Ani Oosusu Gbalashihilɛ He?
Kɛ wɔkɛ jeŋ fɛɛ gbalamlitsemɔ ni yaa nɔ waa lɛ to shikpɔŋhosomɔ he lɛ, United States baafee he ni shikpɔŋhosomɔ lɛ baafite fe fɛɛ. Yɛ nyɛsɛɛ afii nɛɛ amli lɛ, akɛ gbalashihilɛi ni fa fe akpeiakpe kome ba naagbee yɛ jɛmɛ—kɛ hoo lɛ enyɔ yɛ miniti fɛɛ miniti mli. Shi ekolɛ ole jogbaŋŋ akɛ jeee United States pɛ ji he ko ni gbalashihilɛ yɔɔ oshãra mli.
TAAKƐ niiamlitaomɔ ko tsɔɔ lɛ, bɔ ni gbalamlitsemɔ yaa nɔ ehaa yɛ Canada, England kɛ Wales, France, Greece, kɛ Netherlands lɛ ebɔ he nɔ ni fa fe toi enyɔ kɛjɛ afi 1970 nɔ kɛbaa.
Wɔyɛ nɔ fɛɛ nɔ ni wɔɔdamɔ nɔ wɔhe wɔye akɛ, bei pii lɛ, mɛi enyɔ boteɔ gbalashihilɛ mli yɛ suɔmɔ ni amɛyɔɔ kɛha amɛhe, kɛ suɔmɔ ni amɛyɔɔ akɛ amɛaafee ekome kɛhi shi amɛwala be ni eshwɛ lɛ hewɔ. Shi mɔbɔ sane ji akɛ, bei pii lɛ, gbalashihilɛ mli miishɛɛ ni ashweɔ waa koni aná lɛ baaa mli—yiŋsusumɔ ko kɛkɛ ni. Mɛi babaoo ni bayɔseɔ bɔ ni shihilɛ lɛ ji diɛŋtsɛ lɛ ekɛɛ akɛ amɛbote gbalashihilɛ mli mra tsɔ̃ loo jeee mɔ ni sa lɛ amɛkɛbote gbalashihilɛ mli lɛ, loo enyɔ lɛ fɛɛ.
Mɛni hewɔ gbalashihilɛi babaoo fiteɔ? Mɔ ni ŋma wolo ko ni wieɔ nyiɛmɔ ni tsɔɔ gbalashihilɛ hiɛ lɛ he lɛ kɛɛ akɛ: “Nɔ titri ni haa ebaa lɛ nakai ji hesaamɔ jogbaŋŋ ni bɛ.” Ekɛfata he akɛ: “Yɛ be mli ni mikɛ gbalashihilɛ mli hefatalɔi tsuɔ gbalashihilɛ mli naagba mli piŋmɔi ahe nii lɛ, henumɔi enyɔ yeɔ minɔ kwraa—musuŋtsɔlɛ kɛ mlifu. Mimusuŋ tsɔ̃ɔ mi akɛni amɛnine shɛko nɔ ni amɛshweɔ waa koni amɛna lɛ nɔ kɛha wekukpaa mli ekomefeemɔ ni haa mɔ tsui nyɔɔ emli lɛ hewɔ. Mimli fuɔ akɛni amɛleee bɔ ni nitsumɔ lɛ yɔɔ hwanyaŋŋ ha lɛ hewɔ.”
Lɛɛlɛŋ, mɛi babaoo kɛ nilee fioo ni tsɔɔ bɔ ni aaafee aye omanye boteɔ gbalashihilɛ mli, loo amɛbɛ eko kwraa. Ni kɛlɛ, enɛ yɛ naakpɛɛ waa diɛŋtsɛ. Nitsɔɔlɔ ko kɛɛ akɛ: “Oblahii kɛ oblayei bibii ni wɔyɔɔ lɛ ateŋ mɛi enyiɛ yaa kɔleji ni amɛyakaseɔ obishii kɛ odaakɛlɛoi anifeemɔi ahe nii, yɛ be mli ni amɛkaseee gbɔmɛi enyɔ ni atsɛɔ amɛ wu kɛ ŋa lɛ anifeemɔi ahe nii?”
Ani oosusu gbalashihilɛ he—kɛ́ ekɔɔ gbalashihilɛ mli ni ooobote wɔsɛɛ ko loo ekɔɔ nakai gbalashihilɛ ni oyɔɔ mli amrɔ nɛɛ lɛ he? Kɛ nakai ni lɛ, esa akɛ ole akɛ esoro shihilɛ mli wekukpaa diɛŋtsɛ yɛ nɔ ni afeɔ he mfoniri yɛ sinii, nibii ni ajieɔ atsɔɔ yɛ tɛlivishiŋ nɔ, kɛ suɔmɔ he adesã woji amli lɛ mli. Yɛ nakai beaŋ nɔŋŋ lɛ, abaanyɛ abu gbɔmɛi enyɔ ni edara ni ená suɔmɔ kɛha amɛhe lɛɛlɛŋ lɛ agbalashihilɛ lɛ akɛ jɔɔmɔ ni jɛ Nyɔŋmɔ dɛŋ. (Abɛi 18:22; 19:14) Belɛ, te ooofee tɛŋŋ oná nɔmimaa akɛ ósaa ohe akɛ okɛ gbalashihilɛ mli nibii ni he hiaa waa lɛ baakpe? Mɛni nibii esa akɛ osusu he yɛ hefatalɔ halamɔ mli? Aloo, kɛ́ óbote gbalashihilɛ mli momo lɛ, te ooofee tɛŋŋ oha miishɛɛ ni sɛɛ tsɛɔ ni obaanyɛ oná yɛ ogbalashihilɛ mli lɛ aya hiɛ?