Nifeemɔ Krɛdɛɛ Ko—Ani Obaaya Eko?

GBI ko ni sa kaimɔ waa ni ba nɔ ni fe afii 3,500 ni eho nɛ lɛ, Yehowa Nyɔŋmɔ ha Israelbii ni ayeɔ amɛ nyɔŋ yɛ Mizraim lɛ gbe toobi ni amɛkɛ elá kpa amɛshiai lɛ ashinaa tsei lɛ ahe kɛ amɛnɔ hu. Nakai gbi lɛ gbɛkɛ lɛ, Nyɔŋmɔ bɔfo baho shiai ni akadi yɛ nɛkɛ gbɛ nɔ lɛ ahe shi egbe kromɔ-bi hii ni yɔɔ Mizraimbii lɛ fɛɛ ashiai amli. Kɛkɛ ni aha Israelbii lɛ ye amɛhe. Kɛjɛ nakai be lɛ mli kɛbaa nɛɛ, kɛ be ni akɛfee enɛ lɛ shɛ lɛ, Yudafoi lɛ yeɔ Hehoo lɛ akɛ gbi jurɔ.

Beni Yesu Kristo kɛ ebɔfoi lɛ gbe naagbee Hehoo lɛ yeli naa nɔŋŋ lɛ, eto niyenii ko shishi ema shi ni baakai efɔleshaa gbele lɛ. Ekɛ aboloo ha ebɔfoi anɔkwafoi lɛ ni ekɛɛ akɛ: “Nyɛhea, nyɛyea! Enɛ ji migbɔmɔtso lɛ.” No sɛɛ lɛ eha amɛ kpulu kɛ wein ni ekɛɛ: “Nyɛ fɛɛ nyɛnua eko, ejaakɛ enɛ ji milá ni ji kpaŋmɔ hee lɛ nɔ lɛ, ni abaafɔse ashwie shi yɛ mɛi pii ahewɔ kɛha eshaifaa lɛ.” Yesu kɛɛ hu akɛ: “Nyɛfea enɛ ni nyɛŋɔkai mi.” (Mateo 26:26-28; Luka 22:19, 20) No hewɔ lɛ Yesu fã esɛɛnyiɛlɔi lɛ akɛ amɛye egbele lɛ he kaimɔ nɛɛ.

Afi nɛɛ lɛ, abaaye Yesu gbele lɛ he gbijurɔyeli lɛ Shɔ, April 19, yɛ hulushinyɔɔ sɛɛ. Yehowa Odasefoi ni yɔɔ je lɛŋ fɛɛ lɛ baabua amɛhe naa yɛ nɛkɛ gbi gbɛkɛ krɛdɛɛ nɛɛ mli ni amɛye nɛkɛ Kaimɔ nɛɛ yɛ bɔ ni Yesu tsɔɔ akɛ afee lɛ lɛ naa. Akɛ miishɛɛ miikpee bo atuu koni obafata wɔhe kɛye gbi jurɔ nɛɛ. Ofainɛ, bi Yehowa Odasefoi ni yɔɔ he ni oyɔɔ lɛ koni amɛtsɔɔ bo be kɛ he tuuntu ni abaafee kpee lɛ yɛ.