Ani Hetoo lɛ He Miihia?

“Beni miye afii nyɔŋma lɛ, mikɛ gbekɛbii hii bɔi kpojee. Shishijee lɛ, wɔmɔmɔɔ wɔnine mli ni wɔshɔɔ wɔnaa. Shi etsɛɛɛ nɔŋŋ kɛkɛ ni wɔbɔi wɔhe taramɔ, ni wɔfee nibii srɔtoi ni teɔ bɔlɛnamɔ akɔnɔi ashi. Beni miye afii 15 lɛ, mibɔi nitsumɔ, ni hii ni mikɛyɔɔ nitsumɔhe lɛ ekomɛi babiɔ mi suɔmɔ, ni amɛmiitao ni amɛkɛ mi aná bɔlɛ. Miisumɔ ni mɛi ni mikɛtsuɔ nii lɛ ana akɛ mi hu yoo ji mi, no hewɔ lɛ mikɛ amɛ fee ekome kɛfee nɔ fɛɛ ni amɛfeɔ lɛ. Akɛni mitao akɛ masa minanemɛi lɛ ahiɛ hewɔ lɛ, eha mikɛ mihe wo nifeemɔi srɔtoi ni teɔ bɔlɛnamɔ akɔnɔi ashi amli vii.”—SARAH,a AUSTRALIA.

KƐJI akɛɛ bo akɛ atsɔse Sarah yɛ Kristofoi ashĩa lɛ, ani ohiɛ baafee bo yaa? Efɔlɔi bɔ mɔdɛŋ akɛ amɛkɛ Biblia mli shishitoo mlai baatsɔse lɛ. Shi Sarah kɔ lɛ diɛŋtsɛ egbɛ.

Mɛi babaoo baakpɛlɛ gbɛ ni Sarah kɔ lɛ nɔ. Amɛsusuɔ akɛ nɔ ni Biblia lɛ kɛɔ yɛ bɔlɛnamɔ he lɛ be eho. Mɛi komɛi hu susuɔ akɛ tɔmɔ bɛ he akɛ mɔ ko ni tsɛɔ ehe Kristofonyo lɛ kɛ ehe aaawo bɔlɛnamɔ nifeemɔi amli.

Ani ehe miihia ni ole nɔ ni Biblia lɛ kɛɔ yɛ bɔlɛnamɔ he lɛ, ni ohi shi yɛ naa? Ŋmalɛ lɛ kɛɔ akɛ Biblia lɛ ‘jɛ Nyɔŋmɔ Mumɔ lɛŋ ni ehi ha nitsɔɔmɔ.’ (2 Timoteo 3:16) Kɛ́ oheɔ oyeɔ akɛ Nyɔŋmɔ ji mɔ ni bɔ adesai, ni akɛ Biblia lɛ ji e-Wiemɔ ni jɛ mumɔŋ lɛ, no lɛ ehe miihia ni ole nɔ ni Biblia lɛ kɛɔ yɛ bɔlɛnamɔ he.

Dɔlɛ sane ji akɛ, mɛi babaoo ayiŋ efutu amɛ yɛ nɔ ni Biblia lɛ kɛɔ yɛ bɔlɛnamɔ he lɛ he. Jamɔŋ hiɛnyiɛlɔi ni kɛɔ akɛ amɛbuɔ Biblia lɛ tsɔɔ tsɔɔmɔi srɔtoi ni kɛ amɛhe kpãaa gbee yɛ bɔlɛnamɔ he. Yɛ anɔkwale mli lɛ, sane nɛɛ eha sɔlemɔi wuji babaoo amli egbala.

Yɛ nɔ najiaŋ ni oookpɛlɛ nɔ ni mɛi kɛɔ lɛ nɔ lɛ, mɛni hewɔ bo diɛŋtsɛ oŋɔɔɔ be fioo ni okɛtao sane nɛɛ mli? Saneyitso ni nyiɛ sɛɛ lɛ wieɔ saji nyɔŋma ni mɛi fɔɔ bimɔ yɛ nɔ ni Biblia lɛ kɛɔ yɛ bɔlɛnamɔ he lɛ he. Obaana hetoi ni yɔɔ faŋŋ ni haa wɔnaa nɔ ni Biblia lɛ tsɔɔ diɛŋtsɛ yɛ nakai saneyitso lɛ mli. Saneyitsei ni wieɔ bɔlɛnamɔ he nɛɛ ateŋ nɔ ni ji naagbee nɔ̃ lɛ baaha wɔna nɔ hewɔ ni ehe hiaa ni wɔkpɛ yiŋ ni ja yɛ sane nɛɛ he.

[Shishigbɛ niŋmaa]