Ani Okaiɔ?

Ani ona Buu-Mɔɔ ni akalaa nyɛsɛɛ nɛɛ akɛ amɛhe yɛ sɛɛnamɔ kɛha bo yɛ oshihilɛ mli? Belɛ mɛni hewɔ okɛ sanebimɔi ni nyiɛ sɛɛ nɛɛ ekaaa ojwɛŋmɔ okwɛɛɛ:

▫ Mɛni hewɔ Yehowa Odasefoi yaa nɔ amɛsaraa amɛ akutseiaŋbii lɛ?

Yehowa Odasefoi miisumɔ ni amɛ diɛŋtsɛ lɛ amɛnine ashɛ Nyɔŋmɔ jɔɔmɔ nɔ kɛtsɔ Maŋtsɛyeli ni awo shi yɛ he lɛ nɔ, ni yɛ suɔmɔ ni amɛyɔɔ kɛha amɛ akutseiaŋbii hewɔ lɛ, amɛmiisumɔ ni amɛ hu amɛna nakai jɔɔmɔ lɛ eko. No hewɔ lɛ, yɛ Yesu nɔkwɛmɔ nɔ lɛ sɛɛnyiɛmɔ mli lɛ, suɔmɔ ni pɛsɛmkunya bɛ mli tsirɛɔ amɛ koni amɛyasara amɛ akutseiaŋbii lɛ. (Mateo 6: 9, 10; 22: 37-39) — 8/15, baafai 8, 9.

▫ Mɛni hewɔ he ni aheɔ sutsakemɔ ayeɔ lɛ ji sane ni kɔɔ hemɔkɛyeli he lɛ?

Jeŋ nilelɔi enako kooloi ni miitsake amɛhe — nɔ ni he yɔɔ sɛɛnamɔ po — kɛmiitsɔ wala bɔɔ nii heei, ni kɛlɛ jeŋ nilelɔi kɛɔ akɛ nɛkɛ ji gbɛ ni bɔɔ nii henɔi sɔrɔtoi tsɔ nɔ kɛba. Sutsakemɔ he nilelɔi yeko wala diɛŋtsɛ ni etsake kɛba trukaa lɛ he odase da, ni kɛlɛ amɛmaa nɔ mi akɛ nɛkɛ ji bɔ ni wala fee eje shishi. — 9/1, baafa 5.

▫ Mɛɛ gbɛ nɔ wɔɔtsɔ wɔye nijiaŋwujee ni baanyɛ aba kɛjɛ shihilɛ mli naatsii mli lɛ nɔ kunim yɛ gbɛ ni hi jogbaŋŋ fe fɛɛ nɔ?

Bɔ fɛɛ bɔ ni wɔshihilɛ ji ha lɛ, kɛ wɔkɛ wɔjwɛŋmɔ ma nɔ ni wɔɔnyɛ wɔfee nɔ fe ni wɔɔhao yɛ nɔ ni wɔnyɛŋ wɔfee lɛ he lɛ, shihilɛ baafee nɔ ni haa mɔ tsui nyɔɔ emli babaoo, ni wɔbaana miishɛɛ yɛ Nyɔŋmɔ sɔɔmɔ mli. (Lala 126: 5, 6) — 9/1, baafa 28.

▫ Mɛni ji sane ni akɛkeɔ lɛ mli sɛɛnamɔi komɛi?

Sane ni akɛkeɔ mɛi krokomɛi lɛ kɛ wekukpaa kpakpa baa (Efesobii 4:32); jeee akɛ ekɛ toiŋjɔlɛ baa gbɔmɛi ateŋ kɛkɛ, shi mligbɛ toiŋjɔlɛ hu (Romabii 14:19; Kolosebii 3: 13-15); mɛi krokomɛi ni wɔkɛ sane keɔ amɛ lɛ haa anyɛɔ akɛ wɔhe eshai keɔ wɔ (Mateo 6:14); agbɛnɛ hu, eyeɔ ebuaa wɔ koni wɔkai akɛ eshai ni akɛkeɔ lɛ he miihia wɔ diɛŋtsɛ hu. (Romabii 3:23 — 9/15, baafa 7.

▫ Gbalɔ Amos nɔkwɛmɔ nɔ lɛ yeɔ ebuaa wɔ yɛ wɔshiɛmɔ nitsumɔ lɛ mli yɛ mɛɛ gbɛ nɔ?

Taakɛ Amos ji lɛ, wɔtsakeee Nyɔŋmɔ shɛɛ sane lɛ ni wɔbaaa lɛ shi hu. Shi moŋ, wɔkɛ toiboo jajeɔ wɔtsɔɔ ni bɔ ni wɔ toibolɔi lɛ feɔ amɛnii yɛ he lɛ kɔɔɔ he eko. — 9/15, baafa 17.

▫ Mɛɛ Nyɔŋmɔ sui esa akɛ wɔkase?

Enyɔ ni jeɔ kpo waa ji Yehowa nyɛmɔ yɛ gbɛjianɔtoo mli lɛ kɛ emiishɛɛ. (1 Korintobii 14:33; 1 Timoteo 1:11) Nyɔŋmɔ sui nɛɛ ŋmɛɔ pɛpɛɛpɛ, no hewɔ lɛ awooo ekome nɔ ni akɛha ekroko nɔ. — 10/1, baafa 10.

