“Minako Nɔ ko ni Tamɔ Nɛkɛ Dã!”

YƐ 1993 mli lɛ, afɔ̃ Buu Mɔɔ Asafo lɛ nitsumɔ he nine ni yɔɔ Argentina lɛ nine akɛ amɛwo kpeeyalɔi akpe gbɛ kɛba Santiago, yɛ Chile, kɛha gbii ejwɛ “Ŋwɛi Nitsɔɔmɔ” Kpokpaa Wulu nɔ Kpee ni Yehowa Odasefoi baafee lɛ. Enɛ ji klɛŋklɛŋ kwraa ni afɔ̃ɔ Argentina Odasefoi nine akɛ amɛfa gbɛ akɛ kuu ni da, kɛya kpee wulu ko shishi yɛ maŋsɛɛ.a Te ahere enɛ nɔ aha tɛŋŋ? Mɛi ni fa fe 8,500 ŋmala gbɛbimɔ woji kɛba akɛ amɛbaaya eko, ni ajɛ mli ahala mɛi 1,039 kɛtee kpee lɛ.

Ahai bɔs sɔrɔtoi 14 sɔŋŋ kɛha nɛkɛ gbɛfaa ni jekɛmɔ feɔ kilomitai 1,400 nɛɛ, kɛjɛ Buenos Aires kɛtee Santiago. Fɛo nibii ni ana yɛ nɛkɛ ŋmɛlɛtswai 26 gbɛfaa nɛɛ mli lɛ ha efee miishɛɛ waa. Beni amɛtsɔɔ Andes Gɔji lɛ anɔ lɛ, kpeeyalɔi lɛ yatsɔ Aconcagua gɔŋ lɛ, ni ekwɔlɛ ji ninetalɔi 22,834, ni ji gɔŋ ni kwɔ fe fɛɛ yɛ shikpɔŋ lɛ Anaigbɛ Fã lɛ, masɛi kpaakpa. Nɔ ni amɛkaiɔ jogbaŋŋ ji bɔ ni gbɛ lɛ kpelekeɔ shi vii, ni elɔgɔɔ shi hu aahu kɛyaboteɔ Chile lɛ. Atswa dɛ̃ waa aha bɔs kudɔlɔi lɛ yɛ bɔ ni amɛkɛ hesaa kudɔ tsɔnei lɛ kɛtsɔ gbɛjegbɛ ni nɔ nyiɛmɔ wa nɛɛ nɔ lɛ hewɔ!

Shi, abaana nii ni yɔɔ fɛo fe fɛɛ lɛ yɛ kpee lɛ shishi diɛŋtsɛ. Yɛ jeŋ ni maŋ tai kɛ hewolonɔ sui ateŋ bei babaoo yɔɔ mli nɛɛ mli lɛ, kwɛ bɔ ni eyɔɔ miishɛɛ waa akɛ aaana mɛi babaoo ni efee ekome, ni amɛyifalɛ shɛɔ 80,000, ni jɛ maji 24 nɔ kɛba kpee lɛ shishi—eji majimaji ateŋ nyɛmifeemɔ lɛlɛŋ! Bɔ ni amɛ diɛŋtsɛ amɛna ekomefeemɔ ni yɔɔ kpeeyalɔi lɛ ateŋ lɛ ha bɔs kudɔlɔi lɛ ateŋ mɛi komɛi bi akɛ amɛmiisumɔ ni amɛle Yehowa Odasefoi ahe saji babaoo. Amɛteŋ mɔ kome kɛɛ akɛ: “Minako nɔ ko ni tamɔ nɛkɛ dã!”

[Shishigbɛ niŋmai]