Daniel Kɛ Etsitsinaa- Tsɛɛ Nii Lɛ

YESU kã jamɔ mli hiɛnyiɛlɔi ni buɔ amɛhe jálɔi lɛ ahiɛ akɛni amɛmli fu beni gbekɛbii hii komɛi jie Nyɔŋmɔ yi lɛ hewɔ. Yesu bi amɛ yɛ gbɛ ni ja nɔ akɛ: “Ani nyɛkaneko dã akɛ: ‘Abifabii kɛ fufɔbii anaa ni osaa yijiemɔ oto yɛ’?”—Mateo 21:15, 16.

Daniel ni eye afii ekpaa, ni eyɔɔ Russia wiemɔ asafo ko ni yɔɔ Germany lɛ mli lɛ kɛ enifeemɔ tsɔɔ akɛ gbekɛbii miijie Yehowa yi lolo yɛ wɔbei nɛɛ amli. Ekɛ emami kɛ enyɛmi yoo ko tee Yehowa Odasefoi akpokpaa wulu nɔ kpee ni afee yɛ Duisburg maŋ lɛ mli lɛ. Enɛ ji klɛŋklɛŋ kpee wulu ni tamɔ nɛkɛ ni amɛtee. Nibii ni amɛyaná, tamɔ gbɔiatoohe ni amɛya wɔ lɛ, tooibolɔi babaoo ni yɔɔ kpee lɛ shishi lɛ, bɔ ni ata shi dioo gbii etɛ̃ kɛbo sane lɛ toi lɛ, baptisimɔ lɛ, kɛ agbɛnɛ drama lɛ ji nibii heei kɛha amɛ. Te Daniel fee enii eha tɛŋŋ? Eba ejeŋ jogbaŋŋ.

Beni agbe kpee lɛ naa ni amɛku amɛsɛɛ kɛtee shĩa lɛ, Daniel te shi Ju leebi maŋkpa koni eya skul. Shi ani ole nɔ ni etsɛ yɛ etsitsi naa? Ekpee shishi tsitsinaa-tsɛɛ nii lɛ! Emami kɛɛ lɛ akɛ: “Agbe kpee lɛ naa. Obaanyɛ ojie otsitsinaa-tsɛɛ nii lɛ ŋmɛnɛ.” Shi Daniel kɛɛ lɛ akɛ: “Miisumɔ akɛ mɔ fɛɛ mɔ ale heni mitee kɛ nɔ ni miyakase.” No hewɔ lɛ, ekɛ miishɛɛ tsɛ etsitsinaa-tsɛɛ nii lɛ gbi muu lɛ fɛɛ yɛ skul. Beni etsɔɔlɔ lɛ bi lɛ he sane lɛ, Daniel tsɔɔ lɛ nɔ ni tee nɔ yɛ kpee lɛ shishi.

Kɛtsɔ nakai feemɔ nɔ lɛ, Daniel miijie Yehowa yi tamɔ gbekɛbii hii kɛ yei akpei abɔ ni ejie Yehowa yi yɛ faŋŋ mli yɛ afii ni eho lɛ mli lɛ nɔŋŋ.