Tsutsu Kojolɔ Kpa Fai—Yɛ Afii 45 Sɛɛ

YƐ KOJOMƆ he ko yɛ Berlin, yɛ August 1995 mli lɛ, tsutsu Kojomɔ He Wulu Fe Fɛɛ nɔ kojolɔ ko kɛɛ Yehowa Odasefonyo ko bɔ ni efɔŋ ni efee afii 45 ni eho nɛ lɛ edɔ lɛ waa eha.

Yɛ October 1950 lɛ, German Democratic Republic (GDR) Kojomɔ He Wulu Fe Fɛɛ lɛ bu Yehowa Odasefoi nɛɛhu fɔ akɛ maŋ shitee-kɛ-wolɔi kɛ maŋ-shikpalɔi ji amɛ. Awo mɛi enyɔ tsuŋ amɛwala be fɛɛ, ni aha mɛi krokomɛi kpawo ni eshwɛ—ni Lothar Hörnig ni eye afii 22, ni ji mɛi ni asãmã amɛ nɛɛ ateŋ mɔ ni ji ejwɛ kɛjɛ ninejurɔ gbɛ yɛ mfoniri lɛ mli lɛ fata he lɛ—tsuŋwoo kakadaŋŋ.

Afii nyɔŋmai ejwɛ sɛɛ lɛ, GDR batsɔ Federal Republic of Germany fã. Kɛjɛ nakai beaŋ kɛbaa nɛɛ aha onukpai ekwɛ toi-kɔ̃dɔ̃mɔ̃ saji komɛi ni aye yɛ tsutsu GDR lɛ mli, ni amɛbɔ mɔdɛŋ akɛ amɛkɛ mɛi ni fee nakai lɛ aaaye yɛ mla naa. Toi-kɔ̃dɔ̃mɔ̃ saji nɛɛ ekome ji Odasefoi asane ni Kojomɔ He Wulu Fe Fɛɛ lɛ ye yɛ 1950 mli lɛ.

A. T., ni amrɔ nɛɛ eye afii 80 lɛ, ji kojolɔi etɛ ni kojo sane lɛ beni akɛ Odasefoi nɛɛhu lɛ ba koni akojo amɛ lɛ ateŋ mɔ kome. Amrɔ nɛɛ afolɔ enaa akɛ etsɔ̃ jalɛsaneyeli hiɛ ebu shi, ni akɛ lɛ eba Kpokpaa Nɔ Kojomɔ He ni yɔɔ Berlin lɛ ni ebatsɔɔ ekojomɔ lɛ shishi.

Tsutsu kojolɔ nɛɛ wie yɛ nɔ ni ekɛɛ kojomɔ he lɛ mli akɛ efĩ sɛɛ akɛ abu amɛ fɔ, afii 45 ni eho nɛ moŋ, shi kɛlɛ esumɔɔɔ ni amɛ tsuŋwoo lɛ afa babaoo tamɔ bɔ ni aha amɛ lɛ. Shi kojomɔ ni akojo lɛ nyɛsɛɛ nɛɛ ha esusu eyiŋ ekoŋŋ. Mɛni hewɔ? Nazibii wa Yehowa Odasefoi ayi yɛ jeŋ ta ni ji enyɔ lɛ mli yɛ Hitler sɛɛ ni amɛfiii hewɔ. Yɛ ta lɛ sɛɛ lɛ, Komunist nɔyeli lɛ hu saa ewa Odasefoi lɛ ayi ekoŋŋ. Sane nɛɛ “gba” kojolɔ lɛ “naa waa.”

Lothar Hörnig kɛɛ kojomɔ he lɛ akɛ eye afii enumɔ kɛ fã yɛ he ko banee yɛ tsuŋwoo he lɛ, ni ajieee lɛ yɛ Brandenburg tsuŋwoo he lɛ aahu kɛbashi 1959. Beni tsutsu kojolɔ nɛɛ nu Hörnig wiemɔi nɛɛ pɛ kɛkɛ ni ebɔi yaafo. Ekɛ yikɔmɔ wie akɛ: “Edɔ mi waa diɛŋtsɛ. Ofainɛ okɛ mihe ake mi.” Hörnig kpɛlɛ faikpamɔ lɛ nɔ.—Okɛto Luka 23:34 he.

[He ni Mfoniri ni yɔɔ baafa 32 lɛ Jɛ]

Neue Berliner Illustrierte