Connecticut Kojomɔhe Wulu ni Fe Fɛɛ Fi Helatsɛ Hegbɛi Asɛɛ

Yɛ April 16, 1996 mli lɛ, Connecticut, Kojomɔhe Wulu ni Fe Fɛɛ ni yɔɔ U.S.A lɛ, fi hegbɛ ni Yehowa Odasefoi yɔɔ ni amɛkɛ aaakpoo lá ni agbalaa awoɔ mɔ mli lɛ sɛɛ. Nɛkɛ yiŋkpɛɛ nɛɛ fo klɛŋklɛŋ yiŋkpɛɛ ni kpokpaa nɔ kojomɔ lɛ kɛha lɛ mli.

Yɛ August 1994 mli lɛ, lá babaoo ho Nelly Vega, Yehowa Odasefoi lɛ ateŋ mɔ kome waa yɛ be mli ni efɔ ekromɔ bi lɛ sɛɛ. Mɔdɛŋ fɛɛ ni abɔ koni akɛtsĩ elá ni hoɔ lɛ babaoo nɛɛ naa lɛ eko kwraa yeee omanye. Beni Awula Vega shihilɛ lɛ mli ba wo wu lɛ, helatsamɔhe lɛ bi koni kojomɔhe lɛ kɛ fãmɔ aha koni akɛ lá aha lɛ. No mli lɛ, Awula Vega kɛ enine ewo wolo shishi momo, ni tsɔɔ akɛ akɛ lá loo ehenɔ ko akatsu nii yɛ ekwɛmɔ mli yɛ be ni eyɔɔ helatsamɔhe lɛ, ni haa helatsamɔhe lɛ yeɔ ehe kɛjɛɔ sɔ̃ fɛɛ sɔ̃ ni baajɛ eyiŋkpɛɛ nɛɛ mli aba lɛ he. Shi kɛlɛ, helatsamɔhe lɛ taa naa akɛ lá ni agbalaa awoɔ mɔ mli ni akɛaaha lɛ yɛ ekãa naa lɛ he baaba sɛɛnamɔ kɛha abifao lɛ, mɔ ni helatsamɔhe lɛ tsɔɔ akɛ enyɛ he baahia lɛ lɛ. Kpokpaa nɔ kojomɔhe lɛ hu naagba ji akɛ yɛ lá babaoo ni eho lɛ fɛɛ sɛɛ lɛ, Awula Vega ji oblayoo fioo ni yɔɔ gbɔmɔtsoŋ hewalɛ. Ni kɛlɛ, yɛ kpɛlɛmɔ ní Awula Vega wu kɛ emla he nitsulɔ lɛ ekpɛlɛɛɛ lɛ fɛɛ sɛɛ lɛ, kojomɔhe lɛ fã ni aha lɛ lá lɛ.

Yɛ be ni sa mli lɛ, akɛ sane lɛ tee Kojomɔhe Wulu ni Fe Fɛɛ lɛ yɛ Connecticut. Amɛkɛ ekomefeemɔ mu sane naa yɛ jɛmɛ akɛ helatsamɔhe lɛ nifeemɔ lɛ ete shi ewo Awula Vega hegbɛi ni eyɔɔ. Sane lɛ kɛɛ: “Kojomɔhe lɛ je sane lɛ yeli shishi maŋkɛ̃ mli, yɛ shihilɛ ni ba trukaa ni ehiii kwraa kɛha fãi enyɔ lɛ anyɛmɔ ni amɛkɛaataa sane naa jogbaŋŋ lɛ.”

Nɛkɛ sane ni Kojomɔhe Wulu ni Fe Fɛɛ ni yɔɔ Connecticut lɛ ye nɛɛ, yɛ shishinumɔ ko, jeee kɛha Yehowa Odasefoi pɛ, shi mɛi krokomɛi hu. Donald T. Ridley, Awula Vega mla he nitsulɔ lɛ kɛɛ: “Ehe yɛ sɛɛnamɔ kɛha helatsɛmɛi fɛɛ ni kɛ amɛ datrɛfoi efeŋ ekome yɛ amɛyiŋkpɛɛi amli lɛ, sane ni aye lɛ baatsĩ helatsamɔhei lɛ anaa koni amɛkateke helatsɛmɛi ayiŋkpɛɛi kɛji akɛ eji jamɔ he nɔ̃ loo jeŋ sane he nɔ̃.”