Nɔ ni Kɔɔ New York City lɛ He ni Ŋmɛɛ Lɛ

AKƐ okadi ni yɔɔ ŋwɛigbɛ nɛɛ ekpɛtɛ Buu Mɔɔ Asafo lɛ woji afeemɔ tsũi lɛ ateŋ ekome ni yɔɔ Brooklyn, New York lɛ he, kɛjɛ afii 1950 lɛ mli tɔŋŋ. Akaiɔ gbɛfalɔi, shisharalɔi, kɛ mɛi krokomɛi ni hoɔ yɛ jɛmɛ lɛ koni amɛkane Biblia lɛ daa. Wolo ni nyiɛ sɛɛ nɛɛ, ni nine shɛ nɔ kɛjɛ Odasefonyo gbekɛ yoo fioo ko dɛŋ lɛ tsɔɔ bɔ ni nɛkɛ kaimɔ nɛɛ emɔ shi jogbaŋŋ eha lɛ mli.

“Mikɛ miklasnyo ko miigba nɔ ni mitaoɔ mafee kɛji migbe nɔtsamɔ skul naa lɛ he sane. Mije shishi mibɔi Betel, ni ji Yehowa Odasefoi ajeŋ muu fɛɛ nitsumɔhe yitso lɛ he wiemɔ, ni ená miishɛɛ waa diɛŋtsɛ. Ekɛɛ mi akɛ ekɛ ewala gbii abɔ fɛɛ ehi New York Maŋtiase lɛ mli. Eweku lɛ jeee mɛi ni sumɔɔ jamɔ tsɔ, shi daa leebi kɛji ekwɛ kɛtsɔ samfɛlɛ lɛ mli lɛ, enaa okadi ko yɛ jɛmɛ ni kɛɔ akɛ ‘Kanemɔ Nyɔŋmɔ Wiemɔ ni Ji Biblia lɛ Daa.’ No hewɔ lɛ ekaneɔ e-Biblia lɛ daa dani eshiɔ shia kɛyaa skul.

“Beni eshi maŋtiase lɛ mli lɛ, ekɛɛ akɛ nɔ ni eŋmɛɛ lɛ yɛ New York City lɛ he ji akɛ, kɛji ete shi lɛ, enaaa kaimɔ nɔ akɛ ekane Biblia lɛ dɔŋŋ. Yɛ okadi ni yɔɔ Buu Mɔɔ Asafo lɛ tsũ lɛ nɔ lɛ hewɔ lɛ, Biblia kanemɔ ebatsɔ esu, no hewɔ lɛ eyaa nɔ ekaneɔ Biblia lɛ daa!”

Mɛni baanyɛ afee gbɛ ni hi fe fɛɛ ni yɔɔ ni akɛaaje gbi lɛ shishi fe kɛtsɔ Nyɔŋmɔ Wiemɔ lɛ fã ko ni aaakane nɔ! Kɛ ofee nakai lɛ, ŋwanejee ko bɛ he akɛ ohiɛ baasɔ bɔfo Paulo wiemɔi nɛɛ, akɛ: “Ŋmalɛi krɔŋkrɔŋi lɛ . . . aaanyɛ aha ole nii ni atsɔ Kristo Yesu nɔ hemɔkɛyeli nɔ kɛya yiwalaheremɔ mli lɛ.”— 2 Timoteo 3:15-17.