“Namɔ Fɔ Bɔ́ Kulibii Lɛ?”

ADAFITSWAA woloŋmalɔ ko ni hi shi yɛ afii ohai 19 lɛ mli lɛ tsɔɔ mli akɛ, bɔ́ kulibii ji “shikpɔŋ lɛ nɔ nu jwinei ni kɔɔyɔɔ feɔ.” Wɔ Bɔlɔ lɛ bi blematsɛ Hiob akɛ: “Namɔ fɔ bɔ́ kulibii lɛ?” (Hiob 38:28) No mli lɛ, Nyɔŋmɔ miikai Hiob he ni bɔ́ ni yɔɔ fɛo lɛ jɛ yɛ ŋwɛi.

Yɛ kpɛlɛmɔ ni bɔ́ kpɛlɛɔ kɛ bɔ ni etamɔ jwine fɛfɛo ha lɛ fɛɛ sɛɛ lɛ, yɛ Biblia lɛ mli lɛ akɛtoɔ jɔɔmɔ, shweremɔ, nifalɛ kɛ wala yibaamɔ he. (1 Mose 27:28; 5 Mose 33:13, 28; Zakaria 8:12) Beni nugbɔ enɛɛɛ yɛ Israel ni jɛmɛ edɔ lɛ, “Hermon bɔ́” lɛ baa shikpɔŋ tsei lɛ ayi, ni no hewɔ lɛ ekɛbaa egbɔmɛi lɛ ayi. Hermon Gɔŋ lɛ kooi kɛ snoo gɔji lɛ fãa lamɔ lolo gbɛkɛ ni enɛ tsɔɔ bɔ́. Lalatsɛ David kɛ hejɔlɛ ni bɔ́ kɛbaa lɛ to miishɛɛ mli niiashikpamɔ ni anaa kɛjɛɔ ekomefeemɔ shihilɛ mli ni akɛ nanemɛi Yehowa jalɔi hiɔ lɛ he.—Lala 133:3.

Tsɔsemɔ ni gbalɔ Mose kɛha Israel lɛ yɛ blɛoo ni ehaa mɔ he jɔɔ lɛ tamɔ bɔ́ kulibii. Ekɛɛ akɛ: “Mitsɔɔmɔ aaatue tamɔ nyɔŋmɔnemɔ, ni miwiemɔ lɛ aaanyɔ tamɔ bɔ́, tamɔ futufuli yɛ jwɛifɔ nɔ kɛ nukulibii yɛ baai anɔ hu.” (5 Mose 32:2) Ŋmɛnɛ, Yehowa Odasefoi miijaje sanekpakpa ni kɔɔ Nyɔŋmɔ Maŋtsɛyeli ni haa mɔ yi naa wala lɛ kɛmiiya shikpɔŋ lɛ naagbee hei lɛ. (Mateo 24:14) Nyɔŋmɔ miikpã ninefɔɔ lɛ mli akɛ: “ ‘Ba!’ Ni mɔ ni sumɔɔ lɛ, ha ni ebayɛ wala nu lɛ yaka.” (Kpojiemɔ 22:17) Gbɔmɛi akpekpei abɔ ni jɛ jeŋmaji fɛɛ mli lɛ miikpɛlɛ nɛkɛ mumɔŋ hejɔɔmɔ ni baanyɛ aha mɔ wala kɛya naanɔ ni jɛ Nyɔŋmɔ ŋɔɔ nɛɛ nɔ.