Ani Hiɛnɔkamɔ ko Yɛ Kɛha Yiwalaheremɔ?

Átsɛ afii ohai 20 lɛ akɛ afii ohai ni ashwie lá shi babaoo yɛ mli lɛ ateŋ ekome ni adesai ena pɛŋ. Awuiyeli, tai, weku mli béi, tsofai fɔji kɛ nitsumɔ, anɔkwa ni ayeee, kɛ basabasafeemɔ titri efa babaoo yɛ naagbee afii nyɔŋmai fioo ni eho nɛɛ mli. Nɔ ni fata enɛ he ji piŋmɔ kɛ nɔnaa ni baa kɛjɛɔ hela, gbɔlɛ kɛ gbele mli lɛ. Namɔ yɔɔ ni eshweee akɛ eeená kpɔmɔ kɛaajɛ haomɔi babaoo ni yɔɔ je lɛŋ ŋmɛnɛ lɛ mli? Be mli ni wɔkwɛɔ wɔsɛɛ be gbɛ lɛ, ani hiɛnɔkamɔ ko yɛ kɛha yiwalaheremɔ?

SUSUMƆ ninaa ni ajie lɛ kpo atsɔɔ bɔfo Yohane aaafee afii 2,000 ni eho nɛ lɛ he okwɛ. Eŋma akɛ: “Naa, Nyɔŋmɔ buu lɛ yɛ gbɔmɛi ateŋ, ni eeeshi ebuu lɛ yɛ amɛteŋ, ni amɛaatsɔmɔ emaŋ, ni Nyɔŋmɔ diɛŋtsɛ kɛ amɛ aaahi shi, ni eeetsɔ amɛ-Nyɔŋmɔ. Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.” (Kpojiemɔ 21:3, 4) Gbalɔ Yesaia hu gba nakai akɛ: “Eeemi gbele kɛaatee naanɔ; ni Nuntsɔ Yehowa aaatsumɔ hiɛaŋ fɛɛ yaafonui, ni eeejie emaŋ lɛ hiɛgbele lɛ yɛ shikpɔŋ muu lɛ fɛɛ nɔ; ejaakɛ Yehowa ekɛɛ.”—Yesaia 25:8.

Susumɔ nɔ ni Nyɔŋmɔ shiwoi lɛ amlibaa baatsɔɔ lɛ he okwɛ! Abaajie adesai, loo abaakpɔ̃ amɛ kɛjɛ nɔnyɛɛ kɛ basabasafeemɔ mli, kɛbaajɛ nibii ni kɛ piŋmɔ kɛ amanehulu baa lɛ amli. Hɛɛ, hela, gbɔlɛ, kɛ gbele tete po haoŋ wɔ! Nyɔŋmɔ Wiemɔ, ni ji Biblia lɛ wo naanɔ wala yɛ shihilɛ ni yeɔ emuu mli yɛ shikpɔŋ nɔ lɛ he shi. (Luka 23:43; Yohane 17:3) Ni eyɛ kɛha mɛi fɛɛ ni sumɔɔ. “[Nyɔŋmɔ] sumɔɔ akɛ ehere gbɔmɛi fɛɛ yiwala, koni amɛshɛ anɔkwale lɛ lee mli.”—1 Timoteo 2:3, 4.

Shi kɛlɛ, bɔni afee ni wɔná Nyɔŋmɔ shiwoi lɛ ahe sɛɛ lɛ, esa akɛ wɔnu gbɛfaŋnɔ ni Yesu Kristo tsuɔ he nii yɛ wɔyiwalaheremɔ mli lɛ shishi koni wɔná hemɔkɛyeli yɛ emli. Yesu diɛŋtsɛ kɛɛ akɛ: “Nyɔŋmɔ sumɔ je lɛ aahu akɛ eŋɔ e-Bi koome lɛ eha, bɔni afee ni akakpata mɔ fɛɛ mɔ ni baana emli hemɔkɛyeli lɛ hiɛ, shi moŋ ena naanɔ wala.” (Yohane 3:16, NW) Beni bɔfo Petro tsɔɔ gbɛfaŋnɔ ni Yesu Kristo tsuɔ he nii yɛ sane nɛɛ mli lɛ, ekɛɛ akɛ: “Yiwalaheremɔ bɛ mɔ ko mɔ ko mli; ni asaŋ gbɛi kroko hu bɛ ŋwɛi shishi ni aŋɔha gbɔmɛi ni sa akɛ atsɔ nɔ ahere wɔyiwala.” (Bɔfoi lɛ Asaji 4:12) Bɔfo Paulo kɛ enaanyo Sila wo nuu ko ni miitao ale nii yɛ anɔkwale mli lɛ hewalɛ akɛ: “Hemɔ Nuntsɔ Yesu Kristo lɛ nɔ oye, ni aaahere okɛ owe lɛ fɛɛ yiwala.”—Bɔfoi lɛ Asaji 16:30, 31.

Hɛɛ, Yesu Kristo ji ‘wala Lumɔ lɛ,’ ni lɛ pɛ enɔ abaanyɛ atsɔ aná yiwalaheremɔ. (Bɔfoi lɛ Asaji 3:15) Shi te aaafee tɛŋŋ ni gbɔmɔ kome aaafee mɔ tuuntu ni yeɔ ebuaa koni ahere wɔyiwala? Esa akɛ gbɛfaŋnɔ ni etsuɔ he nii yɛ enɛ mli lɛ shishi ni wɔɔnu jogbaŋŋ lɛ awo wɔhiɛnɔkamɔ kɛha yiwalaheremɔ lɛ mli hewalɛ.

[Hei ni Mfonirii ni yɔɔ baafa 2 lɛ Jɛ]

Baafa 3: Okpɛlɛm tswialɔi: USAF photo; gbekɛbii ni hɔmɔ miigbe amɛ: UNITED NATIONS/J. FRAND; tawuu lɛlɛ ni la miishã: U.S. Navy photo