Irina Lala Wolo ni Esumɔɔ Fe Fɛɛ

ETSƐKO tsɔ ni abaptisi Irina, ni ji gbekɛ yoo ni eye afii nɛɛhu, ni jɛ Sofia, yɛ Bulgaria lɛ akɛ Yehowa Odasefoi ateŋ mɔ kome. Esumɔɔ lala waa, ni enaa lalai ni yɔɔ Sing Praises to Jehovah lala wolo lɛ mli lɛ ahe miishɛɛ titri. No hewɔ lɛ Irina kɛfee oti ni ma ehiɛ akɛ daa nyɔŋ nɔ lɛ, ebaakase lalai lɛ fioo komɛi ewo eyitsoŋ.

Nibii ni Irina sumɔɔ kasemɔ waa yɛ skul lɛ ekome ji lala. No hewɔ lɛ etsɔɔlɔ ni tsɔɔ lɛ lala lɛ hao waa beni Irina kpoo hegbɛ ni eha lɛ akɛ efata skul lalɔi akuu lɛ he lɛ. Mɛni hewɔ ni Irina ekpɛlɛɛɛ lɛ? Eyoo akɛ lalai ni abaabi ni ela lɛ babaoo woɔ maŋbii ni ehe gbɛi kɛ gbijuji komɛi ni shishijee jɛ wɔŋjamɔ mli lɛ ahiɛ nyam. Lalai lɛ ekomɛi po woɔ atuatsemɔ kɛ yiwalɛ nifeemɔi ahe hewalɛ koni eha maŋ nifeemɔi aya hiɛ. Tsɔɔlɔ lɛ nuuu Irina shidaamɔ ni ekɔ yɛ sane nɛɛ he lɛ shishi. Irina susu he akɛ ebaaŋma etsɔɔlɔ lɛ wolo ni ekɛtsɔɔ ejamɔ mli hemɔkɛyelii lɛ amli babaoo—shi no hu yeee omanye.

Kɛkɛ ni Irina tsɛ susu nɔ ko he. Eyaha tsɔɔlɔ lɛ Sing Praises to Jehovah lala wolo, ni lalai ni Irina sumɔɔ lamɔ lɛ yɔɔ mli lɛ ekome. Gbii fioo sɛɛ lɛ, tsɔɔlɔ lɛ tsɛ Irina kɛtee tsu ni amɛkaseɔ lala yɛ lɛ mli. Ekɛɛ Irina akɛ ela lalai ni esumɔɔ waa yɛ lala wolo lɛ mli lɛ ekomɛi—yɛ eklasbii lɛ ahiɛ—ni lɛ tsɔɔlɔ lɛ baatswa saŋku kɛfata he eha lɛ beni elaa lɛ. Elala lɛ tee nɔ aahu fe ŋmɛlɛtswaa kome! Yɛ naagbee lɛ, tsɔɔlɔ lɛ kpɛlɛ nɔ akɛ lalai ni yɔɔ lala wolo ni Irina sumɔɔ waa lɛ mli lɛ ŋɔɔ waa diɛŋtsɛ.