Anɔkwale ni Kɔɔ Hɛl He

AMANIƐBƆƆ ko ni England Sɔlemɔ lɛ tsɔɔmɔi anitsumɔ he lɛ kɛha lɛ kɛɛ akɛ, yɛ fɛɛ sɛɛ lɛ, hɛl jeee flɔnɔɔ ko ni la tsoɔ yɛ mli; shi moŋ eji he ko ni asusuɔ he kɛkɛ yɛ yitsoŋ, ní nɔ ko nɔ ko bɛ jɛmɛ. Amaniɛbɔɔ lɛ tsɔɔ akɛ, “ayɛ yiŋtoi babaoo hewɔ ni afee tsakemɔ nɛɛ. Shi nɔ ni fata enɛɛmɛi ahe lɛ efee nɔ ni akɛteɔ shi ashiɔ yɛ jeŋba hewɔ, ní jɛɔ Kristofoi ahemɔkɛyeli lɛ mli kɛ esɛɛ fɛɛ, ni teɔ shi woɔ gbeyeishemɔ jamɔ lɛ, kɛ susumɔ ni yaa nɔ efaa ni tsɔɔ akɛ Nyɔŋmɔ ni kɛ gbɔmɛi akpekpei abɔ wo naanɔ piŋmɔ mli lɛ he mfoniri ni afeɔ yɛ jwɛŋmɔ mli lɛ, kɛ Nyɔŋmɔ suɔmɔ ni ajie lɛ kpo yɛ Kristo mli lɛ kpaaa gbee kwraa.”

England Sɔlemɔ lɛ yeko ehe kɛjɛko haomɔ nɛɛ kɛ blema yiŋsusumɔ ni kɔɔ hɛl he lɛ he. Ewa kɛha gbɔmɛi ni jɛ jamɔi sɔrɔtoi amli lɛ akɛ amɛaajá Nyɔŋmɔ ko ni tɔɔ owele ni shãa eshafeelɔi. Jackson Carroll, jamɔ kɛ kwasafo shihilɛ he nilelɔ ni yɔɔ Duke University’s Divinity School lɛ kɛɛ: “Gbɔmɛi miisumɔ Nyɔŋmɔ ni yɔɔ mɔbɔnalɛ ni wɔleɔ mɔ. Eteɔ shi ewoɔ ŋmɛnɛŋmɛnɛ shihilɛ ni tsɔɔ akɛ aaawie esha kɛ fɔyeli he lɛ.”

Yehowa Odasefoi ehe eye kɛjɛ jeeŋmɔ akɛ, taakɛ Biblia lɛ tsɔɔ lɛ, hɛl ji adesai ni egboi lɛ akwamaŋ gbonyobu kɛkɛ—jeee piŋmɔ he ko ni la tsoɔ yɛ jɛmɛ. Jeee akɛ amɛhiɛ jwɛŋmɔ nɛɛ, akɛni ale waa hewɔ, shi moŋ yɛ nɔ ni Biblia lɛ kɛɔ hewɔ: “Gbohii lɛ, amɛleee nɔ ko nɔ ko . . . Nitsumɔ loo yiŋshwiemɔ loo nilee loo ŋaa ko bɛ gbohiiajeŋ [“hɛl,” Katolik Douay Version].”—Jajelɔi 9:5, 10.

Yɛ shishinumɔ ni yɔɔ faŋŋ ni kɔɔ gbohii lɛ ashihilɛ he nɛɛ hewɔ lɛ, Charles Taze Russell, klɛŋklɛŋ Buu Mɔɔ Asafo lɛ sɛinɔtalɔ lɛ ŋma yɛ afi 1896 tɔ̃ɔ akɛ: “Wɔnaaa he ko he ko [yɛ Biblia lɛ mli] ni wieɔ naanɔ piŋmɔ he, tamɔ bɔ ni jamɔŋ hemɔkɛyelii, kɛ sɔlemɔ lala woji, kɛ shiɛmɔi babaoo tsɔɔ yɛ gbɛ ni ejaaa nɔ lɛ. Ni kɛlɛ, wɔna ‘hɛl,’ sheol, hades, ni abu wɔ wekui lɛ fɛɛ fɔ kɛtee jɛmɛ yɛ Adam esha lɛ hewɔ lɛ, ní wɔ Nuntsɔ lɛ gbele kpɔ̃ɔ wɔ fɛɛ kɛjɛɔ jɛmɛ lɛ; ni ákɛ, ‘hɛl’ ji gbonyobu lɛ—gbele mli shihilɛ lɛ.”

No hewɔ lɛ, Yehowa Odasefoi kɛ nɔ ni fe afii oha etsɔɔ Biblia mli anɔkwale ni kɔɔ hɛl he lɛ.

[Mfoniri ni yɔɔ baafa 32]

Charles T. Russell