔŋ sane lɛ hetoo ni nilee yɔɔ mli fe sɛɛ. Klɛŋklɛŋ kwraa lɛ, mɛi ni tsɔɔ sutsakemɔ tsɔɔmɔ lɛ awiemɔ ji akɛ wala ba yɛ heniianaa.

Aaafee afii 3,000 ni eho nɛ lɛ, Maŋtsɛ David ŋma akɛ: “Bɔ ni atsɔ afee mi lɛ yɛ gbeyei kɛ naakpɛɛ.” (Lala 139:14) Babaoo ni wɔkaseɔ wala he nii lɛ, babaoo ni wɔnaa anɔkwale yɛ nakai wiemɔi lɛ amli ji no. Lɛlɛŋ, adebɔɔ mlai ahe nilelɔ Fred Hoyle ŋma akɛ: “Beni wala yibii amli hewalɛ he nilelɔi naa bɔ ni wala yɔɔ naakpɛɛ kɛ haŋtsii hu lɛ he nii babaoo lɛ, efeɔ faŋŋ akɛ, nyɛ ni eeenyɛ eba akɛ eje shishi kɛtsɔ oshara nɔ lɛ bafeɔ bibioo kwraa, aahu akɛ abaanyɛ awie akɛ ebaŋ mli nakai. Wala nyɛŋ aba kɛtsɔ heniianaa gbɛ nɔ.”

No hewɔ lɛ, mɛni ji wala shishijee? Wolo tɛtrɛɛ nɛɛ mli klɛŋklɛŋ saji enyɔ lɛ haa nakai sanebimɔ lɛ hetoo. Kɛ obaasumɔ ni ole nibii babaoo lolo lɛ, no lɛ ŋmaa wolo kɛya Watch Tower, Box 760, Accra, Ghana, aloo kɛya adrɛs ni atsɔɔ yɛ baafa 2 lɛ mli nɔ ni sa.