▫ Mɛni gbɛi kpakpai komɛi ni fɔlɔi etsɔ nɔ koni amɛkɛye amɛbua amɛbii ni amɛsɔmɔ Yehowa?

Nɔ ni he hiaa titri ji shishijee mra. Nibii ni anaa kɛ nii ni akaseɔ yɛ shishijee afii lɛ amli lɛ hiɔ shi wala be fɛɛ mli. (Abɛi 22: 6) Ehe miihia waa ni atsɔɔ amɛ toiboo kɛ bulɛ kɛha Yehowa kɛ ejamɔ yɛ kpeei fɛɛ shishi. Fɔlɔi ni amɛye omanye lɛ yɔseɔ sui gbohii, ni amɛyeɔ amɛbuaa amɛbii lɛ koni amɛjaje enɛɛmɛi. (Abɛi 22:15) Yɛ naagbee lɛ, jee shishi mra ni okɛ teokrase otii ni obi lɛ baanyɛ atsu he nii amamɔ shi oha lɛ. — 10/1, baafai 27-8.

▫ Mɛɛ Yehowa eshaifaa su ko ni yɔɔ sɔrɔto kwraa esa akɛ wɔbɔ mɔdɛŋ ni wɔkɛtsu nii?

Yehowa kɛkeɔ ni ehiɛ kpaa nɔ hu. (Yeremia 31:34) Enɛ wa kɛha adesa bɔɔ nii lɛ akɛ amɛaafee. Yesu ma bɔ ni enɛ feemɔ he hiaa ha lɛ nɔ mi, taakɛ aŋma afɔ shi yɛ Mateo 6: 14, 15 lɛ. — 10/15, baafai 25-6.

▫ Mɛni ji “Nyɔŋmɔ hejɔlɛ ni fe jwɛŋmɔi fɛɛ” lɛ? (Filipibii 4: 7)

Enɛ ji kpoofeemɔ mli hejɔlɛ ko ni baa kɛjɛɔ mɔ kɛ Yehowa teŋ wekukpaa ni bɛŋkɛ kpaakpa mli. Nɛkɛ ekomefeemɔ ni bɛŋkɛ kpaakpa nɛɛ haa wɔnaa hekɛnɔfɔɔ akɛ, bɔ fɛɛ bɔ ni wɔhaomɔi sɔrɔtoi lɛ ji ha lɛ, ‘ekwaŋ wɔ.’ (Lala 94:14) — 10/15, baafa 32.

▫ Mɛni ji gbɛtsii nii etɛ ni haaa wɔtsɔmɔ mɛi ni naa mɔbɔ lɛ?

Yɛ wɔ eshafeemɔ su hewɔ lɛ, hetsɛ̃ henumɔi baanyɛ ahe shi yɛ wɔmli. Te wɔɔfee tɛŋŋ wɔna mɔ ni wɔnyɛɔ lɛ lɛ mɔbɔ? Awuiyeli nibii ni anaa bɔ ni esaaa lɛ hu ji gbɛtsii nii kroko. Enɛ haaa wɔnu mɛi krokomɛi apiŋmɔ he. Kɛfata he lɛ, mɔ ni ji hesuɔlɔ lɛ baanyɛ afee mɔ ni bɛ mɔbɔnalɛ. (1 Yohane 3:17) — 11/1, baafa 20.

▫ Mɛni nibii abaanyɛ akase kɛjɛ Ŋmalɛ mli saji ni kɔɔ Hiob he lɛ mli?

Hiob he sane lɛ haa wɔhiɛ hiɔ Satan ŋaatsɔɔi lɛ anɔ babaoo ni eyeɔ ebuaa koni wɔna bɔ ni je muu fɛɛ maŋtsɛ ni Yehowa ji lɛ kɔɔ emuuyeli mli ni gbɔmɔ aaahiɛ lɛ he ehaa. Taakɛ Hiob ji lɛ, esa akɛ aka mɛi fɛɛ ni sumɔɔ Nyɔŋmɔ lɛ. Wɔ hu wɔbaanyɛ wɔŋmɛ wɔtsui shi taakɛ Hiob fee lɛ, ni wɔha ana Satan akɛ amalelɔ, ni wɔnine ashɛ Nyɔŋmɔ Maŋtsɛyeli lɛ mli jɔɔmɔi anɔ. — 11/15, baafa 20.

▫ Mɛɛ gbɛ nɔ onukpai akuu lɛ sɛinɔtalɔ lɛ aaatsɔ ajie bulɛ ni sa kpo atsɔɔ onukpai lɛ ateŋ mɔ fɛɛ mɔ?

Be fɛɛ be ni efeemɔ aaahi lɛ, esa akɛ sɛinɔtalɔ lɛ atsɔ hiɛ ekɛ saji ni abaasusu he lɛ aha yɛ be ni fa mli, koni onukpai krokomɛi lɛ ana be ni amɛkɛ sɔlemɔ asusu saji lɛ eko fɛɛ eko he jogbaŋŋ. Ebɔŋ mɔdɛŋ hu akɛ eeekudɔ onukpai lɛ ajwɛŋmɔ yɛ onukpai akpee lɛ shishi, shi moŋ ewo amɛ hewalɛ ni amɛkɛ “wiemɔ mli heyeli” atsu nii yɛ saji ni asusuɔ he lɛ mli. (1 Timoteo 3: 13, NW) — 12/1, baafa 30.