Beni Yehowa Odasefoi Eba Oŋɔɔ

Mɛni esa akɛ Katolikbii afee kɛ Yehowa Odasefoi lɛ ateŋ mɔ ko eba amɛŋɔɔ yɛ amɛshia lɛ? Nyɛsɛɛ nɛɛ wolo ko ni National Catechistic Bureau of the Italian Bishops’ Conference lɛ ŋma akɛ: “Ní aaakpoo sanegbaa yɛ mlihilɛ mli, shi kɛlɛ, yɛ shiŋŋfeemɔ mli lɛ etsɔɔɔ suɔmɔ ni abɛ yɛ enɛ mli.”

Jeee Katolikbii fɛɛ kpɛlɛɔ nɔ, taakɛ wolo ko ni nuu ko ni yɔɔ Foggia, Italy lɛ ŋma emaje Gazzetta del Mezzogiorno lɛ tsɔɔ lɛ:

“Mijeee Yehowa Odasefoi lɛ ateŋ mɔ ko. Katoliknyo ji mi. Shi minaa kpɛɔ mihe yɛ mlai komɛi ni sɔlemɔ lɛ kɛfɔɔ emlibii lɛ anɔ, ni amɛkɛɔ amɛ koni amɛkɛ wiemɔi ni shwieɔ Yehowa Odasefoi kɛyaa lɛ akpɛtɛ amɛ shinai anaa lɛ ahe. Kɛ́ hoo kwraa lɛ, gbɔmɛi nɛɛ shiɛɔ Nyɔŋmɔ Wiemɔ lɛ, ni amɛyeɔ amɛbuaa mɛi krokomɛi koni amɛná Biblia lɛ mli nilee ni mli kwɔ. Ekaiɔ mi be ni otswaashiogbo hela bahe shi yɛ Italy ni awo wɔ ŋaa yɛ bɔ ni wɔɔfee ni wɔkaná hela nɛɛ eko lɛ.

“Yɛ mijwɛŋmɔ naa lɛ, enɛ tsɔɔ akɛ sɔlemɔ lɛ kɛ lɛ diɛŋtsɛ emlai haa ni esusuuu emlibii lɛ asuɔmɔ naa nii ahe. Shi afii komɛi ni eho nɛɛ lɛ amli lɛ, mina akɛ Katolikbii lɛ po miiya shia kɛ shia, ni amɛyaa Yehowa Odasefoi lɛ hu ashiai amli hu; ni amɛhereɔ amɛ, amɛkɛ amɛ gbaa sane ni amɛshwieee mɔ ko.”

Yehowa Odasefoi enyɛɛɛ gbɔmɛi anɔ ni amɛkpɛlɛ amɛ shɛɛ sane lɛ nɔ. Shi moŋ, amɛbɔɔ mɔdɛŋ koni amɛkɛ mɛi krokomɛi agba hiɛnɔkamɔ lɛ ni yɔɔ Nyɔŋmɔ Wiemɔ lɛ mli lɛ ni amɛ diɛŋtsɛ amɛna akɛ eshɛjeɔ mɔ mii yɛ nɛkɛ haomɔ bei nɛɛ amli lɛ he sane. Yɛ be mli ni amɛyaa shia kɛ shia, kɛ agbɛnɛ hu lɛ kɛtsɔ mɛi ni amɛkɛkpeɔ yɛ gbɛjegbɛi anɔ ni amɛkɛ amɛ wieɔ lɛ nɔ lɛ, Yehowa Odasefoi kɛ mɛi fɛɛ ni miisumɔ ni amɛbo toi lɛ gbaa Nyɔŋmɔ Maŋtsɛyeli lɛ he sanekpakpa lɛ he sane.—Mateo 24:14; Bɔfoi 5:42; 17:17.