Maŋtsɛyeli Jajelɔi Bɔ Amaniɛ
“Amɛfɔ̃ɔɔ”
KƐJƐ Yesu Kristo kɛ ebɔfoi lɛ agbii lɛ amli kɛbaa nɛɛ fɛɛ lɛ, jamɔ mli hiɛnyiɛlɔi etsɔ gbɛi sɔrɔtoi fɛɛ ni amɛaanyɛ nɔ, yɛ mɔdɛŋ ni amɛbɔɔ ni amɛtsĩ Nyɔŋmɔ Maŋtsɛyeli lɛ he sanekpakpa lɛ shiɛmɔ naa lɛ mli. Maŋ nɔyelɔi ni yɔɔ Yerusalem lɛ ‘wo bɔfoi lɛ kita’ dikadika shii abɔ akɛ “amɛkawie yɛ Yesu gbɛi lɛ anɔ.” (Bɔfoi lɛ Asaji 5:27, 28, 40) Shi kɛlɛ, Biblia lɛ mli sane lɛ kɛɔ akɛ “Nyɔŋmɔ wiemɔ lɛ shwere, ni kaselɔi lɛ ayi bafa babaoo diɛŋtsɛ yɛ Yerusalem.”—Bɔfoi lɛ Asaji 6:7.
Afii akpei enyɔ sɛɛ lɛ, wɔnaa jamɔ mli hiɛnyiɛlɔi lolo yɛ Israel, ni woɔ maŋ nɔyelɔi lɛ ayiŋ koni amɛtsĩ anɔkwa Kristofoi anitsumɔ naa yɛ nakai maŋ lɛ mli. Yɛ nɔnyɛɛ ni jamɔ mli shɛii-feelɔi kɛba amɛnɔ lɛ hewɔ lɛ, yɛ November 1987 mli lɛ, maŋ nɔyelɔi ni yɔɔ Tel Aviv, Israel lɛ, fã akɛ Odasefoi akpa Kristofoi akpeei feemɔ yɛ Maŋtsɛyeli Asa ni yɔɔ Buu Mɔɔ Asafo lɛ nitsumɔ he nine lɛ mli. Mla ni akɛtsu famɔ nɛɛ he nii lɛ bɔi nitsumɔ yɛ October 1989 mli. Yɛ famɔ lɛ toiboo mli lɛ, Odasefoi lɛ kpe yɛ tsu ko ni amɛhai mli yɛ akutso lɛ mli nɔŋŋ afii etɛ sɔŋŋ yɛ be mli ni amɛkɛ amɛ Maŋtsɛyeli Asa lɛ tsuuu nii lɛ.
Yɛ nakai beaŋ lɛ, akɛ sane lɛ yafɔ̃ kojomɔ he ni ji Israeli High Court of Justice lɛ hiɛ. Maŋ mla he nitsulɔ lɛ nitsumɔ he lɛ kwɛ naajiemɔ ni Odasefoi lɛ kɛha lɛ mli jogbaŋŋ ni amɛwie akɛ anyɛŋ ate shi awo amɛ nibimɔ akɛ akwɛ sane lɛ mli ekoŋŋ lɛ, yɛ jamɔ mli jwɛŋmɔ fɔŋ ni ayɔɔ yɛ amɛhe ni anaa faŋŋ yɛ sane lɛ mli lɛ hewɔ. Enɛ hewɔ lɛ, maŋ nɔyelɔi lɛ bɛ nɔ kroko ni amɛaafee, fe akɛ amɛtsake amɛ yiŋkpɛɛ lɛ, ni Yehowa Odasefoi kɛ miishɛɛ ku amɛsɛɛ kɛtee amɛ Maŋtsɛyeli Asa lɛ nɔ ekoŋŋ.
Ani nitsumɔ ni ji Biblia mli anɔkwalei ashiɛmɔ lɛ ba shi yɛ nakai afii lɛ amli? Dabi kwraa! Be mli ni afã akɛ aŋa Maŋtsɛyeli Asa lɛ, no mli lɛ asafoi enyɔ yɔɔ Tel Aviv, kɛ Biblia kasemɔ kuu ko hu ni hiɛ ehe yɛ Lod maŋ ni bɛŋkɛ jɛmɛ lɛ mli. Afii etɛ sɛɛ beni agbele Maŋtsɛyeli Asa lɛ ekoŋŋ lɛ, no mli lɛ Yehowa Odasefoi ayifalɛ eku ebɔ he kɛyashɛ asafoi ejwɛ, ni Biblia kasemɔ kuu hee ko kpeɔ yɛ Beersheba.
Shweremɔ ni eba yɛ Israel lɛ baaa yɛ wiemɔi titri ni awieɔ, ni ji Arabik kɛ Hebri lɛ pɛ gbɛfaŋ. Mɛi babaoo diɛŋtsɛ efa gbɛ kɛjɛ tsutsu Soviet Union kɛbahi maŋ lɛ mli, no hewɔ lɛ amrɔ nɛɛ Yehowa Odasefoi ni wieɔ Russia wiemɔ lɛ kɛ amɛ miigba sanekpakpa lɛ he sane kɛ amɛdeka fɛɛ. Afeɔ kpeei komɛi yɛ Russia wiemɔ mli yɛ asafoi etɛ mli; mɛi fe oha ba kpee ko ni afee nyɛsɛɛ nɛɛ yɛ Russia wiemɔ mli lɛ shishi.
Ŋwanejee ko bɛ he akɛ, jamɔ mli hiɛnyiɛlɔi ni hiɛ jwɛŋmɔ fɔŋ lɛ baaya nɔ yɛ ta ni amɛfã amɛshi anɔkwa jamɔ lɛ mli. Shi Maŋtsɛyeli jajelɔi yaa nɔ amɛkaseɔ klɛŋklɛŋ afii oha lɛ mli Kristofoi lɛ, mɛi ni, yɛ shitee-kɛ-woo fɛɛ sɛɛ lɛ, “amɛfɔ̃ɔɔ nitsɔɔmɔ kɛ Yesu Kristo shiɛmɔ” lɛ.—Bɔfoi lɛ Asaji 5:42.