Sane ko ni Woɔ Hemɔkɛyeli kɛ Ekãa Mli Hewalɛ—Yehowa Odasefoi ni Yɔɔ Ukraine

TAAKƐ bɔ ni Kristofoi ni hi shi yɛ klɛŋklɛŋ afii 100 lɛ mli lɛ kɛ yiwaa kpe lɛ, nakai nɔŋŋ Nyɔŋmɔ webii kɛkpeɔ ŋmɛnɛ. (Mateo 10:22; Yohane 15:20) Maji fioo komɛi anɔ pɛ ni yiwaa lɛ sɛɛ etsɛ loo enaa wa waa fe yiwaa ni tee nɔ yɛ Ukraine, he ni atsĩ Maŋtsɛyeli shiɛmɔ nitsumɔ lɛ naa afii 52 lɛ.

Afi 2002 Yearbook of Jehovah’s Witnesses lɛ gba Nyɔŋmɔ webii ni yɔɔ nakai shikpɔŋ lɛ nɔ lɛ ahe sane. Eji hemɔkɛyeli, ekãafeemɔ, kɛ hewalɛ yɛ haomɔ bei ni naa wa waa mli lɛ he sane. Nɔ ni nyiɛ sɛɛ nɛɛ ji hiɛsɔɔ wiemɔi komɛi ni Ukraine Yehowa Odasefoi anitsumɔhe nine lɛ nine shɛ nɔ:

“Migbe 2002 Yearbook lɛ kanemɔ naa. Be mli ni mikaneɔ nyɛnitsumɔ yɛ Ukraine lɛ he sane lɛ, minyɛɛɛ nɔ ko mafee akɛ ja yaafo. Miisumɔ ni maha nyɛle bɔ ni nyɛ ekãafeemɔ he nɔkwɛmɔnɔ kɛ hemɔkɛyeli ni mli wa kpɛŋŋ lɛ ewo mi hewalɛ babaoo eha. Miyɛ he miishɛɛ waa akɛ mikɛ nyɛ fɛɛ jɛ mumɔŋ weku kome mli. Miida nyɛ shi kɛmiijɛ mitsui mli tɔ̃ɔ!”—Andrée, France.

“Wiemɔi bɛ ni mikɛbaatsɔɔ bɔ ni midaa nyɛ kɛ Yehowa shi kɛha 2002 Yearbook lɛ. Mifó beni mikaneɔ nyɛmimɛi ni fite amɛ afii ni hi fe fɛɛ lɛ yɛ kpabui kɛ yiwalɛ nsrai amli lɛ aniiashikpamɔi babaoo lɛ. Mihiɛ sɔ ekãa ni amɛyɔɔ lɛ. Eyɛ mli akɛ mikɛ afii 27 ehi shi akɛ Odasefonyo moŋ, shi manyɛ makase nii lolo kɛjɛ nakai nyɛmimɛi hii kɛ yei lɛ adɛŋ. Amɛwaje mihemɔkɛyeli yɛ wɔŋwɛi Tsɛ, Yehowa mli.”—Vera, tsutsu Yugoslavia.

“Mikɛ miishɛɛ miiŋma nɛkɛ wolo nɛɛ yɛ nyɛtsuishiŋmɛɛ kɛ anɔkwayeli he nɔkwɛmɔnɔ kpakpa yɛ nakai shitee-kɛ-woo afii lɛ fɛɛ amli lɛ hewɔ. Hekɛnɔfɔɔ kwraa ni nyɛyɔɔ yɛ Yehowa mli kɛ nyɛfaishitswaa akɛ nyɛbaakã he nyɛye anɔkwa lɛ kɛ woo bahaa nyɛ. Kɛfata he lɛ, nyɛ heshibaa yɛ kaai amli lɛ wajeɔ mihemɔkɛyeli akɛ Yehowa shiii ewebii lɛ. Yɛ nyɛ ekãafeemɔ, shifimɔ, kɛ hiɛmiamɔ he nɔkwɛmɔnɔ kpakpa lɛ hewɔ lɛ, wɔbaanyɛ wɔkɛ tsuishitoo akpee wɔnaagbai bibii lɛ anaa yɛ gbɛ ni yɔɔ mlɛo nɔ.”—Tuteirihia, French Polynesia.

