Nɔ ni Wɔkaseɔ Kɛjɛɔ Amlaku lɛ Ŋɔɔ

WIRIMƆ ní mɔ kome too aaawiri yɛ ŋshɔ hiɛ lɛ baanyɛ afee nɔ ni tɔɔ mɔ waa. Hewalɛ ni gbeɔ henumɔi ni jɛɔ tɔlɛ mli baa lɛ baanyɛ atsirɛ amlaku lɛ yisɛɛ yɛ gbɛ mlɛo nɔ kɛteke husu ko ni yɔɔ oshara, ni ebaaha etɔ̃ ni efee yiŋkpɛi ni ejaaa. Yɛ yiŋtoo nɛɛ hewɔ lɛ, ehiɛ sɔɔ bɔ ni sɛɛnamɔ yɔɔ ŋshɔŋ sɛ́kɛ lɛ he. Ehaa amlaku ko ni nijiaŋ eje wui lɛ jɔɔ ehe ni enáa hewalɛ ekoŋŋ ní egbaaa afã bɔni esaaa. Yɛ nakai beaŋ nɔŋŋ lɛ, ŋshɔŋ sɛ́kɛ lɛ nyɛɔ lɛlɛ lɛ hiɛgbɛ lɛ nɔ koni ekɛ ehiɛ atsɔɔ kɔɔyɔŋ, ni ŋshɔkei lɛ haa lɛlɛ lɛ hiɔ gbɛhe ko ni yɔɔ shiŋŋ mli.

Bɔni amlakui kɛ osharai babaoo kpeɔ yɛ ŋshɔ hiɛ lɛ, nakai nɔŋŋ Kristofoi kɛ je nɛŋ nɔnyɛɛi ni baa daa lɛ kpeɔ ni amɛnuɔ hiamɔ kɛha hejɔɔmɔ he. Yɛ anɔkwale mli lɛ, be ko lɛ Yesu jie yi eha ekaselɔi lɛ akɛ: “Nyɛ sɔŋŋ nyɛbaa ni wɔtea ŋa lɛ nɔ he ko banee, ni nyɛyajɔa nyɛhe fioo.” (Marko 6:31) Ŋmɛnɛ, mɛi komɛi baaŋɔ otsii fioo komɛi kɛfã gbɛ loo amɛkɛ amɛweku lɛ baaya ayaye otsi ko kɛjɔɔ amɛhe. Nɛkɛ bei nɛɛ baanyɛ afee nɔ ni haa mɔ mii shɛɔ ehe kɛ hewalɛwoo nɔ̃. Shi kɛlɛ, te wɔɔfee tɛŋŋ wɔná nɔmimaa akɛ wɔyɛ shweshweeshwe yɛ mumɔŋ yɛ bei ni tamɔ nɛkɛ mli? Mɛni baanyɛ atsu nii akɛ wɔmumɔŋ sɛ́kɛ koni eye ebua wɔ ni wɔkpoo afã ní wɔɔgba koni wɔhiɛ shidaamɔ ni yɔɔ shiŋŋ mli?

Yehowa ejɛ mlihilɛ mli eto gbɛjianɔ ko eha wɔ. Ejeee nɔ ko nɔ ko fe e-Wiemɔ Krɔŋkrɔŋ, ni ji Biblia lɛ. Kɛtsɔ ekanemɔ daa gbi nɔ lɛ, wɔbaanyɛ wɔbɛŋkɛ Yehowa ni wɔgbaŋ afã kɔkɔɔkɔ kɛjɛŋ ehe. Emli ŋaawoo baanyɛ aha wɔfi shi shiŋŋ ni ebaaha wɔnyɛ wɔdamɔ Satan kɛ eje lɛŋ kaai lɛ anaa. Biblia kanemɔ he gbɛjianɔtoo lɛ ni wɔɔhiɛ mli daa lɛ, kɛji ejeee nɔ ni yɔɔ wɔdaa gbɛjianɔtoo lɛ mli po lɛ, baanyɛ aŋmɛ wɔ sɛ́kɛ yɛ mumɔŋ.—Yoshua 1:7, 8; Kolosebii 2:7.

Lalatsɛ lɛ kaiɔ wɔ akɛ: “Ajɔɔ gbɔmɔ” ni “Yehowa mla lɛ he emii shɛɔ yɛ, ni emla lɛ he nɔŋŋ ejwɛŋɔ shwane kɛ nyɔɔŋ!” (Lala 1:1, 2) “Miishɛɛ” ni baajɛ Nyɔŋmɔ Wiemɔ lɛ ni wɔɔkane daa lɛ mli kɛba ji nɔ ni haa mɔ mii shɛɔ ehe yɛ anɔkwale mli kɛ hewalɛwoo nɔ̃, ni saa wɔ koni wɔtsa wɔ Kristofoi agbɛ lɛ nɔ nyiɛmɔ lɛ nɔ.