Mɛni Hewɔ Esa akɛ Okɛ Sane Ake?

TAAKƐ The Toronto Star ni jɛ Canada lɛ tsɔɔ lɛ: “Jeŋ nilelɔi ekpá shi ni amɛna akɛ sane ni akɛkeɔ lɛ baanyɛ eha henumɔŋ—kɛ, nɔ ni baanyɛ afata he kwraa ni ji gbɔmɔtsoŋ—hewalɛnamɔ aya hiɛ jogbaŋŋ.” Ni kɛlɛ, Nilelɔ Carl Thoresen ni yɔɔ Stanford University yɛ U.S.A., ni ji niiamlipɛilɔi lɛ ahiɛnyiɛlɔ kɛha Stanford Forgiveness Project (Stanford Eshaifaa He Niiamlipɛimɔ) lɛ kɛɛ akɛ, “mɛi fioo ko pɛ nuɔ nɔ ni eshaifaa ji lɛ shishi kɛ bɔ ni etsuɔ nii ehaa.”

Abuɔ sane ni akɛkeɔ yɛ anɔkwayeli mli lɛ akɛ Kristojamɔ lɛ fã ko ni he hiaa. The Toronto Star amaniɛbɔɔ lɛ tsɔɔ shishi akɛ “ní oooyɔse akɛ atɔ̃ onɔ, ní oooŋmɛɛ mlifu fɛɛ ni ejɛ mli kɛba lɛ he, ní yɛ naagbee lɛ okɛ mɔ ni tɔ̃ onɔ lɛ aye kɛ mlihilɛ kɛ suɔmɔ po.” Esa akɛ ana akɛ srɔtofeemɔ yɛ no kɛ tɔmɔ ko ni aaakpɛlɛ nɔ kɛfĩ sɛɛ, ní aaatao naajiemɔ, ní hiɛ aaakpa nɔ, loo ní aaakɛɛ akɛ afeko nakai lɛ teŋ; ni etsɔɔɔ osɛɛ ni oooku ni okɛ ohe ayawo shihilɛ ko ni esaaa mli. Amaniɛbɔɔ lɛ kɛɛ akɛ, nɔ ni haa ajieɔ eshaifaa kpakpa kpo ji “ní aaaŋmɛɛ mlifu kɛ henumɔi ni esaaa lɛ he.”

Niiamlipɛilɔi kɛɔ akɛ, gbɔmɔtsoŋ sɛɛnamɔi ni jɛɔ sane ni akɛkeɔ lɛ mli kɛbaa lɛ he nikasemɔ babaoo he miihia. Shi kɛlɛ, amɛbɔɔ jwɛŋmɔŋ sɛɛnamɔi ni jɛɔ mli baa lɛ he amaniɛ, ni nɔ ni fata he ji “nɔnyɛɛ fioo, tsuiyeli fioo kɛ naagba fioo ni anáa.”

Yiŋtoo ko ni hi jogbaŋŋ ni tsɔɔ akɛ esa akɛ akɛ sane ake lɛ ji nɔ ni atsɔɔ yɛ Efesobii 4:32, ní kɛɔ akɛ: “Nyɛmli ahia ahaa nyɛhe, nyɛmusuŋ atsɔa nyɛ yɛ nyɛhe, nyɛŋɔfafaa nyɛhe, taakɛ bɔ nɔŋŋ ni Nyɔŋmɔ ŋɔfa nyɛ yɛ Kristo mli lɛ.” (Wɔma efã ko nɔ mi.) Kɛ aawie eshaifaa he taakɛ eji yɛ nibii krokomɛi ahe lɛ, awoɔ wɔ hewalɛ koni wɔkase Nyɔŋmɔ.—Efesobii 5:1.

Kɛ wɔsumɔɔɔ ni wɔkɛ mɛi krokomɛi ahe eshai keɔ amɛ yɛ be mli ni wɔyɛ nɔ ni wɔɔdamɔ nɔ wɔjie mɔbɔnalɛ kpo lɛ, ebaanyɛ esa wɔ diɛŋtsɛ kɛ Nyɔŋmɔ teŋ wekukpaa he yɛ gbɛ ni esaaa nɔ. Yehowa kpaa gbɛ akɛ wɔkɛ sane aaakekee wɔhe. No dani wɔbaanyɛ wɔsɔle ni ekɛ wɔhe eshai ake wɔ.—Mateo 6:14; Marko 11:25; 1 Yohane 4:11.