Mɛɛ Gbɛi Nɛkɛ Ofeɔ Ohaa Ohe?

ANI okane gbele he adafitswaa ko yɛ omaŋ lɛ adafitswaa wolo lɛ mli loo okane amaniɛbɔɔ ko ni sɛɛ kɛ ni kɔɔ mɔ ko ni egbo lɛ wala shihilɛ mli sane kɛ nibii ni enyɛ etsu ni aŋmala ashwie shi lɛ he pɛŋ? Ani óbi ohe akɛ, ‘Mɛni mɛi kɛɔ yɛ mihe?’ Mɛi enyiɛ po esusu bɔ ni abaakai amɛ aha yɛ amɛgbele sɛɛ lɛ he pɛŋ? No hewɔ lɛ, susumɔ sanebimɔi ni yɔɔ faŋŋ nɛɛ ahe okwɛ: Mɛni mɛi baakɛɛ yɛ ohe ŋmɛnɛ kɛji eba lɛ akɛ ogbo nyɛ? Mɛɛ gbɛi nɛkɛ ofeɔ ohaa ohe? Te obaasumɔ ni mɛi ni le bo lɛ kɛ agbɛnɛ Nyɔŋmɔ akai bo aha tɛŋŋ?

Nilelɔ ni ŋma Biblia mli wolo ni ji Jajelɔ lɛ kɛɛ akɛ: “Gbɛi kpakpa hi fe mu kpakpa, ni gbele gbi hi fe fɔmɔ gbi.” (Jajelɔ 7:1) Mɛni haa ni mɔ ko gbele gbi hiɔ fe efɔmɔ gbi lɛ? Ejaakɛ yɛ mɔ lɛ fɔmɔ mli lɛ, efeko nɔ ko ni baaha ená gbɛi kpakpa. Ebɛ wala shihilɛ he sane ko kwraa ni aŋmala ashwie shi. Shihilɛ gbɛ ni ebaakɔ lɛ baaha ená gbɛi kpakpa loo gbɛi gbonyo. Kɛha mɛi ni amɛfee gbɛi kpakpa amɛha amɛhe yɛ afii abɔ ni eho lɛ amli lɛ, gbele gbi lɛ bafeɔ nɔ ni hi diɛŋtsɛ fe fɔmɔ gbi.

No hewɔ lɛ, wɔyɛ nɔ ni wɔbaahala. Yɛ anɔkwale mli lɛ, daa gbi lɛ wɔyɛ nibii babaoo ni wɔbaahala ní yɛ wɔgbele sɛɛ lɛ, ebaatsɔɔ kɛji wɔfee gbɛi kpakpa loo gbɛi gbonyo wɔha wɔhe, titri lɛ bɔ ni Nyɔŋmɔ baakai wɔ aha. No hewɔ lɛ, nakai Hebri nilelɔ lɛ nɔŋŋ ŋma akɛ: “Kɛ́ akai jalɔ lɛ, ajɔɔ lɛ; shi mɛi fɔji agbɛi lɛ aaashara.” (Abɛi 10:7) Mɛɛ woo po eeeji nɛkɛ—ákɛ Nyɔŋmɔ aaakai wɔ koni ejɔɔ wɔ!

Kɛ́ wɔkɛ nilee tsuɔ nii lɛ, wɔkɛbaafee oti ni ma wɔhiɛ akɛ wɔbaasa Nyɔŋmɔ hiɛ kɛtsɔ ní wɔɔha wɔshihilɛ kɛ eshishitoo mlai lɛ akpã gbee lɛ nɔ. No tsɔɔ akɛ wɔkɛ shishijee shishitoo mlai ni Kristo wie he lɛ baatsu nii, akɛ: “‘Suɔmɔ [Yehowa, NW] o-Nyɔŋmɔ lɛ, kɛ otsui muu lɛ fɛɛ kɛ osusuma muu lɛ fɛɛ kɛ ojwɛŋmɔ muu lɛ fɛɛ.’ Kitai lɛ amli otu kɛ ewulu nɛ. Ni nɔ ni nyiɛ sɛɛ lɛ tamɔ no, akɛ: ‘Suɔmɔ onaanyo tamɔ bɔ ni osumɔɔ bo diɛŋtsɛ ohe.’ Kitai enyɔ nɛɛ mla lɛ kɛ gbalɔi lɛ fɛɛ tsotsoro.”—Mateo 22:37-40.

