Fɔlɔi Te Shi Amɛwo Tsɔɔlɔ ko Jwɛŋmɔ Fɔŋ Lɛ

Shishijee skul tsɔɔlɔ ko ni yɔɔ Cassano Murge, yɛ Italy lɛ kɛ woji ni aŋmala nɔ nibii ni akɛkpɛtɛɔ shi tsu gbekɛbii ní etsɔɔ amɛ nii lɛ ateŋ mɛi komɛi kɛtee shia. Woji ni akɛkpɛtɛɔ shi nɛɛ, ni yiŋtoo ni yɔɔ sɛɛ ji ni akɛkpɛtɛ shinaa naa lɛ nɔ niŋmaa lɛ kaneɔ akɛ: “Katolikbii ji wɔ. Aakɛɛ Yehowa Odasefoi akɛ amɛkatswa shinaa nɛɛ.”

Gbekɛbii nɛɛ afɔlɔi lɛ ateŋ mɛi komɛi te shi wo tsɔɔlɔ lɛ nifeemɔi nɛɛ waa eyɛ mli akɛ amɛ diɛŋtsɛ lɛ amɛjeee Yehowa Odasefoi. Taakɛ adafitswaa wolo Muoviti Muoviti lɛ tsɔɔ lɛ, fɔlɔi lɛ wie veveeve akɛ, ‘shɛɛ sane ni tamɔ nɛkɛ ni akɛhaa gbekɛbii lɛ baaha amɛkpoo mɔ fɛɛ mɔ ni susuuu nii ahe taakɛ amɛsusuɔ lɛ, aloo ebaaha amɛtsi amɛhe kɛjɛ mɔ ko he akɛni “esoro” mɔ lɛ jamɔ hewɔ.’ Fɔlɔ ko ni ŋma wolo eyaha adafitswaa wolo lɛ tsɛ́ wolo ni akɛkpɛtɛɔ shi lɛ akɛ “jwɛi dumɔwu, nɔ ni jɛ nilee ni abɛ mli kɛ buuluufeemɔ.”

Taakɛ amaniɛbɔɔ nɛɛ feɔ he nɔkwɛmɔnɔ lɛ, gbɔmɛi babaoo ni hiɛ jwɛŋmɔ ni ja lɛ yɔseɔ osharai ni yɔɔ mɛi ahe jwɛŋmɔ fɔŋ ni anáa lɛ he dumɔwu lɛ he. Agbɛnɛ hu, amɛyɛ bulɛ kɛha Kristofoi asɔɔmɔ nitsumɔ ni Yehowa Odasefoi tsuɔ yɛ Italy kɛ je lɛŋ fɛɛ lɛ. Mɛni hewɔ ni obiii Yehowa Odasefoi lɛ koni amɛtsɔɔ bo ‘yiŋtoo ni yɔɔ amɛ hiɛnɔkamɔ lɛ sɛɛ’ lɛ? Amɛbaasumɔ waa ni amɛkɛ bo agba he sane, ni amɛbaafee nakai kɛ ‘bulɛ ni mli kwɔ babaoo.’—1 Petro 3:15.