“Mileee Nibii Babaoo yɛ Nyɔŋmɔ he”

NUU ko ni yɔɔ Kerala, India lɛ ŋma akɛ: “Yɛ afi ni ho lɛ mli lɛ, Yehowa Odasefoi basaraa mi ni amɛgbaa mi sanekpakpai ni yɔɔ naakpɛɛ ni kɔɔ Nyɔŋmɔ Maŋtsɛyeli lɛ he lɛ. Mikɛ afii kpaanyɔ ehi shi akɛ Katoliknyo, shi mileee nibii babaoo yɛ Nyɔŋmɔ he. Yɛ afi kome nɛɛ pɛ mli lɛ, mikase nibii babaoo.” Etsa nɔ akɛ: “Miná miishɛɛ babaoo akɛ mile akɛ akalaa Buu-Mɔɔ lɛ yɛ wiemɔi 139 [amrɔ nɛɛ 146] mli. Eyɛ naakpɛɛ akɛ gbɔmɛi ni jɛ wiemɔi srɔtoi fɛɛ amli lɛ miiba ni amɛbale shɛɛ sane ni kɔɔ Nyɔŋmɔ he lɛ.”

Eyɛ mli akɛ jeŋ nilelɔi babaoo ekɛɛ akɛ anyɛŋ ale Nyɔŋmɔ moŋ, shi bɔfo Paulo fee lɛ faŋŋ akɛ abaanyɛ ale lɛ. Beni Paulo kɛ Ateenebii komɛi ní sɔmɔɔ yɛ afɔleshaa latɛ ni ajɔɔ nɔ aha “Nyɔŋmɔ ni aleko” lɛ he lɛ wieɔ lɛ, ekɛɛ akɛ: “Mɔ ni nyɛleee lɛ ni nyɛjáa lɛ kɛ̃ lɛ, lɛ nɔŋŋ ehe sane mijajeɔ mitsɔɔ nyɛ nɛɛ. Nyɔŋmɔ ni fee je lɛ kɛ emli nibii fɛɛ, . . . edɛŋ wala kɛ mumɔ kɛ nii fɛɛ jɛɔ haa gbɔmɛi fɛɛ; ni lá kome eŋɔfee gbɔmɛi adesai fɛɛ, ni amɛhi shikpɔŋ lɛ fɛɛ hiɛ.”—Bɔfoi lɛ Asaji 17:23-26.

Paulo wo etoibolɔi lɛ hewalɛ koni amɛtao Bɔlɔ lɛ ni amɛle lɛ ejaakɛ “ekɛ wɔteŋ mɔ fɛɛ mɔ teŋ jɛkɛɛɛ.” (Bɔfoi lɛ Asaji 17:27) Yehowa Odasefoi baaná he miishɛɛ akɛ amɛaaye amɛbua bo koni ole anɔkwa Nyɔŋmɔ lɛ kɛ esui ni asumɔɔ lɛ.