Beni “Kɔɔyɔɔ Fɛɛ Kɔɔyɔɔ ni Tswaa lɛ Jeee Kɔɔyɔɔ Kpakpa”

“KƐ MƆ ko leee lɛji adaamɔ he pɔtɛɛ ni eyaakpeleke yɛ lɛ, no lɛ kɔɔyɔɔ fɛɛ kɔɔyɔɔ ni tswaa lɛ jeee kɔɔyɔɔ kpakpa.” Nɛkɛ wiemɔi, ni akɛɛ klɛŋklɛŋ afii oha lɛ mli Roma jeŋ nilelɔ Lucius Annaeus Seneca wie nɛɛ, yeɔ anɔkwale ko ni ayoo be babaoo nɛ lɛ he odase: Kɛji yiŋtoo baahi shihilɛ sɛɛ lɛ, no lɛ otii ahe miihia.

Shi, bei pii lɛ, shihilɛ lɛ feɔ nɔ ni yiŋtoo ko bɛ sɛɛ. Mɛi pii amii shɛɔ amɛhe akɛ amɛaatsi amɛhe kɛaajɛ daa gbi shihilɛ mli tɛi kɛ nui ni tsɔmɔɔ lɛ ahe. Akɛni amɛbɛ he ko pɔtɛɛ ni amɛyaakpeleke yɛ hewɔ lɛ, amɛbafeɔ tamɔ ŋshɔkei ni “kɔɔyɔɔ tswaa amɛ kɛyaa hiɛ yɛ be ko mli kɛkɛ lɛ ekɛ amɛ eku sɛɛ ekoŋŋ yɛ be kroko mli.” (Yakobo 1:6, “Phillips”) Kɛha gbɔmɛi ni tamɔ nɛkɛ lɛ, “kɔɔyɔɔ fɛɛ kɔɔyɔɔ ni tswaa lɛ jeee kɔɔyɔɔ kpakpa.”

Biblia lɛ kɛ mɛi ni kɛ otii mamɔ amɛhiɛ, ni amɛfeɔ mɛi ni sa akɛ Kristofoi akase amɛ ŋmɛnɛ lɛ ahe nɔkwɛmɔ nii haa wɔ. Mose ‘kwɛ nyɔmɔwoo lɛ jogbaŋŋ.’ (Hebribii 11:26) Paulo ŋma akɛ: “Miijo foi trɔmɔɔ kɛmiiya oti lɛ he bɔni afee ni minine ashɛ juromɔ nɔ lɛ nɔ.” Ewo enanemɛi heyelilɔi hewalɛ ni “amɛna nɛkɛ su nɛɛ nɔŋŋ eko.”—Filipibii 3:14, 15, “Today’s English Version.”

Beni wɔyaa nɔ wɔkwɛɔ Biblia mli shiwooi daa lɛ, eba akɛ wɔɔkase nɛkɛ hii ni kɛ otii mamɔ amɛhiɛ nɛɛ ahemɔkɛyeli lɛ.—Okɛto Hebribii 13:7 he.