Anɔkwayeli He Nɔkwɛmɔnɔ

NYƐSƐƐ nɛɛ Nelma ni tsuɔ nii akɛ yitsɔifeelɔ yɛ Cruzeiro do Sul, yɛ Brazil lɛ kɛ anɔkwa ni eyeɔ akɛ Kristofonyo lɛ he kaa kpe. Beni nu afua ko fite nii yɛ amɛkutso lɛ mli lɛ, mɛi ni bafeɔ amɛyitsɔi yɛ eŋɔɔ lɛ ateŋ mɔ kome yake lɛ atadei komɛi. Beni Nelma kwɛɔ atadei lɛ amli lɛ, ena shika ni naa shɛɔ (U.S.) dɔla 1,000 yɛ ekome kotoku mli.

Shika ni Nelma na lɛ shɛɔ enyɔji kpawo nyɔmɔwoo, ni yɛ anɔkwale mli lɛ, no mli lɛ shika he miihia lɛ diɛŋtsɛ. Nu afua lɛ fite lɛ diɛŋtsɛ eshĩa lɛ, ni etsɛ kɛ enyɛmimɛi lɛ hu anibii babaoo ahiɛ kpata. Kulɛ Nelma baanyɛ ekɛ shika lɛ asaa eshĩa lɛ, ni eko po baashwɛ ni ebaanyɛ ekɛye abua ewekumɛi lɛ. Shi kɛlɛ, ehenilee ni ekɛ Biblia etsɔse lɛ lɛ eŋmɛɛɛ lɛ gbɛ akɛ ekɔ shika lɛ.—Hebribii 13:18.

Enɔ jetsɛremɔ lɛ, eshi shĩa leebi maŋkpa eyana yoo ni bake lɛ atadei lɛ dani aje nitsumɔ shishi. Nelma da lɛ shi yɛ atadei ni ekɛbake lɛ lɛ hewɔ, ni eha ele hu akɛ eba koni ekɛ nɔ ni ena yɛ mli lɛ abaha lɛ. Yoo lɛ mii shɛ ehe jogbaŋŋ ejaakɛ eyɛ mɛi ni ekɛtsuɔ nii, ni ekɛ nakai shika lɛ to koni kɛfee lɛ, ekɛwo amɛ nyɔmɔ. Yoo lɛ wie akɛ: “Efɔɔɔ kaa akɛ mɛi aaaye anɔkwa.”

Yɛ anɔkwale mli lɛ, ekolɛ mɛi komɛi baanu he akɛ anɔkwa ni mɔ yeɔ lɛ he baaa sɛɛnamɔ krɛdɛɛ ko kɛhaaa lɛ. Shi kɛlɛ, mɛi fɛɛ ni bɔɔ mɔdɛŋ akɛ amɛsa anɔkwa Nyɔŋmɔ ni ji Yehowa hiɛ lɛ buɔ anɔkwayeli akɛ su ko ni he hiaa waa. (Efesobii 4:25, 28) Nelma wie akɛ: “Eji mikɔ shika lɛ kulɛ, kɛ́ je na lɛ, minyɛŋ mawɔ.”