Nyɔŋmɔ Mli Hemɔkɛyeli Ani Esa akɛ Edamɔ Naakpɛɛ Nii Anɔ?

ALBERT eye afii 20 kɛmiiya beni ebɔi Nyɔŋmɔ sɛɛgbɛ taomɔ. Ekpa jamɔi sɔrɔtoi amli shi etsui enyɔɔɔ emli. Beni ekaneɔ Biblia lɛ fãi komɛi lɛ, ekase bɔ ni Nyɔŋmɔ kɛ aŋkroaŋkroi tamɔ Noa, Abraham, Sara, kɛ Mose ye ha. Albert na akɛ ekɛ ehe eyakpɛtɛ Biblia lɛ mli Nyɔŋmɔ lɛ he. Shi, ani ebaanyɛ ena nɔmimaa akɛ Nyɔŋmɔ yɛ diɛŋtsɛ?

Albert ta tsɔne mli gbɛkɛ ko kɛtee he ko banee, ni esɔle yɛ jɛmɛ akɛ, “Nyɔŋmɔ ofainɛ, ha mi okadi ko—nɔ fɛɛ nɔ ni baaha mana akɛ oyɛ.” Albert mɛ aahu. Ekaiɔ akɛ, beni nɔ ko baaa lɛ, egbɛkpamɔ lɛ “tsɔ nijiaŋwujee, etsɔ kɔɔyɔɔ hakumɔ, etsɔ mlifu.”

Taakɛ Albert ji lɛ, mɛi pii nuɔ he akɛ ámɛtao Nyɔŋmɔ sɛɛgbɛ efolo. Osɔfoi ashiɛmɔ wiemɔi baaha amɛyiŋ afutu, aloo amɛ hiɛnɔkamɔ baafee yaka kɛtsɔ bɔ ni tɛlivishin nɔ shiɛlɔi tsɔɔ mɛi ayiŋ lɛ nɔ lɛ hewɔ. Akɛni osatofeemɔ ni anaa yɛ amɛ akutseiaŋbii pii ahe lɛ ehɛle amɛ shi hewɔ lɛ, amɛteŋ mɛi komɛi leee nɔ ni amɛaahe amɛye dɔŋŋ. Ni kɛlɛ, Maŋtsɛ David ni hi shi yɛ blema Israel lɛ kɛ nɔmimaa nɛɛ ha ebinuu Salomo: “Kɛji ootao [Nyɔŋmɔ] lɛ, eeeha ona lɛ.”—1 Kronika 28:9.

Ojogbaŋŋ, belɛ mɛɛ gbɛ nɔ Nyɔŋmɔ tsɔɔ ejieɔ ehe kpo etsɔɔ wɔ? Ani esa akɛ okpa okadi ko gbɛ—niiashikpamɔ ko ni fe adebɔɔ nɔ̃ ni baaha ona akɛ Nyɔŋmɔ yɛ? Taakɛ nyɛsɛɛ saji komɛi ni abibii ni Time wolo tɛtrɛɛ lɛ bɔ he amaniɛ lɛ tsɔɔ lɛ, Amerikabii amlijaa fe etɛ mli enyɔ heɔ naakpɛɛ nii amɛyeɔ. Sane lɛ hu tsɔɔ akɛ, “sɔlemɔi ni amɛyi faa oyayaayai fe fɛɛ yɛ Amerika ji Mumɔŋ sɔlemɔi kɛ Pentekoste sɔlemɔi ni amɛjamɔ kɔɔ ‘okadii kɛ naakpɛɛ nii’ ahe lɛ.”

Ani esa akɛ ana “okadii kɛ naakpɛɛ nii” dani ahe Nyɔŋmɔ nɔ aye? Ekɛ naakpɛɛ nii tsu nii yɛ bei ni eho lɛ amli. Akɛ nɔkwɛmɔ nɔ lɛ: Saulo ni jɛ Tarso, ni waa Nyɔŋmɔ Bi, Yesu Kristo sɛɛnyiɛlɔi lɛ ayi lɛ, ná niiashikpamɔ ko ni ekaaa yɛ gbɛ ni jɛɔ Yerusalem kɛyaa Damasko lɛ nɔ. Nɛkɛ naakpɛɛ nii ni kɔɔ Yesu ni atee lɛ shi lɛ he lɛ ni ena lɛ kɛ Saulo tsakemɔ ba. (Bɔfoi lɛ Asaji 9:1-22) Nɛkɛ gbɛ nɔ tsɔ ni tsutsu yiwalɔ lɛ batsɔ bɔfo Paulo—mɛi ni fiɔ Kristojamɔ sɛɛ waa lɛ ateŋ mɔ kome!

Shi ani naakpɛɛ nii kɛ nɔkpɛlɛmɔ kpakpa ni tamɔ nɛkɛ baa be fɛɛ be? Ani Nyɔŋmɔ mli anɔkwa hemɔkɛyeli damɔ naakpɛɛ nii ni mɔ ko kɛkpeɔ lɛ nɔ?

[Mfoniri ni yɔɔ baafa 3]

Nyɔŋmɔ Bi lɛ kɛ Saulo ni jɛ Tarso lɛ wie yɛ naakpɛɛ gbɛ nɔ. Ani esa akɛ okpa naakpɛɛ nɔ̃ ko gbɛ?