“Ebiɔ ni maŋma nyɛ, beni mikane Yearbook lɛ migbe naa sɛɛ. Niiashikpamɔi ni wajeɔ mɔ lɛ fɛɛ sa mitsui he waa diɛŋtsɛ. Miná miishɛɛ akɛ miji anɔkwa gbɛjianɔtoo ni efee ekome lɛ mlinyo, ni mɔ ni nyiɛ hiɛ ji Tsɛ ko ni yɔɔ suɔmɔ ni susuɔ mɔ he, mɔ ni haa wɔ hewalɛ yɛ be ni sa mli lɛ. Edɔ mi waa akɛ Yehowa tsuji babaoo ni yɔɔ ekãa lɛ na amanehulu babaoo ni amɛwala tete po ŋmɛɛ amɛ. Shi miná miishɛɛ hu ejaakɛ yɛ amɛ ekãafeemɔ kɛ mɔdɛŋbɔɔ lɛ naa lɛ, gbɔmɛi babaoo ekase anɔkwale lɛ ni amɛbale wɔ-Tsɛ ni yɔɔ suɔmɔ lɛ.”—Colette, Netherlands.

“Ehe bahia ni mikɛ miŋa aŋma nyɛ ni wɔha nyɛle akɛ sane ni kɔɔ Ukraine he ni wɔkane yɛ Yearbook lɛ mli lɛ sa wɔtsuii ahe waa. Nyɛfee tsuishiŋmɛɛ he nɔkwɛmɔnɔ ko ni nɔ bɛ yɛ shihilɛ ni mli wa waa ni sɛɛ tsɛɔ mli, nyɛ anyɛmimɛi anɔkwafoi. Yɛ wiemɔi ni yɔɔ Abɛi 27:11 lɛ kɛ gbeekpãmɔ naa lɛ, kwɛ bɔ ni Yehowa baaná miishɛɛ eha akɛ eeele akɛ nyɛmimɛi anɔkwafoi babaoo ni jɛ Ukraine lɛ ehiɛ amɛ emuuyeli ni anyɛɛɛ afite lɛ lɛ mli yɛ Abonsam yiwalɛ nifeemɔi lɛ fɛɛ sɛɛ.”—Alan, Australia.

“Yaafonui jɛ mihiŋmɛii amli beni mikane nyɛmimɛi ni yɔɔ Ukraine lɛ he sane lɛ. Amɛŋmɛ amɛtsui shi yɛ nibii babaoo mli—tsuŋwoi afii babaoo, piŋmɔi, nɔnyɛɛ, kɛ weku mligbalamɔ. Miisumɔ ni makɛɛ nyɛmimɛi fɛɛ ni kã he amɛsɔmɔɔ yɛ nyɛ asafoi lɛ amli lɛ akɛ misumɔɔ amɛ ni mibuɔ amɛ waa diɛŋtsɛ. Miná amɛ ekãa kɛ shiŋŋfeemɔ lɛ he miishɛɛ waa. Mile he ni amɛná amɛhewalɛ lɛ kɛjɛ, Yehowa mumɔ lɛ. Yehowa bɛŋkɛ wɔ kpaakpa, ni eesumɔ ni eye ebua wɔ.”—Sergei, Russia.

“Mikane 2002 Yearbook lɛ, ni mifó. Nyɛmimɛi yei kɛ hii babaoo ni yɔɔ wɔ asafo lɛ mli lɛ ewie nyɛhe. Nyɛjara wa waa diɛŋtsɛ. Miyɛ miishɛɛ babaoo akɛ mifata mumɔŋ weku ni da tamɔ nɛkɛ lɛ he.”—Yeunhee, South Korea.

