“Anɔkwale Ojarawatɛi”

“Anɔkwale ojarawatɛi.” Nɛkɛ ji bɔ ni wolo ko ni aŋma ayaha Yehowa Odasefoi anitsumɔhe nine ni yɔɔ Nigeria lɛ tsɔɔ bɔ ni woji tɛtrɛbii krɛdɛi enyɔ lɛ ji lɛ mli eha. Woloŋmalɔ lɛ ni ji obalanyo fioo ko lɛ tsɔɔ mli akɛ:

“Miiŋma wolo nɛɛ ni mikɛtsɔɔ mishidaa diɛŋtsɛ yɛ mɔdɛŋ ni nyɛbɔɔ koni nyɛwie daa gbi shihilɛ mli nibii fɛɛ he kɛtsɔ Buu-Mɔɔ lɛ kɛ Awake! woji tɛtrɛbii lɛ anɔ lɛ hewɔ.

“Miye afii 17. Wɔmaŋ lɛ mli redio nitsumɔhe ko to sane ko ŋmaa he akaŋshii he gbɛjianɔ yɛ saneyitso ni ji, ‘Babaoo Yɛ ni Kɔɔ Suɔmɔ He Fe Bɔlɛnamɔ—AIDS Yɛ Diɛŋtsɛ’ yɛ nyɛsɛɛ afi lɛ mli. Esaaa akɛ sane ni abaaŋma nɛɛ eko faa fe wiemɔi komekomei ohai ejwɛ. Akɛ jweremɔ nɔ ni shɛɔ naira 1,000 [₵24,000] baaha mɔ ni nɔ̃ ŋɔɔ fe fɛɛ. Shi amɛkɛɛ akɛ, akaŋma kɛ yiŋtoo akɛ aatao jweremɔ nɔ lɛ, shi moŋ ni akɛkase nɔ ko. . . .

“Mina saji ni kɔɔ AIDS he lɛ yɛ woji tɛtrɛbii enyɔ lɛ fɛɛ mli. Saji babaoo ni fa fe nine ni kɔɔ suɔmɔ he yɛ mli. Mikɛ saji otii ni yɔɔ August 8, 1978 Awake! lɛ mli tsu nii.

“Beni mikɛ miniŋmaa lɛ maje lɛ sɛɛ nyɔji enyɔ pɛ kɛkɛ ni nɔ ni jɛ mli ba lɛ je kpo. Nɔ ni fee mi naakpɛɛ ji akɛ, miye klɛŋklɛŋ gbɛhe yɛ Cross River kɛ Akwa Ibom maji lɛ mli!

“Saji ni mikɛtsu nii lɛ fɛɛ jɛ woji tɛtrɛbii lɛ amli. Eyɛ naakpɛɛ diɛŋtsɛ akɛ Yehowa kɛ saji ni baa yɛ amɛbe naa pɛpɛɛpɛ haa wɔ yɛ jeŋ ni ehao ni he yeɔ nɛɛ mli. Akɛ anɔkwa Kristofoi lɛ, wɔle akɛ babaoo yɛ, babaoo yɛ ni esa akɛ asumɔ fe bɔlɛnamɔ. Ni agbɛnɛ shihilɛ ni he tse yɛ jeŋba mli buɔ wɔhe kɛjɛɔ helai ni tamɔ AIDS he.

“Minuɔ he akɛ esa akɛ mada nyɛ shi yɛ anɔkwale ojarawatɛi ni nyɛfeɔ ni etɔɔɔ nyɛ nɛɛ hewɔ. Eba akɛ Yehowa aaaya nɔ ajɔɔ nyɛ mɔdɛŋbɔi anɔ, yɛ be mli ni nyɛyaa nɔ nyɛkɛ woji tɛtrɛbii ni jara wa nɛɛ haa mɛi lɛ.”