Namɔ Esa akɛ Ashwa?

Mɛi pii shwaa Nyɔŋmɔ yɛ naagbai ni amɛkɛkpeɔ lɛ hewɔ. Biblia abɛbua ko kɛɔ akɛ: “Gbɔmɔ buuluufeemɔ nɔŋŋ fiteɔ eshihilɛ, kɛkɛ lɛ emli efu Nuntsɔ lɛ.” (Abɛi 19:3, The New English Bible) Kɛlɛ, kɛ aaashwa Nyɔŋmɔ yɛ naagbai ni akɛkpeɔ hewɔ lɛ, no lɛ ebaafee tamɔ nɔ ni aashwa karfeelɔ ko yɛ osharai ni baa kɛjɛɔ dãa ní atɔ ni akɛmiikudɔ tsɔne lɛ hewɔ.

Nyɔŋmɔ kɛ gbɛtsɔɔmɔ ni sa jogbaŋŋ ni yɔɔ e-Wiemɔ ni ji Biblia lɛ mli lɛ eha adesa. Kɛtsɔ wojiatoohe ni jɛ ŋwɛi nɛɛ kasemɔ kɛ emlai lɛ kɛ shishitoo mlai ni etsɔɔ lɛ kɛ nitsumɔ nɔ lɛ, wɔbaanyɛ wɔtsi wɔhe kɛjɛ osharai pii ni wɔkɛkpeɔ yɛ wɔshihilɛ mli lɛ he. Nɔ ni tamɔɔɔ nakai lɛ, kɛ wɔkɛ Nyɔŋmɔ gbɛtsɔɔmɔ tsuuu nii lɛ, ekɛ oshara baaba. Ákɛ nɔkwɛmɔnɔ lɛ, mɛi ni yeɔ nii fe nine, ni amɛshɛreɔ sigaret, ni amɛtɔɔ dãa, aloo amɛfeɔ nibii fɔji lɛ fɔɔ piŋmɔ yɛ gbɔmɔtsoŋ hewalɛnamɔ mli. (Luka 21:34; 1 Korintobii 6:18; 2 Korintobii 7:1) Kristofonyo bɔfo Paulo ŋma akɛ: “Nɔ̃ pɛ ni gbɔmɔ duɔ lɛ, no nɔŋŋ ebaakpa hu. Ejaakɛ mɔ ni duɔ nii yɛ lɛ diɛŋtsɛ eheloo mli lɛ, eheloo lɛ mli ebaakpa fitemɔ kɛjɛ; shi mɔ ni duɔ nii yɛ mumɔ mli lɛ, mumɔ lɛ mli nɔŋŋ ebaakpa naanɔ wala kɛjɛ.”—Galatabii 6:7, 8.

Kwɛ bɔ ni ehi kwraa akɛ aaahi shi yɛ Nyɔŋmɔ mlai lɛ kɛ shishitoo mlai lɛ anaa! Kɛ wɔfee nakai lɛ, wɔbaana bɔ ni Nyɔŋmɔ shiwoo ni ewie he kɛtsɔ gbalɔ Yesaia nɔ lɛ ji anɔkwale ha: “Miji Yehowa, o-Nyɔŋmɔ lɛ, mɔ ni tsɔɔo nii ni hi hao, mɔ ni tsɔɔo gbɛ ni onyiɛ nɔ lɛ. Eji obo mikitai lɛ atoi kulɛ, ohejɔlɛ aaatamɔ faa, ni ojalɛ hu aaatamɔ ŋshɔkei.”—Yesaia 48:17, 18.