“Wɔ Fɛɛ Wɔjɛ Weku Kome Mli”
JAMƆ mli hetsɛ kɛ hewolonɔ sui amligbalamɔ egbɛ eshwã shikpɔŋ lɛ nɔ fɛɛ yɛ nyɛsɛɛ afii nɛɛ amli. Wiemɔ kui ateŋ béi etee gbɔmɔgbeei, yiwalɛ niseniianifeemɔi, kɛ nibii fɔji krokomɛi ni yɔɔ hiɛgbele shi. Taakɛ Majimaji Ateŋ Gbɛjianɔtoo Kɛha Tɔmɔ Kɛfaa lɛ amaniɛbɔɔ ko tsɔɔ lɛ, adesa hegbɛi amlikuu nyɛ gbɔmɛi ni fa fe akpekpei 23 anɔ yɛ jeŋ fɛɛ ni amɛjo foi kɛshi amɛshiai yɛ 1994 mli.
Yɛ Rwanda pɛ lɛ, agbe mɛi aaashɛ 500,000 ni mɛi krokomɛi ni fa fe 2,000,000 tsɔmɔ abobalɔi yɛ basabasa feemɔ ni te shi yɛ Tutsibii kɛ Hutubii ateŋ lɛ sɛɛ. “Yehowa Odasefoi ji mɛi ni aje gbɛ awa amɛ yi waa titri, yɛ tawuu nii ni amɛkpɛlɛɛɛ ni amɛkɔlɔ lɛ hewɔ” taakɛ Belgium adafitswaa wolo Le Soir bɔ amaniɛ lɛ. Yehowa Odasefoi kɛ amɛhe wooo tawuu mli. Shi kɛlɛ, agbe amɛteŋ mɛi ohai abɔ yɛ basabasa feemɔ lɛ mli. Enɛ haa wɔkaiɔ Yesu wiemɔi ni ekɛ ekaselɔi lɛ wie lɛ, akɛ: “Akɛni nyɛjɛɛɛ je lɛŋ . . . lɛ, no hewɔ je lɛ nyɛɔ nyɛ lɛ.”—Yohane 15:19.
Odasefoi aweku ko—Eugène Ntabana, kɛ eŋa, kɛ ebii enyɔ—hi maŋtiase lɛ, ni ji Kigali mli. Kɛ eetsɔɔ Kristofoi ahe ni amɛkɛwooo maŋ saji amli lɛ mli eeha ekutsoŋbii lɛ, bei pii lɛ, Eugène wieɔ fɔfɔi ko ni atsɛɔ lɛ bougainvillea, ni nyɛɔ ekwɔɔ tsu loo gbogbo, ni kwɛ̃ɔ jogbaŋŋ yɛ hulutsoo shikpɔji anɔ lɛ he.—Mateo 22:21.
Eugène tsɔɔ mli akɛ: “Biɛ yɛ Kigali lɛ, bougainvillea nɛɛ gbaa afofro tsuru kɔɔ, etsuru ni mli yɛɔ fioo, kɛ bei komɛi lɛ, eyɛŋ. Shi kɛlɛ, amɛ fɛɛ amɛjɛ fɔfɔii aweku kome lɛ nɔŋŋ mli. Nakai nɔŋŋ eji yɛ adesai hu agbɛfaŋ. Eyɛ mli akɛ wɔjɛ adesai awekui sɔrɔtoi amli, kɛ hewolonɔ sui sɔrɔtoi, aloo wiemɔ kui sɔrɔtoi amli moŋ, shi wɔ fɛɛ wɔjɛ weku kome mli, adesai aweku lɛ.”
Dɔlɛ sane ji akɛ, yɛ amɛ toiŋjɔlɛ su kɛ amɛhe ni amɛkɛwooo ta lɛ mli lɛ fɛɛ sɛɛ lɛ, basabasa feelɔi akuu ko ni lá he kumai miiye amɛ, gbe Ntabana weku lɛ. Shi kɛlɛ, amɛgboi akɛ anɔkwafoi. Wɔbaanyɛ wɔna nɔmimaa akɛ Yehowa Nyɔŋmɔ baaha shi ni ewo nɛkɛ gbɔmɛi nɛɛ aba mli, ni abaatee amɛ shi kɛba jeŋ ni mɛi ahe jwɛŋmɔ fɔŋ namɔ bɛ mli dɔŋŋ mli. (Bɔfoi lɛ Asaji 24:15) Nakai beaŋ lɛ, Ntabana weku lɛ, kɛ mɛi krokomɛi fɛɛ “[amii] aaashɛ amɛhe yɛ hejɔlɛ babaoo mli.”—Lala 37:11.