Nilee ni Jɛ Nyɔŋmɔ Ŋɔɔ—Mɛɛ Gbɛ Nɔ Ajieɔ lɛ Kpo?

“ABUUU ohiafo nilee, ni ewiemɔi hu abooo toi.” Nilelɔ Maŋtsɛ Salomo kɛ nɛkɛ wiemɔi nɛɛ mu sane ni egba ni kɔɔ ohiafo ko ni yɔɔ nilee ni here maŋ muu yiwala kɛjɛ hiɛkpatamɔ mli lɛ naa. Shi mɔbɔ sane ji akɛ, “mɔ ko mɔ ko kaii nakai nuu ohiafo lɛ.”—Jajelɔ 9:14-16.

Adesai ebuuu mɛi ni yeɔ ohia lɛ, kɛji akɛ nɛkɛ ohiafoi nɛɛ efee nibii wuji po. Enɛ ji anɔkwale yɛ Yesu gbɛfaŋ. Yesaia gba yɛ ehe akɛ: “Agbe ehe guɔ ni gbɔmɛi kwá lɛ, hejaramɔ gbɔmɔ ni, ni ele hela.” (Yesaia 53:3) Akwa Yesu kɛkɛ ejaakɛ eshihilɛ tamɔɔɔ hiɛnyiɛlɔi ni yɔɔ ebeaŋ lɛ aloo yɛ bɔ ni ale amɛ waa hewɔ. Shi kɛlɛ, eyɛ nilee ni nɔ kwɔ kwraa fe adesai ni yeee emuu lɛ anɔ. Gbɔmɛi ni yɔɔ Yesu diɛŋtsɛ maŋ lɛ nyɛɛɛ ahe aye akɛ nɛkɛ ‘kapintɛfonyo bi’ nɛɛ ji mɔ ni jieɔ nilee ni tamɔ nɛkɛ kpo ni etsuɔ hewalɛ nibii nɛɛ. Shi nakai nifeemɔ lɛ ji tɔmɔ ni hiɛdɔɔ yɔɔ mli, ejaakɛ nɔ ni aŋma afɔ̃ shi lɛ tee nɔ etsɔɔ akɛ, ‘akɛni amɛheee amɛyeee hewɔ lɛ, Yesu efeee hewalɛ nii pii ko yɛ jɛmɛ.’ Kwɛ nii wulu ni ŋmɛɛ amɛ!—Mateo 13:54-58.

Eba akɛ wɔ hu wɔtɔŋ nakai tɔmɔ lɛ eko. Yesu kɛɛ akɛ: “Abu nilee jalɔ kɛtsɔ enitsumɔi anɔ.” Jeee shihilɛ mli nii ni mɔ ko yɔɔ lɛ nɔ adamɔɔ anaa nilee ni eyɔɔ, shi anaa enɛ kɛtsɔɔ mɛi ni tsuɔ Nyɔŋmɔ nitsumɔ ni amɛkɛ ŋwɛi nilee haa mɛi krokomɛi lɛ nɔ.—Mateo 7:18-20; 11:19.