Suɔmɔ ni Mli Wa Fe Awo Suɔmɔ

NYƐMƐI miishi amɛ abifabii ni amɛfɔ amɛ lɛ yɛ nanegbɛi ni kamɔ gbɛjegbɛi ashishi lɛ nɔ, maŋbii ashaamɔhei, aloo yɛ gbɛjegbɛi ni dekã bɛ nɔ lɛ ahe. Yɛ bei komɛi amli lɛ jwɛi loolɔi naa abifabii bibii ni amɛfo aahu kɛtsɛ amɛnyɛmɛi, ní etɔ amɛ yɛ jwɛi nii po amli. Taakɛ O Estado de S. Paulo tsɔɔ lɛ, “saji ni kɔɔ abifabii ni ayashiɔ amɛ yɛ gbɛjegbɛi ahe lɛ miiya nɔ eefa.” Yɛ anɔkwale mli lɛ, yɛ sɛɛ mli lɛ, gbekɛ ni ji nyɛ lɛ shwaa ehe. Shi kɛlɛ, eyaa nɔ efeɔ nakai, eyɛ mli akɛ ele po akɛ ebi lɛ baagbo moŋ.

Ekolɛ obaabi akɛ, ‘Te aaafee tɛŋŋ ni awo aaaná susumɔ ko po akɛ eeeshi ebi kɛha wɔsɛɛ shihilɛ ko ni eleee lɛ?’ Biblia lɛ kɛ mɔbɔ shihilɛ ni tamɔ nakai tsu nii ákɛ nɔ ni akɛtoɔ sane he ni ekɛtsɔɔ srɔtofeemɔ ni da ni tsɔɔ bɔ ni wɔ Bɔlɔ lɛ nuɔ nii ahe ehaa mɛi ni ji enii lɛ ahe akɛ: “Aso yoo hiɛ aaakpa ebi fufɔoo nɔ, aloo emusuŋ etsɔŋ lɛ yɛ emusuŋbi hewɔ? Ni kɛ mɛnɛɛmɛi ahiɛ aaakpa nɔ tete lɛ, mi lɛ mihiɛ kpaŋ onɔ!”—Yesaia 49:15.

Lɛɛlɛŋ, Nyɔŋmɔ yɛ suɔmɔ ni mli kwɔ fe adesa nyɛ ko nɔ̃ kɛha wɔ, ni ejieɔ henumɔ kpo yɛ wɔhiamɔ nii ahe. Kɛ́ oji oblanyo aloo onukpa jio, naagba fɛɛ naagba ni okɛaakpe lɛ, jeee okome pɛ oyɔɔ. O-Bɔlɔ lɛ miisumɔ ni eye ebua bo, ni eyɛ ohilɛ-kɛ-hamɔ he miishɛɛ. Lalatsɛ lɛ kɛɔ yɛ ewiemɔi lɛ amli akɛ: “Shi mitsɛ kɛ minyɛ eshi mi moŋ, shi Yehowa hereɔ mi atuu.”—Lala 27:10.

Yɛ jeŋ fɛɛ lɛ, aafee Buu-Mɔɔ kɛ Awake! woji tɛtrɛbii lɛ, koni ekɛ “anɔkwa Nyɔŋmɔ kome lɛ,” Yehowa, kɛ e-Bi Yesu Kristo he nilee ni baanyɛ eha mɛi ni kɛ hiɛsɔɔ ŋɔɔ woɔ amɛjwɛŋmɔ mli lɛ aná naanɔ wala.—Yohane 17:3.