Akaiɔ mɛi komɛi akɛ mɛi ni jieɔ suɔmɔ kpo amɛtsɔɔ mɛi krokomɛi, ákɛ mɛi ni feɔ ejurɔ, ákɛ mɛi ni fiɔ hegbɛi ni maŋbii yɔɔ lɛ asɛɛ, loo yɛ nɔ ni amɛnyɛ amɛtsu yɛ jarayeli, jeŋ nilee, tsofafeemɔ, kɛ nitsumɔi krokomɛi amli lɛ hewɔ. Shi kɛlɛ, te obaasumɔ akɛ akai bo aha tɛŋŋ?

Scotlandnyo lalafoo wiemɔ ŋmalɔ ko ni gbɛi ji Robert Burns (afi 1759-1796) tsɔɔ bɔ ni eshweɔ akɛ hewalɛ ko aha wɔná nikeenii ko, ni ji nyɛmɔ ni baaha wɔna wɔhe tamɔ bɔ pɛ ni mɛi krokomɛi naa wɔ lɛ. Ani obaanyɛ okwɛ ohe jogbaŋŋ kɛkpe ní okɛɛ yɛ anɔkwale mli akɛ oyɛ gbɛi kpakpa yɛ mɛi krokomɛi kɛ Nyɔŋmɔ hiɛ? Yɛ naagbee lɛ, bɔ ni wɔkɛ mɛi krokomɛi yeɔ ehaa lɛ he hiaa waa fe nibii fɛɛ ni ekolɛ wɔnyɛ wɔfee yɛ akaŋshii loo nitsumɔ mli yɛ be kukuoo ko mli lɛ. No hewɔ lɛ, sanebimɔ lɛ ji: Te bɔ ni wɔkɛ mɛi krokomɛi yeɔ haa—wɔsanegbaa, wɔjeŋba, wɔgbɔmɔtso kɛ nitsumɔ—saa amɛhe ehaa tɛŋŋ? Ani amɛnaa wɔ ákɛ mɛi ni anyɛɔ abɛŋkɛɔ, loo mɛi ni tsiɔ amɛhe kɛjɛɔ mɛi krokomɛi ahe? Ákɛ wɔhe jɔ loo wɔyɛ veveeve? Ákɛ wɔyɛ tswãa loo wɔsane wa? Ákɛ mɛi ni jieɔ hedɔɔ kɛ mlihilɛ kpo loo mɛi ni sumɔɔɔ mɔ ni amɛsusuuu mɛi krokomɛi ahe? Ákɛ mɛi ni jeɔ mɛi anijiaŋ wui ni amɛwieɔ amɛshiɔ mɛi loo ŋaawolɔi kpakpai? Nyɛhaa wɔsusua nɔkwɛmɔnii komɛi ni jɛ blema kɛ ŋmɛnɛŋmɛnɛ beaŋ lɛ he wɔkwɛa, ni wɔkwɛ akɛ mɛni wɔbaanyɛ wɔkase kɛjɛ mli.

[Mfoniri ni yɔɔ baafa 3]

Robert Burns tsɔɔ bɔ ni eshweɔ akɛ hewalɛ ko aha wɔná nikeenii ko, ni ji nyɛmɔ ni baaha wɔna wɔhe tamɔ bɔ pɛ ni mɛi krokomɛi naa wɔ lɛ

[He ni Sane lɛ Jɛ]

Ajie kɛjɛ wolo ni ji A History of England lɛ mli