“Wolo ni aŋma ni kɔɔ nyɛhemɔkɛyeli, tsuishiŋmɛɛ, kɛ suɔmɔ ni sɛɛ efooo ni nyɛyɔɔ kɛha Yehowa kɛ e-Maŋtsɛyeli lɛ he lɛ etsirɛ mi waa. Bei komɛi lɛ wɔhiɛ esɔɔɔ heyeli ni wɔnáa mli ŋɔɔmɔ lɛ kɛ mumɔŋ niyenii babaoo ni Yehowa kɛhaa wɔ lɛ. Shi kɛlɛ, enɛ jeee nakai yɛ nyɛgbɛfaŋ. Nyɛhemɔkɛyeli he nɔkwɛmɔnɔ lɛ yeɔ ebuaa wɔ ni wɔyɔseɔ akɛ kɛji wɔyɛ wɔkɛ wɔ-Nyɔŋmɔ lɛ teŋ wekukpaa ni bɛŋkɛ kpaakpa lɛ, ebaaha wɔ hewalɛ koni wɔkɛkpee kaai srɔtoi fɛɛ naa.”—Paulo, Brazil.

“Miná hegbɛ akɛ makane nyɛ niiashikpamɔi ni yɔɔ 2002 Yearbook lɛ mli lɛ. Amɛtsirɛ mi waa diɛŋtsɛ, titri lɛ Nyɛmiyoo Lydia Kurdas niiashikpamɔ ni taa mɔ tsuiŋ lɛ. Minu mikɛ nyɛmi yoo nɛɛ teŋ ekomefeemɔ ko ni bɛŋkɛ kpaakpa he.”—Nidia, Costa Rica.

“Migbe 2002 Yearbook lɛ kanemɔ naa ŋmɛnɛ. Ewo hemɔkɛyeli ni miyɔɔ yɛ Yehowa mli lɛ mli hewalɛ be mli ni mikaneɔ lɛ. Nɔ ko ni mihiɛ kpaŋ nɔ kɔkɔɔkɔ ji sane ni kɔɔ yiŋkɔshikɔshifeemɔ wui ni adu yɛ mɛi ni nyiɛɔ hiɛ lɛ ahe lɛ he lɛ. Etsɔɔ mi akɛ esaaa akɛ miyiŋ feɔ mi kɔshikɔshi kɔkɔɔkɔ yɛ nyɛmimɛi ni nyiɛɔ hiɛ lɛ ahe. Miida nyɛ shi waa diɛŋtsɛ! Mumɔŋ niyenii nɛɛ hi jogbaŋŋ kɛha tsui lɛ, ni esáa wɔ kɛhaa be ni ekolɛ abaaka wɔhemɔkɛyeli lɛ.”—Leticia, United States.

“Wɔmiida nyɛ shi kɛha Yearbook ni nɔ bɛ lɛ. Klɛŋklɛŋ kwraa ni shiɛlɔi babaoo kaneɔ wɔnyɛmimɛi ni yɔɔ Ukraine lɛ anitsumɔ lɛ he sane nɛ. Ewo wɔnyɛmimɛi ni yɔɔ biɛ lɛ hewalɛ. Mɛi babaoo eha amɛsɔɔmɔ nitsumɔ lɛ etee hiɛ waa, titri lɛ yɛ oblahii kɛ oblayei lɛ agbɛfaŋ. Amɛteŋ mɛi komɛi ebɔi sɔɔmɔ akɛ daa gbɛgbalɔi loo gbɛgbalɔi awalɔi. Saji ni kɔɔ nyɛmimɛi hii kɛ yei ni sɔmɔ Yehowa yɛ naatsii be lɛ mli lɛ ewo amɛ fɛɛ hewalɛ.”—Asafo ko mli sɔɔmɔ ajinafoi akuu, Ukraine.

Wɔnyɛmimɛi ni yɔɔ Ukraine lɛ anɔkwayeli lɛ efee hewalɛwoo jɛɛhe lɛɛlɛŋ kɛha Yehowa webii ni yɔɔ jeŋ fɛɛ lɛ. Yɛ anɔkwale mli lɛ, saji ni haa mɔ tsui nyaa ni jeɔ kpo yɛ Yearbook lɛ mli daa afi lɛ ni wɔɔkane daa lɛ ji gbɛ ni sa ni wɔɔtsɔ nɔ wɔkɛwaje wɔhemɔkɛyeli kɛ tsuishiŋmɛɛ yɛ nɛkɛ jaramɔ bei nɛɛ amli.—Hebribii 12:1.