Nitsumɔi Kpakpai Woɔ Nyɔŋmɔ Hiɛ Nyam

MƐI ni sumɔɔ Nyɔŋmɔ lɛ bɔɔ mɔdɛŋ ni amɛjie mumɔŋ la ni yɔɔ e-Wiemɔ, ni ji Biblia lɛ mli lɛ kpo. Yɛ nɛkɛ gbɛ nɔ lɛ, amɛnyiɛɔ Yesu famɔ nɛɛ sɛɛ, akɛ: “Nyɛhaa nyɛla atsoa yɛ gbɔmɛi ahiɛ, koni amɛna nyɛnifeemɔnii kpakpai lɛ, ni amɛwo nyɛtsɛ ni yɔɔ ŋwɛi lɛ hiɛ nyam.” (Mateo 5:16) Wiemɔi ni akɛ naabu wieɔ kɛ agbɛnɛ jeŋba kpakpa baanyɛ awo Nyɔŋmɔ hiɛ nyam.

Yehowa Odasefoi taoɔ ni amɛsa Nyɔŋmɔ hiɛ kɛtsɔ nibii ni kɛ Biblia lɛ kpãa gbee ni amɛfeɔ, kɛ mɔdɛŋ ni amɛbɔɔ ni amɛye amɛbua mɛi krokomɛi yɛ mumɔŋ lɛ nɔ. Amɛfeɔ enɛ yɛ shikpɔji ni akɛ amɛmaŋ shiɛmɔ nitsumɔ lɛ woko mla shishi yɛ mli lɛ po nɔ. Yɛ maji nɛɛ ateŋ ekome maŋtiase mli lɛ, Odasefoi lɛ feɔ daa afi kpee wuji yɛ jɛmɛ, ni gbɔmɛi aaafee 6,000 kɛmiishɛ 9,000 baa shishi. Yɛ henaabuamɔi ni tamɔ enɛɛmɛi ahenɔ lɛ, amɛhaiɔ asai yɛ hei ni ajieɔ nibii heei akpo yɛ. Taakɛ amɛna yɛ afii ni tsɔ hiɛ lɛ mli lɛ, dani amɛkpee ni amɛfee yɛ afi 1999 mli lɛ aaashɛ lɛ, Odasefoi ohai abɔ tsu nii waa ni amɛkɛsaa nibii ni yɔɔ jɛmɛ lɛ, ni amɛto tsɔne ni awieɔ awoɔ mli kɛ sɛii akpei abɔ he gbɛjianɔ.

Ayɔse hesaamɔi nɛɛ fɛɛ. Tsũ lɛ nɔkwɛlɔi lɛ yɔse nitsumɔi nɛɛ. Amɛna hu akɛ, eyɛ mli akɛ aná yifalɛ ni fe fɛɛ ni ji mɛi 15,666 moŋ, shi nɔ fɛɛ nɔ tee nɔ pɛpɛɛpɛ, ni Odasefoi lɛ to gbɛjianɔ jogbaŋŋ. Jɛmɛ nitsulɔi lɛ hu ná bɔ ni aha jɛmɛ fee falefale yɛ kpee lɛ sɛɛ lɛ he miishɛɛ waa.

Tsũ lɛ nɔkwɛlɔi lɛ jie hiɛsɔɔ kpo kɛha enɛɛmɛi fɛɛ, ni amɛkɛ Odasefoi lɛ fata mɛi ni he hiaa ni yɔɔ amɛwoji amli lɛ ahe bɔni afee ni aha amɛ hegbɛ klɛŋklɛŋ ni amɛkahai tsũ lɛ yɛ afi ni nyiɛ sɛɛ lɛ mli. Shi tsũ lɛ nɔkwɛlɔi lɛ fee babaoo po. Yɛ July 15, 1999 lɛ, amɛkɛ hiɛsɔɔ jweremɔ nii ha kpee lɛ ajinafoi lɛ. Nɔ ni aŋma yɛ tao lɛ nɔ ji wiemɔi nɛɛ, “Yehowa Odasefoi asafo lɛ”—nɔ ko ni akpaaa gbɛ yɛ maŋ ko ni amɛ Biblia tsɔsemɔ nitsumɔ lɛ yɔɔ naatsii shishi lɛ mli.

Yɛ je lɛŋ he fɛɛ he yɛ afi 2000 kɛ afi 2001 mli lɛ, aakpa mɛi akpekpei abɔ gbɛ akɛ amɛbaaya Yehowa Odasefoi “Nyɔŋmɔ Wiemɔ lɛ Nɔyelɔi” Kpokpaa nɔ Kpeei ohai abɔ ni abaafee lɛ shishi. Kɛ otee shishi lɛ, bo diɛŋtsɛ obaana bɔ ni mɛi ni jɛɔ anɔkwale mli amɛfeɔ nɔ ni Biblia lɛ kɛɔ lɛ kɛ amɛhe woɔ nitsumɔi kpakpai ni woɔ Nyɔŋmɔ hiɛ nyam lɛ mli.