Kɛ́ Adebɔɔ Mli Osharai Ba

Accra, Ghana, July 4, 1995: Nugbɔnɛmɔ wulu ni fe fɛɛ yɛ nɔ ni miihe ashɛ afii 60 mli lɛ kɛ nu afua babaoo ba. Mɛi aaashɛ 200,000 laaje amɛ nɔ fɛɛ nɔ, mɛi 500,000 nyɛɛɛ aya amɛshiai amli, ni mɛi 22 gboi.

San Angelo, Texas, U.S.A., May 28, 1995: Ahum ni naa wa kɛ nyɔŋmɔŋtɛi fite maŋtiase ni mɛi 90,000 yɔɔ mli nɛɛ, ni efite nii ni naa shɛɔ (U.S.) dɔlai akpekpei 120.

Kobe, Japan, January 17, 1995: Shikpɔŋhosomɔ ko ni sɛɛtsɛlɛ fee hiŋmɛitswai 20 pɛ lɛ gbe gbɔmɛi akpei abɔ, gbɔmɛi akpei nyɔŋmai abɔ pila, ni akpei ohai abɔ ashiai kumɔ.

WƆYƐ nɔ ni abaanyɛ atsɛ lɛ akɛ osharai ayinɔ mli. Jeŋmaji Ekomefeemɔ lɛ amaniɛbɔɔ ko haa aleɔ akɛ yɛ afii 30 ni ho kɛjɛ 1963-92 mli lɛ, kɛ aja mli lɛ, gbɔmɛi abɔ ni osharai gbe amɛ, loo eye amɛ awui, loo efite amɛshihilɛ hei lɛ ayifalɛ tee hiɛ oha mlijaa 6 daa afi. Awerɛho shihilɛ lɛ ha Jeŋmaji Ekomefeemɔ lɛ tsɛ 1990 afii lɛ akɛ “Majimaji Ateŋ Afii Nyɔŋma Kɛha Adebɔɔ Mli Osharai ni Aaaba lɛ Shi.”

Yɛ anɔkwale mli lɛ, jeee be fɛɛ be adebɔɔ mli hewalɛ—tamɔ ahum, gɔŋ ni fɛ̃ɔ la, loo shikpɔŋhosomɔ—kɛ oshara baa. Ohai abɔ baa daa afi ni amɛyeee adesai awui ko. Shi kɛji ekpata mɛi awala kɛ nibii babaoo hiɛ lɛ, atsɛɔ lɛ yɛ gbɛ ni ja nɔ akɛ oshara.

Etamɔ nɔ ni anyɛŋ atsĩ adebɔɔ mli osharai ni yaa nɔ efaa babaoo lɛ anaa. Wolo ko ni atsɛɔ lɛ Natural Disasters—Acts of God or Acts of Man? lɛ wieɔ akɛ: “Gbɔmɛi miitsake bɔ ni nibii ni ebɔle amɛshihilɛ hei lɛ yɔɔ lɛ, amɛmiifee lɛ hei ni osharai baanyɛ aba yɛ, ni amɛmiifee amɛnii bɔ ni nakai osharai lɛ baanyɛ aye amɛ awui.” Wolo lɛ ka ehiɛ ekɛ nɔkwɛmɔ nɔ ko hã akɛ: “Shikpɔŋhosomɔ ko ni naa waaa tsɔ, ni baaba yɛ shihilɛ he ni ehiii, he ni amamɔ̃ sũ tsũi wuji yɛ jɔɔ voo ko masɛi lɛ, baafee oshara diɛŋtsɛ yɛ adesai agbelei kɛ piŋmɔ gbɛfaŋ. Shi ani oshara lɛ jɛ shikpɔŋhosomɔi lɛ titri, aloo ejɛ anɔkwale ni eji akɛ gbɔmɛi yɛ shiai ni yɔɔ oshara mli, yɛ hei ni yɔɔ oshara tamɔ nɛkɛ lɛ hewɔ?”

Yɛ Biblia kaselɔi agbɛfaŋ lɛ, yiŋtoo kroko hu yɛ ni no hewɔ ni adebɔɔ mli osharai ni efa lɛ efeee amɛ naakpɛɛ lɛ. Aaafee afii 2,000 ni eho nɛ lɛ, Yesu Kristo gba efɔ̃ shi akɛ nibii ni baakadi “nibii agbɛjianɔtoo lɛ naagbee lɛ,” kɛfata nibii krokomɛi ahe ji, “hɔmɔ kɛ shikpɔŋhosomɔi ni baaba yɛ hei sɔrɔtoi.” (Mateo 24:3, 6-8, NW) Biblia lɛ gba efɔ̃ shi hu akɛ “naagbee gbii lɛ” amli lɛ, gbɔmɛi baatsɔmɔ hesuɔlɔi, shika suɔlɔi, mɛi ni edɔɔɔ mɔ he, kɛ mɛi ni sumɔɔɔ ekpakpa.a (2 Timoteo 3:1-5) Bei pii lɛ, nɛkɛ sui nɛɛ hãa gbɔmɔ feɔ nii ni teɔ shi woɔ nibii ni ebɔle lɛ yɛ eshihilɛ he lɛ, ni ehaa adesai bafeɔ mɛi ni adebɔɔ mli hewalɛi baanyɛ aye amɛ awui waa. Osharai ni adesai kɛbaa lɛ hu jɛɔ adesai ashihilɛ ni suɔmɔ bɛ mli, ni mɛi babaoo yɔɔ mli lɛ mli baa.

Beni gbɔmɛi ayi faa babaoo yɛ wɔ shibɔlemɔ ŋulami lɛ nɔ, beni adesa subaŋ kɛ gbɔmɛi woɔ oshara kpele mli, kɛ agbɛnɛ, beni ayaa nɔ akɛ shikpɔŋ lɛ nɔ nibii tsuɔ nii yɛ gbɛ ni ejaaa nɔ lɛ, osharai baaya nɔ ahao adesai. Yelikɛbuamɔ kɛhamɔ kɛ kaai baa, taakɛ sane ni nyiɛ sɛɛ lɛ baatsɔɔ lɛ.

[Shishigbɛ niŋmaa]

[He ni Mfoniri ni yɔɔ baafa 3 lɛ Jɛ]

Ŋwɛi: Information Services Department, Ghana; ninejurɔ: San Angelo Standard-Times

[He ni Mfoniri ni yɔɔ baafa 2 lɛ Jɛ]

COVER: Maxie Roberts/Courtesy of THE STATE