“Yehowa Bò Misɔlemɔi Atoi!”

YEHOWA ODASEFOI kɛ mɛi ni miihe ashɛ akpekpei enumɔ, ni sumɔɔ ni amɛna Nyɔŋmɔ kɛ eyiŋtoi ni yɔɔ naakpɛɛ kɛha adesai lɛ ahe anɔkwa nilee lɛ miifee shia Biblia mli nikasemɔi. Gbekɛbii ni yɔɔ Yehowa Odasefoi ateŋ po miina nitsumɔ nɛɛ mli gbɛfaŋnɔ. Akɛ nɔkwɛmɔ nɔ lɛ, susumɔ gbekɛ nuu ko ni atsɛɔ lɛ Joel lɛ he. Efee ehe nɔ ni ejɔɔ kɛha Yehowa lɛ he okadi ni abaptisi lɛ beni eye afii nɛɛhu. Afi sɛɛ lɛ, ena niiashikpamɔ nɛɛ:

“Beni mikɛ mihe ewo sɔɔmɔ lɛ mli lɛ, mikɛ yoo ko ni atsɛɔ lɛ Candy kpe. Mikɛ wolo bibioo, ‘Naa! Miifee Nii Fɛɛ Ehee’ lɛ ha lɛ. Shi eyɛ eko momo, no hewɔ lɛ, mikɛ Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo lɛ ha lɛ. Shi eyɛ no hu eko momo. No hewɔ lɛ, misusu akɛ, ‘Mikɛ yoo nɛɛ baaje Biblia kasemɔ shishi.’ Ekpɛlɛ nɔ!

“Candy nyɛmi yoo ni kansa hela miigbe lɛ lɛ ebahi emasɛi. Kɛfata he lɛ, Candy miikase nii ni ebatsɔ helatsɛmɛi akwɛlɔ. No hewɔ lɛ, akpa Biblia lɛ kasemɔ yɛ be kpalaŋŋ mli. Shi mikɛ mifɔlɔi kɛ lɛ ye sharamɔ kɛtsɔ woji tɛtrɛbii ni wɔshiɔ wɔhaa lɛ loo ewu, Dick lɛ nɔ. Ewu lɛ kɛɛ wɔ akɛ, eŋa lɛ kɛ woji tɛtrɛbii lɛ shwieɔ esaatso masɛi ni ekaneɔ amɛ gbɛkɛ.

“Yɛ naagbee lɛ Candy nyɛmi yoo lɛ gbo. Mi-Tsɛ kɛ mi-Nyɛ kɛ Candy wie shihilɛ mli ni gbohii lɛ yɔɔ lɛ he. Ekpɛ eyiŋ akɛ ebaaje Biblia lɛ ni ekaseɔ lɛ shishi. Wɔbi Dick yɛ gbi kroko nɔ kɛ ebaasumɔ ni efata Candy he kɛkase nii ni no afee weku nikasemɔ. Esusu he ni ekɛɛ eji jwɛŋmɔ kpakpa. No hewɔ lɛ, mikɛ mi-Tsɛ kɛ Dick kɛ Candy fɛɛ miikase nii. Amɛmiiya amɛhiɛ jogbaŋŋ ni amɛjieɔ hiɛsɔɔ kpo yɛ Biblia lɛ ni amɛkaseɔ lɛ he.

“Misɔleɔ mibiɔ ni mana Biblia mli nikasemɔ, ni Yehowa ha misɔlemɔi lɛ ahetoo!”