Beni ‘Wɔkpeɔ Ahum lɛ Naa Lɛ’

Beni etsɔɔ Yesu kaselɔi lɛ awala shihilɛ diɛŋtsɛ he niiashikpamɔ lɛ mli, be mli ni amɛbɔɔ mɔdɛŋ koni amɛkɛ lɛlɛ ko afo Galilea Ŋshɔ lɛ, Sanekpakpa ŋmalɔ Marko kɛɛ akɛ, “ena akɛ wirimɔ lɛ miitɔ amɛ; ejaakɛ amɛmiikpee kɔɔyɔɔ.” Beni Yesu yɔɔ ŋshɔ lɛ naa lɛ, ena haomɔ mli ni amɛyaje lɛ, ni etsɔ naakpɛɛ gbɛ nɔ enyiɛ ŋshɔ lɛ hiɛ kɛyanina amɛ. “Ni eba amɛŋɔɔ yɛ lɛlɛ lɛ mli; ni kɔɔyɔɔ lɛ fɔ̃ɔ tswaa.”—Marko 6:48-51.

Biblia ŋmalɔ nɛɛ nɔŋŋ bɔ amaniɛ akɛ yɛ be ni tsɔ hiɛ lɛ mli lɛ, “ahum babaoo tswa.” Kɛkɛ ni Yesu ‘fã kɔɔyɔɔ lɛ ni kɔɔyɔɔ lɛ fɔ̃ɔ tswaa ni eŋmɛ demm.’—Marko 4:37-39.

Eyɛ mli akɛ wɔ mɛi ni wɔyɔɔ wala mli ŋmɛnɛ nɛɛ naaa hegbɛ ni wɔna naakpɛɛ nifeemɔi ni tamɔ nɛkɛ moŋ, shi wɔbaanyɛ wɔkase nii babaoo kɛjɛ mli. Ákɛ adesai ni yeee emuu ni yɔɔ jaramɔ bei nɛɛ amli lɛ, wɔyeee wɔhe kɛjɛɛɛ ahum ni ji shitee-kɛ-woo lɛ naa. (2 Timoteo 3:1-5) Yɛ anɔkwale mli lɛ, bei komɛi lɛ wɔbaanu he akɛ naagbai ni jɛɔ aŋkroaŋkroi ahaomɔi amli baa lɛ tamɔ ahum ni mli ewo wu. Shi yelikɛbuamɔ yɛ! Yesu kɛ ninefɔɔ lɛ ha akɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛ jatsui fe nyɛ lɛ, ni maha nyɛ hejɔɔmɔ.”—Mateo 11:28.

Kɛ́ eba lɛ akɛ ‘wɔmiikpee ahum naa lɛ,’ wɔbaanyɛ ‘wɔná’ tsui. Yɛ mɛɛ gbɛ nɔ? Kɛtsɔ hekɛnɔfɔɔ ní wɔɔná yɛ Yehowa Nyɔŋmɔ shiwoi ni baa mli anɔkwale lɛ mli.—Okɛto Yesaia 55:9-11; Filipibii 4:5-7 he.