Namɔ Yeɔ Nɔ?
“NAMƆ yeɔ je lɛ nɔ?” Kɛji mɔ ko aaabi bo nakai sane lɛ, te obaaha hetoo tɛŋŋ? Ekolɛ gbɔmɛi ni sumɔɔ Nyɔŋmɔ jamɔ lɛ ateŋ mɛi pii baakɛɛ “Nyɔŋmɔ” loo “Yesu.” Sane ko ni aŋma yɛ The Freeport News, ni ji Bahamas adafitswaa wolo ko mli lɛ, kɛ hetoo ko ni mɛi fioo pɛ baakpa gbɛ lɛ hã.
Mɔ ni ŋma sane lɛ je shishi akɛ: “Mibana dɛhiɛmɔ wolo ko yɛ mishinaa lɛ naa. Bei babaoo lɛ, mikaneee woji ni tamɔ nɛkɛ ni abashiɔ yɛ mishinaa lɛ naa lɛ, shi mikpɛ miyiŋ akɛ makane enɛ. Saneyitso ni yɔɔ nɔ lɛ bi akɛ, ‘Namɔ Diɛŋtsɛ Yeɔ Je lɛ Nɔ?’ ” Kɛtsɔ dɛhiɛmɔ wolo ni damɔ Biblia lɛ nɔ lɛ kanemɔ nɔ lɛ, yoo nɛɛ baná ele akɛ jeee Nyɔŋmɔ loo Yesu ji mɔ ni yeɔ je lɛ nɔ, shi moŋ Satan Abonsam.—Yohane 12:31; 14:30; 16:11; 1 Yohane 5:19.
“Kwɛ yiwalɛ kpelei ni tamɔ kooloi anifeemɔ ni henumɔ bɛ mli ni yaa nɔ,” taakɛ dɛhiɛmɔ wolo lɛ tsɔɔ mli lɛ. “Adesai kɛ kɔɔyɔɔ ni ebɔɔ yɔɔ mli ni ji gas ni gbeɔ mɔ, gboklɛfoi aŋsaraŋ, ofɛ̃lai, napalm okpɛlɛmii ni tsoɔ tamɔ mu, kɛ yiwalɛ gbɛi krokomɛi etsu nii ni amɛkɛfee gbɔmɛi niseniianii ni amɛkɛgbe amɛhe ni mɔbɔnalɛ bɛ mli. . . . Mɛɛ hewalɛi tsirɛɔ gbɔmɛi ayisɛɛ kɛyaa nyaŋemɔ nitsumɔi ni tamɔ nɛkɛ he loo amɛkudɔɔ amɛ kɛyaa shihilɛi ni haa amɛnuɔ he akɛ esa akɛ amɛfee efɔŋ ni tamɔ nɛkɛ mli lɛ? Ani osusu he pɛŋ akɛ ani benɛ hewalɛ fɔŋ ko ni anaaa lɛ miitsirɛ gbɔmɛi koni amɛye awui ni tamɔ nɛkɛ?” Ani eyɛ naakpɛɛ akɛ Biblia lɛ tsɛɔ Satan akɛ “je nɛŋ nyɔŋmɔ lɛ”?—2 Korintobii 4:4.
Miishɛɛ sane ji akɛ, be ni Satan kɛ edaimonioi lɛ ehiŋ shi dɔŋŋ lɛ ebɛŋkɛ. “Je lɛ hoɔ eyaa kɛ emli sɛɛdii nii lɛ; shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.” (1 Yohane 2:17) Hɛɛ, Biblia lɛ ewo shi akɛ mɛi ni feɔ Nyɔŋmɔ suɔmɔnaa nii lɛ yɛ hiɛnɔkamɔ akɛ amɛaahi shi kɛya naanɔ yɛ jalɛ jeŋ hee mli. (Lala 37:9-11; 2 Petro 3:13; Kpojiemɔ 21:3, 4) Kwɛ heyeli ni eeeji, ákɛ ajie Satan kɛ edaimonioi lɛ ahewalɛ fɔŋ lɛ kɛtee kwraa!
Beni emu dɛhiɛmɔ wolo bibioo nɛɛ mli saji anaa egbe naa lɛ, mɔ ni ŋma sane lɛ ewo The Freeport News adafitswaa wolo lɛ mli lɛ mu naa akɛ: “Eŋɔɔ minaa waa diɛŋtsɛ akɛ mikane nakai dɛhiɛmɔ wolo lɛ . . . ejaakɛ mi hu misusuɔ bɔ ni je lɛŋ shihilɛ efee, kɛ mɔ ni yeɔ nɔ lɛ he waa diɛŋtsɛ.”