Nɔ Ko Yɛ ni Hi Fe Hefɛo Nibii

YƐ SƐƐ mli beni etsĩ “kponɔgbɛ fɛo nibii” ni yei kɛtsuɔ nii akɛ hefɛo wulamɔ nibii atã lɛ, bɔfo Petro wo ŋaa akɛ: “Yɛ no najiaŋ lɛ, nyɛ anɔkwa mligbɛ gbɔmɔ lɛ afee nyɛhefɛo lɛ, mumɔ ni he jɔ ni yɔɔ kpoo lɛ hefɛo ni fiteee, ni ji nɔ ni jara wa fe fɛɛ yɛ Nyɔŋmɔ hiɛ lɛ.”​—⁠1 Petro 3:​3, 4, Today’s English Version.

Miishɛɛ sane ji akɛ, beni bɔfo lɛ ŋma yɛ nakai kponɔgbɛ hewulamɔ nibii lɛ ahe lɛ, ekɛ Hela wiemɔ henɔ ko ni ji koʹsmos lɛ tsu nii, ni no hu eji wiemɔ ni aná Ŋleshi wiemɔ ni ji “cosmetic,” ni eshishi ji “koni aha hewolo lɛ titri afee fɛo” lɛ yɛ mli. Ani no mli lɛ Petro kɛ nɔnyɛɛ miitsĩ Kristofoi yei anaa ni amɛgu hewolo nɔ hefɛo nibii kɛ nibii krokomɛi ni haa mɔ he feɔ fɛo lɛ? Nɔ ko kwraa bɛ Nyɔŋmɔ Wiemɔ lɛ mli ni tsɔɔ nakai. Yɛ no najiaŋ lɛ, eŋmɛɔ mɔ diɛŋtsɛ yiŋkpɛɛ gbɛ yɛ nɛkɛ sane nɛɛ mli, enɛ hewɔ lɛ abaanyɛ akpa srɔtofeemɔ ko ni yɔɔ nɔ ni mɔ fɛɛ mɔ sumɔɔ mli lɛ gbɛ.

Shi kɛlɛ, kɛji ákɛ akɛ hewolo nɔ hefɛo nibii lɛ tsu nii ni eteke nɔ, aloo afee kɛshɛ he ni egbaa mɛi babaoo anaa lɛ, mɛɛ shɛɛ sane akɛhaa lɛ? Ani ejeee hesaamɔ lɛ ni afite efɛo, ni bɛ hiŋmɛi nɔ, ni anyaaa he, ni afeɔ koni mɛi ana, aloo nɔ ni pɛsɛmkunya nifeemɔ yɔɔ mli? Lɛɛlɛŋ, ebaanyɛ eha yoo ko hesaamɔ afee nɔ ni baa shi, ekolɛ ekɛ jwɛŋmɔ ni ejaaa ni kɔɔ jeŋba he lɛ baaha.​​—⁠Okɛto Ezekiel 23:​36-​42 he.

Yɛ enɛ yɔsemɔ mli lɛ, yoo ni “tsɛɔ ehe Nyɔŋmɔ jálɔ” lɛ kɛ́ ehala akɛ ekɛ cosmetics aaatsu nii lɛ, ebaabɔ mɔdɛŋ koni ejie jwɛŋmɔŋ hiɛshikamɔ, mlijɔlɛ, mlihilɛ, kɛ heshibaa su ko kpo etsɔɔ. Nakai subaŋ lɛ baaha ehiɛnyam kɛ ehe fɛo aya hiɛ. Yɛ anɔkwale mli lɛ, kɛji ehala akɛ ekɛ hewolo nɔ hefɛo nibii baatsu nii loo efeŋ nakai jio lɛ, ebaaha enunyam kɛ emligbɛ hefɛo aje kpo faŋŋ. Enɛ baatsɔɔ nilee ni eyɔɔ akɛ, taakɛ Petro wiemɔi ni atsɛ sɛɛ yɛ yiteŋgbɛ lɛ tsɔɔ lɛ, nɔ ko yɛ ni hi fe hefɛo nibii.​​—⁠1 Timoteo 2:​9, 10.