Maŋtsɛyeli Jajelɔi Bɔ Amaniɛ

Teokrase lɛ Mlilɛɛmɔ yɛ Namibia

NYƆŊMƆ Maŋtsɛyeli lɛ he sanekpakpa lɛ yashɛ Namibia klɛŋklɛŋ kwraa yɛ afi 1920 afii lɛ anaagbee gbɛ. Kɛjɛ nakai be lɛ mli kɛbaa nɛɛ lɛ, gbɔmɛi ohai abɔ ni yɔɔ jalɛ tsuii lɛ ekpɛlɛ Nyɔŋmɔ shɛɛ sane kɛha yiwalaheremɔ lɛ nɔ. Niiashikpamɔi ni nyiɛ sɛɛ nɛɛ tsɔɔ bɔ ni Yehowa buaa nɛkɛ mɛi ni jara wa nɛɛ anaa ewoɔ esafo lɛ mli.​—⁠Hagai 2:7.

◻ Yehowa Odasefoi kɛ Paulus, ni ji okwaafonyo ko ni yɔɔ Namibia kooyigbɛ-bokagbɛ lɛ kpe klɛŋklɛŋ kwraa beni eyasara Windhoek, ni ji maŋ lɛ maŋtiase lɛ. Oya nɔŋŋ ni Paulus kpɛlɛ nɔ akɛ ena anɔkwale lɛ. Eku esɛɛ kɛtee shia ní ehiɛ Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo lɛ eko. Kɛkɛ ni beni efã gbɛ kɛtee Rundu, ni ji maŋ ni bɛŋkɛ fe fɛɛ ni Maŋtsɛyeli Asa yɔɔ jɛmɛ lɛ mli lɛ, Paulus na Odasefoi lɛ ni ekpa amɛ fai ni amɛbasara lɛ.

Shi kɛlɛ, gbɛ lɛ jɛkɛ tsɔ kɛha Odasefoi lɛ akɛ amɛaaba ni amɛkɛ Paulus abafee Biblia mli nikasemɔ daa otsi. Paulus nijiaŋ ejeee wui, ni ebɔi Biblia lɛ kasemɔ lɛ diɛŋtsɛ. Kɛfata he lɛ, ekɛ ekãa shiɛ nibii ni ekaseɔ lɛ etsɔɔ mɛi krokomɛi. Etsɛɛɛ ni ato Biblia kasemɔ kuu shishi. Beni kuu bibioo lɛ nu yɛ redio nɔ akɛ abaafee Yehowa Odasefoi akpee ko yɛ Rundu lɛ, amɛbua amɛnyɔmɔwoo ni faaa lɛ naa ni amɛto gbɛjianɔ kɛha tsɔne koni amɛnyɛ amɛya.

Mɛɛ niiashikpamɔ ni yɔɔ miishɛɛ eji kɛha amɛ nɛkɛ akɛ amɛkɛ Yehowa Odasefoi aaabɔ klɛŋklɛŋ kwraa! Ato gbɛjianɔ amrɔ nɔŋŋ koni nyɛmimɛi ni he esa ayasara nɛkɛ kuu nɛɛ daa. Ŋmɛnɛ, shiɛlɔi ekpaa yɛ akrowa ni Paulus yɔɔ mli lɛ mli.

◻ Akanya miishɛɛ ni Johanna yɔɔ yɛ Nyɔŋmɔ gbɛi lɛ mli lɛ beni enu ni mɔ ko miiwie Yehowa Odasefoi ahe efɔŋ lɛ. Egba akɛ: “Klɛŋklɛŋ kwraa ni minu gbɛi Yehowa lɛ, ebafee nɔ ni eka yɛ mijwɛŋmɔ mli, ni mibabɔi mɔ ni Yehowa ji lɛ he susumɔ. Mikɛ miwu yɛ Walvis Bay masɛi, yɛ Namibia ŋshɔnaagbɛ. Be ko lɛ wɔtee maŋ lɛ mli, ni mina Odasefoi komɛi ni miija Buu-Mɔɔ wolo tɛtrɛɛ yɛ gbɛjegbɛ lɛ nɔ. Akɛni miyɛ sanebimɔi babaoo hewɔ lɛ, mihe ekome ni mibi ni akɛ mi abafee Biblia mli nikasemɔ. Mifó beni amɛkɛɛ mi akɛ amɛnyɛŋ amɛba akɛni amɛtsɔne lɛ efite lɛ hewɔ. No sɛɛ etsɛɛɛ lɛ, miwu bagbo, ni miyahi shi yɛ Keetmanshoop. Aha gbɛgbalɔ krɛdɛɛ (be-fɛɛ sanekpakpa jajelɔ) ko nitsumɔ koni ebatsu nii yɛ jɛmɛ, kɛkɛ ni miŋɔ wolo ni ji Anɔkwale ni kɛ mɔ yaa Naanɔ Wala Mli Lɛ ekome kɛjɛ edɛŋ. Kɛjɛ shishijee beebe lɛ, miyɔse akɛ anɔkwale lɛ nɛ.

“Yɛ naagbee lɛ, aŋmɛ mi gbɛ ni mikɛ mihe awo shiɛmɔ nitsumɔ lɛ mli, shi gbɔmɔ gbeyeishemɔ ye minɔ. Beni minyiɛ kɛyaa shia kɛ shia lɛ, misɔle mibi Yehowa ni eha magbo moŋ fe ni ebaaha mashiɛ. Beni mikɛ mihe wo gbɛjegbɛ nɔ shiɛmɔ nitsumɔ lɛ mli klɛŋklɛŋ kwraa lɛ, miyatee mihe yɛ gbɛ fiŋtɔɔ ko mli, kɛ gbɛkpamɔ akɛ mɔ ko enaŋ mi. Shi yɛ naagbee lɛ, miná ekãa babaoo ni mikɛkpã wolo tɛtrɛɛ lɛ eko mli miha mɔ ko ni miiho, ni no dani mibɔ mɔdɛŋ mikɛɛ nɔ ko. Nakai gbi lɛ, kɛtsɔ Yehowa yelikɛbuamɔ nɔ lɛ, mikɛ mɛi babaoo gba mihiɛnɔkamɔ ni damɔ Biblia lɛ nɔ lɛ he sane.

“Ŋmɛnɛ, yɛ afii 12 sɛɛ lɛ, eyɛ mli akɛ mi ji ohiafo yɛ heloo gbɛfaŋ moŋ, shi mibuɔ gbɛgbamɔ nitsumɔ lɛ waa lolo akɛ ejara wa, ni miiya nɔ miiná miishɛɛ babaoo kɛmiijɛ Maŋtsɛyeli lɛ he anɔkwale ni mikɛ mɛi krokomɛi gbaa he sane lɛ mli.”