Ani Fɛɛ Ji Ŋwɛi Kpojiemɔi?

ANI Nyɔŋmɔ mumɔ, ni kanya Biblia Krɔŋkrɔŋ lɛ ŋmaa lɛ nɔŋŋ kanya woji krokomɛi ni mɛi komɛi susuɔ akɛ amɛyɛ krɔŋkrɔŋ lɛ ŋmaa? (2 Timoteo 3:16) Italy Jesuit adafitswaa wolo (La Civiltà Cattolica), ni aŋma “yɛ [Vatican] Maŋnɔkwɛmɔ Gbɛjianɔtoo lɛ nɔkwɛmɔ shishi” lɛ ni yɛ no hewɔ lɛ abuɔ no akɛ ehiɛ hegbɛ ko yɛ Katolikbii ashihilɛi amli lɛ tee sanebimɔ nɛɛ shi.

Jesuit adafitswaa wolo lɛ kɛɛ: “Nyɔŋmɔ tsɔ Mumɔ Krɔŋkrɔŋ lɛ nifeemɔ nɔ egbɛ Wiemɔ lɛ dumɔwui lɛ eshwa woji krɔŋkrɔŋi krokomɛi ni jeee Yudafoi kɛ Kristofoi anɔ̃ lɛ ekomɛi po mli.” Kɛha Jesuit sɔrɔtoi lɛ, aŋmaaa woji “krɔŋkrɔŋi,” tamɔ Zoroastrian Avesta loo Confucian Four Books lɛ “ni Mumɔ Krɔŋkrɔŋ lɛ kanyamɔ pɔtɛɛ ko fataaa he, ni yɛ no hewɔ lɛ, ‘ŋwɛi kpojiemɔ’ fioo ko yɛ mli.”

Shi kɛlɛ, sane lɛ tsɔɔ nɔ ko mli faŋŋ. Ekɛɛ akɛ, “Jeee nɔ fɛɛ nɔ ni yɔɔ nakai woji krɔŋkrɔŋi lɛ amli lɛ ji Nyɔŋmɔ wiemɔ,” ni ekɛfata he akɛ, ekolɛ mɛi ni ŋmala woji nɛɛ “na amanehulu yɛ shihilɛi” ni amɛhi mli “ni nyɔŋmɔi pii ajamɔ yɔɔ jɛmɛ loo jeŋ nilee yɔɔ jɛmɛ lɛ ahewalɛ shishi.” Taakɛ Marco Politi, Vatican saji aŋmalalɔ kɛha Italy adafitswaa wolo La Repubblica lɛ tsɔɔ lɛ, jwɛŋmɔ ni tamɔ nɛkɛ ni ayɔɔ lɛ “gbeleɔ gbɛ koni Katolik Sɔlemɔ lɛ kɛ yinɔsane be mli jamɔi wuji lɛ ateŋ sharamɔ ni tsutsu ko lɛ asusuɔ akɛ enyɛŋ eya nɔ lɛ aya nɔ,” ni ehaa akɛ he woɔ futufutu hemɔkɛyeli sɔlemɔ he kpeei sɔrɔtoi ni tamɔ nɔ ni afee yɛ Assisi yɛ 1986, ni John Paul II lɛ kɛ ekãa tee lɛ shi lɛ amumɔ lɛ mli ekoŋŋ.

Yehowa Nyɔŋmɔ jeee sakasakafeemɔ kɛ yiŋfutumɔ Nyɔŋmɔ. (1 Korintobii 14:33) No hewɔ lɛ wɔnyɛŋ wɔmu sane naa yɛ gbɛ ni ja nɔ akɛ emumɔ krɔŋkrɔŋ, loo enifeemɔ hewalɛ lɛ baakanya woji fɛɛ ni kɛ e-Wiemɔ, ni ji Biblia lɛ kpaaa gbee kɛmɔɔɔ shi lɛ fã ko po ŋmaa. Yɛ nɔ najiaŋ ni Kristofonyo bɔfo Paulo aaawo hewalɛ ni jamɔi ateŋ ekomefeemɔ nifeemɔi aya nɔ yɛ “jamɔŋ kusumii” sɔrɔtoi lɛ ateŋ lɛ, eŋma akɛ “nɔhiɛkamɔ kome . . . , Nuntsɔ kome, hemɔkɛyeli kome, baptisimɔ kome” yɔɔ.—Efesobii 4:4, 5.

Nakai “nɔhiɛkamɔ kome” lɛ damɔ Yesu Kristo mli hemɔkɛyeli ni aaaná nɔ. Biblia lɛ kɛɔ yɛ gbɛ ni ja nɔ akɛ: “Yiwalaheremɔ bɛ mɔ ko mɔ ko mli; ni asaŋ gbɛi kroko hu bɛ ŋwɛi shishi ni aŋɔha gbɔmɛi ni sa akɛ atsɔ nɔ ahere wɔyiwala.” (Bɔfoi lɛ Asaji 4:12) “Wolo krɔŋkrɔŋ” kroko kwraa bɛ ni jieɔ Yesu kpo etsɔɔ akɛ mɔ tuuŋtu ni akɛ lɛ tsuɔ nii yɛ Nyɔŋmɔ yiŋtoi ahe nitsumɔ mli. Kɛ wɔkpɛlɛ Biblia lɛ nɔ akɛ Nyɔŋmɔ Wiemɔ lɛ, no dani ebaanyɛ etsɔɔ wɔ gbɛjianɔ ni suɔmɔ yɔɔ mli ni Yehowa Nyɔŋmɔ eto kɛha yiwalaheremɔ.—Yohane 17:3; 1 Tesalonikabii 2:13.