Toiŋjɔlɛ Kɛha Afii Akpe Hee Lɛ?

AGBELE International Year for the Culture of Peace (Majimaji Ateŋ Afi Kɛha Toiŋjɔlɛ Nifeemɔ) lɛ naa yɛ Paris kɛ New York City yɛ September 14, 1999 mli. Jeŋmaji Ekomefeemɔ lɛ Maji Anajiaŋdamɔlɔi lɛ jaje enɛ kɛha afi 2000 lɛ. Federico Mayor, ni ji tsutsu UNESCO nukpa lɛ kɛ hiɛdɔɔ kpa fai “koni ato jeŋ muu fɛɛ kuu ko kɛha nifeemɔ ko ni kɛ toiŋjɔlɛ baa ni basabasafeemɔ bɛ mli ama shi.”

UNESCO yɛ abɛbua ko ni kɛɔ akɛ, “akɛni ta jeɔ shishi kɛjɛɔ gbɔmɛi ajwɛŋmɔi amli hewɔ lɛ, gbɔmɛi ajwɛŋmɔi amli nɔŋŋ ebiɔ akɛ atswa hebui kɛha toiŋjɔlɛ ama shi yɛ.” Yɛ enɛ kɛ gbeekpamɔ naa lɛ, gbɛjianɔtoo lɛ ekpɛ eyiŋ akɛ ebaaha nifeemɔ ni kɛ toiŋjɔlɛ baa lɛ aya hiɛ kɛtsɔ “tsɔsemɔ, niiahesusumɔ, kɛ ekomefeemɔ nɔ.” Ow. Mayor kɛɛ akɛ efaaa akɛ “abaahi shi yɛ toiŋjɔlɛ mli, ejeee nɔ ni fa po akɛ abaafee mɛi ni teɔ shi woɔ ta kɛkɛ, shi moŋ ni afee mɛi ni kɛ toiŋjɔlɛ baa.”

Mɔbɔ sane ji akɛ, afi 2000 lɛ bɛŋkɛɛɛ toiŋjɔlɛ he kwraa. Ŋmɛnɛŋmɛnɛ beaŋ yinɔsane—ni nibii ni etee nɔ yɛ afi 2000 lɛ mli lɛ fata he lɛ—ema nɔ mi akɛ gbɔmɔ nyɛŋ atsĩ ta kɛ basabasafeemɔ naa yɛ mɔdɛŋ ni ebɔɔ yɛ anɔkwayeli mli lɛ fɛɛ sɛɛ.

Shi kɛlɛ, esa kadimɔ ákɛ akɛ toiŋjɔlɛ toɔ tsɔsemɔ he. Afii 2,700 komɛi ni eho lɛ, gbalɔ Yesaia gba akɛ: “Ni obii lɛ fɛɛ aaafee Yehowa kaselɔi, ni maha obii lɛ hejɔlɛ babaoo.” (Yesaia 54:13, wɔma efã ko nɔ mi.) Nakai gbalɔ lɛ nɔŋŋ tsɔ hiɛ ena be ko ni jeŋmaji fɛɛ amli bii aaaho kɛaaba Yehowa Nyɔŋmɔ jamɔ krɔŋŋ lɛ he koni amɛbakase E-gbɛ̀i lɛ. Mɛni baajɛ mli aba? “Amɛkɛ amɛklantei aaasɔ̃ kɔii ni amɛkɛ amɛkpɔlɔi hu aaasɔ̃ adedai. Jeŋmaŋ ko woŋ klante nɔ eshiŋ jeŋmaŋ ko, ni amɛkaseŋ tawuu dɔŋŋ!” (Yesaia 2:2-4, wɔma efã ko nɔ mi.) Yɛ nakai gbalɛ lɛ kɛ gbeekpamɔ naa lɛ, Yehowa Odasefoi kɛ amɛhe ewo jeŋ muu fɛɛ tsɔsemɔ nitsumɔ ko ni eye ebua akpekpei abɔ momo koni amɛnyɛ amɛye maŋkwramɔ kɛ hewolonɔ su mli hetsɛ ni kɛ tai babaoo ni awuɔ lɛ baa lɛ nɔ kunim.

Yɛ naagbee lɛ tai baafee nɔ ni bɛ dɔŋŋ yɛ Nyɔŋmɔ Maŋtsɛyeli ni kɛ toiŋjɔlɛ kɛ shweshweeshwe shihilɛ ni hiɔ shi daa baaba shikpɔŋ lɛ nɔ lɛ shishi. (Lala 72:7; Daniel 2:44) Kɛkɛ lɛ, lalatsɛ lɛ wiemɔi lɛ baaba mli akɛ: “Nyɛbakwɛa Yehowa nitsumɔi lɛ, nɔ̃ hiɛkpatamɔ ni eha eba shikpɔŋ lɛ nɔ lɛ! Ehãa tai asɛɛ foɔ kɛyaa shikpɔŋ lɛ naagbeehei lɛ.”—Lala 46:9, 10.