Eye Fe Afii Oha Shi Eyɛ Oti ko Ma Ehiɛ yɛ Shihilɛ Mli
ELIN fata mɛi 60 ni yɔɔ Sweden ni nyɛsɛɛ nɛɛ awie amɛhe akɛ amɛye fe afii 105 lɛ ahe. Lɛ diɛŋtsɛ lɛ, eye afii 105. Eyɛ mli akɛ shĩa ni akwɛɔ mɛi ni edara yɛ afii amli eyɔɔ, ni ehiii lɛ he ko yaa moŋ, shi eyɛ gbɔmɔtsoŋ hewalɛ ni sa ni ekã he eji Yehowa Odasefonyo ni yɔɔ ekãa, ni afii 60 nɛ ni ekɔ shidaamɔ ni tamɔ nakai.
Elin nyiɛɔ nɔkwɛmɔnɔ ni bɔfo Paulo fee efɔ̃ shi beni awo lɛ tsuŋ yɛ eshĩa ni ehiii lɛ he ko yaa lɛ sɛɛ, ni eshiɛɔ etsɔɔ mɛi. Paulo shiɛ eha mɛi fɛɛ ni basara lɛ lɛ. (Bɔfoi lɛ Asaji 28:16, 30, 31) Elin hu ŋɔɔ hegbɛ fɛɛ hegbɛ ni enáa lɛ ni ekɛ mɛi ni kwraa shĩa ni amɛyɔɔ lɛ, datrɛfoi, yitsɔifeelɔi, helatsɛmɛi akwɛlɔi, kɛ mɛi krokomɛi ni ekɛkpeɔ yɛ shĩa lɛ mli lɛ gbaa sanekpakpa ni yɔɔ Biblia lɛ mli he sane. Yɛ be kɛ bei amli lɛ, Elin nanemɛi heyelilɔi ni ekɛ amɛ yɔɔ asafo lɛ mli lɛ fɔ̃ɔ amɛ-Biblia kaselɔi anine koni amɛyasara lɛ bɔni afee ni amɛkase nii kɛjɛ eŋɔɔ.
Be fɛɛ be lɛ, Elin hiɛ yɛ ŋmɔlɔŋmɔlɔ ni esumɔɔ nibii amli taomɔ hu, ni enɛ haa esafoŋbii lɛ sumɔɔ esane waa. Enaanyo Odasefonyo ko wie akɛ: “Gbɛ nɔ ni Elin tsɔɔ ekɛ asafo lɛ nyiɛɔ pɛpɛɛpɛ lɛ yɛ naakpɛɛ. Ekaiɔ gbekɛbii kɛ mɛi ni eshi kɛba amɛsafo lɛ mli nyɛsɛɛ nɛɛ lɛ fɛɛ agbɛi.” Kɛfata he lɛ, ale Elin waa akɛ eji mɔ ko ni feɔ gbɔ, ní woɔ mɔ naa ŋmɔlɔ, ní asaŋ eyɔɔ hiɛnɔkamɔ akɛ shihilɛ kpakpa miiba.
Mɛni yeɔ buaa Elin ni emii shɛɔ ehe daa ni asaŋ ehiɛ hiɔ oti ni ma ehiɛ yɛ shihilɛ mli lɛ nɔ? Nɔ ni yeɔ buaa lɛ ji akɛ, daa gbi lɛ, ekaneɔ Ŋmalɛ ni ato he gbɛjianɔ yɛ Yehowa Odasefoi awolo bibioo ni ji Ŋmalɛi lɛ Amli ni Wɔɔkwɛ Daa lɛ mli lɛ. Ehiɛɔ shwɛde ni haa anaa nii agboi ni ekɛkaneɔ Biblia lɛ fã ko daa gbi. Elin kaseɔ nibii ni ayasusuɔ he yɛ kpeei ni Yehowa Odasefoi feɔ daa otsi lɛ shishi, ni eyɛ mli akɛ enyɛɛɛ kpeei nɛɛ eya moŋ, shi amɔmɔɔ kpeei lɛ shishi nifeemɔi lɛ awoɔ kpãa nɔ ahaa lɛ ni eboɔ toi. Biblia lɛ kɛ Biblia kasemɔ woji ni wɔɔkane daa kɛ Kristofoi akpeei hu ni wɔɔya daa lɛ baanyɛ aye abua wɔ koni wɔtsui anyɔ wɔmli yɛ shihilɛ mli ni asaŋ wɔhi shi akɛ mɛi ni oti ko ma amɛhiɛ yɛ shihilɛ mli ekɔɔɔ he eko afii abɔ ni wɔye.—Lala 1:2; Hebribii 10:24, 25.